រាជធានីភ្នំពេញ ៖ ការជួញដូរគ្រឿងញៀនឆ្លងប្រទេសតាមអាកាសយានដ្ឋានអន្តរជាតិភ្នំពេញ ត្រូវបានការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញ បង្ក្រាបជាបន្តបន្ទាប់ក្នុងខែសីហា ២០១២ នេះ ហើយការបង្ក្រាបគ្រឿងញៀនថ្មីមួយទៀតដែលជាករណីទី៤ ត្រូវបានបង្ក្រាប និងចាប់ឃាត់ខ្លួនស្ត្រីជនជាតិថៃម្នាក់ និងដកហូតម្សៅកូកាអីុនជិត១៣គីឡូក្រាម នៅចំណុចច្រកអ្នកដំណើរកាលពីវេលាម៉ោង១១និង១៨នាទីព្រឹកថ្ងៃទី១៤ សីហា ២០១២។
មន្ត្រីនគរបាលប្រចាំការនៅអាកាសយានដ្ឋានអន្តរជាតិភ្នំពេញ ឱ្យដឹងថា កាលពីព្រឹកថ្ងៃខាងលើមន្ត្រីគយនៃការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញ នៅចំណុចច្រកអ្នកដំណើរមកដល់បានចាប់ឃាត់ខ្លួនស្ត្រីម្នាក់ឈ្មោះ BUCHA PREEDAPORN ជាជនជាតិថៃ អាយុ៣៥ឆ្នាំ កាន់លិខិតឆ្លងដែនលេខ បេ៦០៧៤៨៩ ស្ត្រីនេះធ្វើដំណើរតាមជើងយន្តហោះលេខ MI 622 សិង្ហបុរី-ភ្នំពេញ ។ បន្ទាប់ពីឃាត់ខ្លួនសមត្ថកិច្ចគយបាននាំស្ត្រីជនជាតិថៃទៅយកវ៉ាលីស និងឆែកឆេររកឃើញម្សៅពណ៌ស ចំនួន១០ដុំដែលគេលាក់ទុកនៅបាត និងជញ្ជាំងវ៉ាលីស ។ យោងតាមសមត្ថកិច្ចជំនាញពិនិត្យទៅលើម្សៅពណ៌ស ដែលស្ត្រីជនជាតិថៃនាំចូលមកនោះបានបញ្ជាក់ថា ជាម្សៅកូកាអីុនមានទម្ងន់១២គីឡូ៨៩៩,៤ក្រាម ។ គ្រឿងញៀននេះពួកឧក្រិដ្ឋជនមានគោលបំណងនាំចេញទៅប្រទេសថៃ ហើយកម្ពុជាគ្រាន់តែ ជាតំបន់ឆ្លងកាត់ប៉ុណ្ណោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ