កាលពីថ្ងៃទី១៤សីហា ប៉ូលិសអាហ្វ្រិកខាងត្បូងបានដាក់ពង្រាយកម្លាំងនៅឯអណ្តូងរ៉ែប្លាទីនមួយដែលនៅទីនោះកើតមានការប៉ះទង្គិចបង្ហូរឈាមគ្នាកាលពីថ្ងៃទី១២ សីហាកន្លងមកនេះ បណ្តាលឱ្យមនុស្សស្លាប់១០នាក់ ។ កងកម្លាំងប៉ូលិសប្រដាប់អាវុធនិងបណ្តាឧទ្ធម្ភាគចក្រប៉ូលិសត្រូវបានដាក់ពង្រាយច្រើននៅឯទីតាំងអណ្តូងរ៉ែម៉ារីកាណា ជិតក្រុង RUSTENBURG ភាគពាយ័ព្យប្រទេសដែលអណ្តូងរ៉ែនោះគ្រប់គ្រង ដោយក្រុមហ៊ុនផលិតប្លាទីនធំជាងគេទី៣លើពិភពលោកគឺក្រុមហ៊ុន LONMIN ។
វិទ្យុ៧០២របស់អាហ្វ្រិកខាងត្បូងរាយការណ៍ថា សាកសពមនុស្សម្នាក់ដែលទើបត្រូវគេបាញ់សម្លាប់ថ្មីៗត្រូវបានរកឃើញកាលពីថ្ងៃទី១៤ សីហា នៅ TOWNSHIP ក្បែរអណ្តូងរ៉ែនោះ ។ ក្នុងការប៉ះទង្គិចគ្នាមួយកាលពីថ្ងៃទី១៣ សីហាកន្លងមកនេះរវាងពួកកម្មកររ៉ែ និងប៉ូលិសដែលប៉ុនប៉ងស្តាររបៀបរៀបរយឡើងវិញ មនុស្ស៣នាក់ត្រូវបាញ់ស្លាប់ដោយប៉ូលិសដែលលើកហេតុផលពីកិច្ចការពារខ្លួនស្របច្បាប់ហើយឆ្មាំសន្តិសុខ២នាក់ត្រូវគេវាយសម្លាប់ ។ កាលពីចុងសប្តាហ៍កន្លងមកនេះ ឆ្មាំសន្តិសុខ២នាក់ស្លាប់ពេលគ្រាប់បែកភ្លើងមួយត្រូវបានគប់មកលើរថយន្តពួកគេហើយកម្មកររ៉ែ២នាក់ក៏ត្រូវស្លាប់ដែរ ។
ផលិតកម្មប្លាទីនក្នុងអណ្តូងរ៉ែនោះត្រូវស្ទះចាប់តាំងពីថ្ងៃទី១០ សីហាមកក្រោយកូដកម្មខុសច្បាប់មួយនិងការកើនឡើងនៃអំពើហិង្សាព្រមទាំងការបំភ័យ ។អណ្តូងរ៉ែទាំងឡាយរបស់អាហ្វ្រិកខាងត្បូងធ្លាប់ជួបប្រទះជាច្រើនលើកនូវការប៉ះទង្គិចបង្ហូរឈាមគ្នាកាលពីគ្រាកន្លងមក ពិសេសពេលកម្មករដែលស្ថិតក្នុងសហជីពមួយចំនួនបដិសេធមិនព្រមធ្វើតាមការអំពាវនាវឱ្យធ្វើកូដកម្មរបស់សហជីពដទៃៗទៀតឬបដិសេធពុំព្រមបញ្ចប់កូដកម្ម ៕
ចែករំលែកព័តមាននេះ