កីឡាការិនីអាមេរិកស៊េរីណា វីលៀមនៅតែរក្សាបាននូវភាពខ្លាំងរបស់ខ្លួនជាដដែលដោយនាងបានយកឈ្នះការប្រកួតជុំបើកឆាកកម្មវិធី Western & Southern Openកាលពីថ្ងៃអង្គារទី១៤សីហាកន្លងមកនេះ ។ នៅលើទីលាន Lindner Family Tennis Centerស្ថិតក្នុងក្រុង Masonរដ្ឋអូហៃយ៉ូ សហរដ្ឋអាមេរិក ស៊េរីណាបានបំបាក់កីឡាការិនីក្រិក Eleni Daniilidouក្នុងលទ្ធផល២សិតទល់នឹងសូន្យគឺ ៦-៣និង៦-៤ ។
នាងបានថ្លែងថា ៖«ខ្ញុំគិតថា ខ្ញុំអាចទៅរួចសម្រាប់ការប្រកួតលើកនេះ ។ ប៉ុន្តែខ្ញុំបានធ្វើឱ្យមានកំហុស unforced errorsដល់ទៅ៤២ ។ វាពិតជារឿងគួរឱ្យរន្ធត់។ មើលទៅហាក់ដូចជាលទ្ធផលនេះមិនមែនជារបស់កីឡាការិនីអាជីពនោះទេ ។ សង្ឃឹមថា ប្រកួតលើកក្រោយទៀត ខ្ញុំនឹងបំបាត់ឱ្យអស់នូវកំហុសទាំងនេះ »។
ចំណែកនាងវេនីស វីលៀមដែលបានយកឈ្នះមេដាយមាសអូឡាំពិកទីក្រុងឡុងលើផ្នែកវាយគូក៏បានឈានចូលទៅជុំបន្តផងដែរបន្ទាប់ពីបានបំបាក់កីឡាការិនីរុស្ស៊ី ម៉ារីយ៉ា គីរីឡឹនកូក្នុងលទ្ធផល ៦-៣,៦-៧និង៦-២ ។ ប្រកួតលើកនេះ វេនីសប្រើសឺវីសខ្លាំងចំនួន១១លើកខណៈនាងគីរីឡឹនកូប្រើបានតែ៥លើក ។ យ៉ាងណាក៏ដោយ វាមិនមែនជាលទ្ធផលដែលទទួលបានដោយងាយស្រួលនោះទេ ។ វេនីសបានចំណាយពេលអស់ដល់ទៅជាង២ម៉ោងទើបអាចបញ្ចប់ការប្រកួតបាន ។
នាងបានថ្លែងថា ៖«គីរីឡឹនកូវាយសឺវីសបានល្អខ្លាំងណាស់ ។ នៅពេលដែលនាងធ្វើបានល្អដូច្នេះ ខ្ញុំត្រូវតែប្រុងស្មារតីឱ្យបានខ្ពស់បំផុត តែស្មារតីរបស់ខ្ញុំបានធ្លាក់ចុះបន្តិចក្នុងសិតទី៣»។វេនីសបានទទួលស្គាល់ថា ពិន្ទុនៅក្នុងវគ្គបន្ថែមម៉ោងនៃសិតទី២ពិតជាបានជួយនាងឱ្យឈ្នះការប្រកួតនេះ ។« ខ្ញុំគិតថា ប្រកួតលើកនេះ ខ្ញុំសង្កត់ធ្ងន់ខ្លាំងទៅលើការវាយសឺវីស »។
លទ្ធផលប្រកួតគូផ្សេងទៀតមានដូចជា កីឡាការិនីអូស្ត្រាលីសាម៉ាន់ថា ស្តូសួឈ្នះកីឡាការិនីអេស្ប៉ាញ Anabel Medina Garriguesក្នុងលទ្ធផល ៦-៣,៦-៧និង៦-៤។ ថ្លែងបន្ទាប់ពីបញ្ចប់ការប្រកួតដែលមានរយៈពេល២ម៉ោងនិង៣៧នាទី ស្តូសួបានបញ្ជាក់ថា ៖«ខ្ញុំគិតថា ខ្ញុំនៅតែអាចលុបចោលចន្លោះប្រហោងនោះបានតិចតួចប៉ុណ្ណោះ» ៕
ចែករំលែកព័តមាននេះ