អ្នកទទួលខុសត្រូវតុលាការអេហ្ស៊ីបម្នាក់រាយការណ៍ថាតុលាការអេហ្ស៊ីបមួយកាលពីថ្ងៃទី១៤ សីហា បានកាត់ទោសប្រហារជីវិតសកម្មជនអ៊ិស្លាមនិយម១៤នាក់ពីបទសម្លាប់ប៉ូលិសនិងទាហានក្នុងឱកាសនៃការវាយប្រហារមួយកាលពីឆ្នាំទៅមិញប្រឆាំងស្នងការដ្ឋានប៉ូលិសមួយនៅភាគខាងជើងតំបន់សុីណៃអុី ។
ការកាត់ទោសនេះនឹងអាចធ្វើឱ្យធ្ងន់ធ្ងរថែមទៀតដល់ភាពតានតឹងក្នុងតំបន់ស៊ីណៃអី ដែលមានអស្ថេរភាពនោះរបស់អេហ្ស៊ីប ។ តំបន់ស្ថិតនៅជាប់ព្រំដែនជាមួយអុីស្រាអែលនោះកើតមានការប្រយុទ្ធគ្នាទាំងឡាយរវាងកងកម្លាំងសន្តិសុខនិងពួកសកម្មប្រយុទ្ធអ៊ិស្លាមនិយមក្រោយការវាយប្រហារមួយកាលពីថ្ងៃទី៥ សីហា ស្លាប់កងឆ្មាំព្រំដែនអេហ្ស៊ីបអស់១៦នាក់មក ។
ប្រភពព័ត៌មានសន្តិសុខមួយគូសបញ្ជាក់ថា ការប៉ះទង្គិចគ្នានានាបានផ្ទុះឡើងរវាងពួកសកម្មប្រយុទ្ធអ៊ិស្លាមនិយមនិងកងទ័ពអេហ្ស៊ីបក្នុងភូមិជាប់ព្រំដែនមួយកាលពីថ្ងៃទី១៤សីហានៅតំបន់ស៊ីណៃអុីខាងជើង ។ ការបាញ់តគ្នាផ្ទុះឡើងក្នុងភូមិអាល់ហ្គូរ៉ាខណៈកងកម្លាំងយោធានិងប៉ូលិសលុកចូលក្នុងផ្ទះរបស់ពួកសកម្មប្រយុទ្ធទាំងឡាយដែលវាយប្រហារលើបណ្តាទីតាំងរដ្ឋាភិបាលដោយសម្លាប់បុគ្គលិកយោធានិងប៉ូលិស។ ពួកសកម្មប្រយុទ្ធបានរត់គេចខ្លួនទៅកាន់តំបន់ភ្នំ ៕
ចែករំលែកព័តមាននេះ