ខេត្តរតនគិរី ៖ ជន២នាក់បានហៅម៉ូតូឌុបជិះទៅធ្វើការ លុះដល់ពាក់កណ្តាលផ្លូវក៏ធ្វើសកម្មភាពប្លន់ តែអត់បានសម្រេចទេ និងត្រូវប៉ូលិសចាប់ដាក់ខ្នោះ ។ ហេតុការណ៍នេះ បានកើតឡើងកាលពីថ្ងៃទី១១ សីហា វេលាម៉ោង២ និង១០នាទីរសៀល នៅចំណុចផ្លូវលំក្រាលក្រួសក្រហមដែលមានដើមស្វាយចន្ទីច្រើន ស្ថិតក្នុងភូមិម៉ាលិក ឃុំម៉ាលិក ស្រុកអណ្តូងមាស ។
ទាក់ទិននឹងហេតុការណ៍ខាងលើ ត្រូវបានប៉ូលិសព្រហ្មទណ្ឌកម្រិតធ្ងន់ខេត្តឱ្យដឹងថា អ្នករត់ម៉ូតូឌុបឈ្មោះសុខ ហ៊ិន ភេទប្រុស អាយុ៣០ឆ្នាំ មានទីលំនៅភូមិជ័យជម្នះ សង្កាត់ឡាបានសៀក ក្រុងបានលុង ឯម៉ូតូដែលក្រុមចោរប៉ុនប៉ងប្លន់ធុនសេ១២៥ ស៊េរី២០១១ ពណ៌ខ្មៅ ។ ជនសង្ស័យ២នាក់នេះ គឺជាជនជាតិវៀតណាម ត្រូវសមត្ថកិច្ចចាប់ខ្លួនបាននៅថ្ងៃទី១២ សីហា វេលាម៉ោង១១ និង៥៥នាទីព្រឹក នៅចំណុចចម្ការស្វាយចន្ទីរបស់អ្នកភូមិ ស្ថិតនៅភូមិលោម ឃុំម៉ាលិក ស្រុកអណ្តូងមាស ។ ជនសង្ស័យជាជនជាតិវៀតណាមនេះ ម្នាក់ឈ្មោះង្វៀន វ៉ាន់បាក ភេទប្រុសអាយុ១៧ឆ្នាំ និងម្នាក់ទៀតឈ្មោះង្វៀន មីង ភេទប្រុស អាយុ២៣ឆ្នាំ ពួកគេមានស្រុកកំណើតនៅប្រទេសវៀតណាម ។
ក្រោយពីត្រូវសមត្ថកិច្ចចាប់ខ្លួនបាន ជនសង្ស័យសារភាពថា បក្សពួកខ្លួនមានគ្នាតែ២នាក់ទេ ហើយមកខេត្តរតនគិរីធ្វើជាកម្មករដាំកូនកៅស៊ូឱ្យក្រុមហ៊ុនវៀតណាមមួយ ។ ក្រោយពីធ្វើកម្មករបាន១ខែមកក៏ឈប់ រួចនាំគ្នាទៅខេត្តព្រះសីហនុបាន១ខែ ក៏ត្រឡប់មកខេត្តរតនគិរីវិញ និងជួលម៉ូតូឌុបខាងលើជិះក្នុងតម្លៃ៥ម៉ឺនរៀល ដើម្បីរកការងារធ្វើតាមក្រុមហ៊ុននៅក្នុងស្រុកអណ្តូងមាស ។ លុះពេលទៅដល់ពាក់កណ្តាលផ្លូវឃើញមានសភាពស្ងាត់ឱកាសល្អក៏ធ្វើសកម្មភាពប្លន់ម៉ូតូតែម្តង ដោយប្រើកូនកាំបិតចុងស្រួចចាក់ម្ចាស់ម៉ូតូ ហើយម្ចាស់ម៉ូតូដែលរងរបួសបានស្រែកឆោឡោហៅអ្នកភូមិឱ្យជួយ។ ដោយសារតែមានការស្លន់ស្លោពួកខ្លួនក៏ផ្តួលម៉ូតូចោល ហើយរត់ចូលព្រៃគេចខ្លួន ប៉ុន្តែបានតែមួយយប់ក៏សមត្ថកិច្ចចាប់ខ្លួនបាន ។ជនសង្ស័យទាំង២នាក់ខាងលើ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ