ខេត្តព្រះវិហារ ៖ នាព្រឹកថ្ងៃទី១៣ សីហា នៅទីបញ្ជាការអង្គរក្សជួរមុខទិសទី១ ប្រាសាទព្រះវិហារ អាជ្ញាធរជាតិព្រះវិហារបានបើកកិច្ចប្រជុំបូកសរុបលទ្ធផលការងារ៦ខែដើមឆ្នាំ២០១២ និងលើកទិសដៅអនុវត្តបន្ត ក្រោមអធិបតីភាពលោកជុច ភឿន រដ្ឋលេខាធិការក្រសួងវប្បធម៌ និងវិចិត្រសិល្បៈ ប្រធានអាជ្ញាធរជាតិព្រះវិហារ និងជាប្រធានក្រុមការងារថ្នាក់ជាតិអភិវឌ្ឍន៍តំបន់ប្រាសាទព្រះវិហារ ។
ចូលរួមក្នុងកិច្ចប្រជុំនេះមាន លោកសួស យ៉ារ៉ា អនុរដ្ឋលេខាធិការទីស្តីការគណៈរដ្ឋមន្ត្រី និងជាអនុប្រធានអចិន្ត្រៃយ៍ក្រុមការងារថ្នាក់ជាតិអភិវឌ្ឍន៍តំបន់ប្រាសាទព្រះវិហារ លោកអ៊ុំ ម៉ារ៉ា អភិបាលខេត្ត លោកឧត្តមសេនីយ៍ឯក យង់ សារិទ្ធ មេបញ្ជាការរងបញ្ជាការដ្ឋានអង្គរក្សប្រចាំជួរមុខ ព្រមទាំងមន្ត្រីជាន់ខ្ពស់មកពីទីស្តីការគណៈរដ្ឋមន្ត្រី អាជ្ញាធរជាតិព្រះវិហារ អាជ្ញាធរដែនដី កងកម្លាំងទាំង៣ប្រភេទប្រចាំជួរមុខសរុបប្រមាណ៦០នាក់ ។
លោកអនុរដ្ឋលេខាធិការ សួស យ៉ារ៉ា បានធ្វើរបាយការណ៍ស្តីការខិតខំប្រឹងប្រែងក្នុងការស្តារនិងអភិវឌ្ឍន៍តំបន់ប្រាសាទព្រះវិហារ បន្ទាប់ពីតំបន់នេះមានសភាពស្ងប់ស្ងាត់ និងបានលើកឡើងពីស្នាដៃជាច្រើនដែលក្រុមការងារថ្នាក់ជាតិបានសហការយ៉ាងជិតស្និទ្ធជាមួយអាជ្ញាធរដែនដី កងកម្លាំងទាំង៣ប្រភេទប្រចាំជួរមុខ ពិសេសគឺកងអង្គរក្សសម្តេចតេជោ ដែលបានចូលរួមសហការ ទាំងកម្លាំង និងមធ្យោបាយ ។
លោកជុច ភឿន មានប្រសាសន៍ថា យើងត្រូវធ្វើយ៉ាងណាកំណត់ការគ្រប់គ្រង និងបន្តធ្វើការអភិវឌ្ឍឱ្យបានច្បាស់លាស់ ។ ជាមួយនេះបង្កើតយន្តការក្នុងការអភិរក្ស អភិវឌ្ឍតំបន់បុរាណឋាន គឺប្រាសាទព្រះវិហារដែលជាកេរមរតករបស់ខ្មែរ និងបង្កើតមីក្រូហិរញ្ញវត្ថុសំដៅជំរុញមុខរបរប្រជាពលរដ្ឋរស់នៅក្នុងភូមិក្បែរតំបន់អភិរក្ស ។លោកអ៊ុំ ម៉ារ៉ា អភិបាលខេត្ត បានមានប្រសាសន៍លើកឡើងថា បច្ចុប្បន្នតំបន់ប្រាសាទព្រះវិហារ គឺជាតំបន់ទេសចរណ៍យ៉ាងសំខាន់សម្រាប់ភ្ញៀវជាតិ និងអន្តរជាតិចូលទៅទស្សនា បន្ទាប់ពីរាជរដ្ឋាភិបាលបានស្ថាបនាផ្លូវគមនាគមន៍ទៅកាន់ប្រាសាទព្រះវិហារ ។ លោកអភិបាលខេត្តបានមានប្រសាសន៍ពីវិធានការរៀបចំសណ្តាប់ធ្នាប់ នៅចំណុចឃុំស្រឯម ជំរុញឱ្យរៀបចំសណ្តាប់ធ្នាប់តំបន់បណ្តោះអាសន្នផ្លូវចូលភូមិធម្មជាតិ ជំរុញឱ្យប្រជាពលរដ្ឋទៅលក់ដូរនៅផ្សាររ៉ាម៉ា និងជំរុញឱ្យរៀបចំផ្សារធំមួយនៅទល់មុខភូមិធម្មជាតិ ។
លោកអភិបាលខេត្តក៏បានលើកឡើងអំពីការងារជាច្រើនបន្ថែមទៀត ដែលនឹងត្រូវធ្វើការអភិវឌ្ឍស្រុកជាំក្សាន្តផងដែរ បន្ទាប់ពីរាជរដ្ឋាភិបាលកម្ពុជា និងថៃបានសម្រេចបើកច្រកទ្វារអន្តរជាតិចំណុចអានសេះជាផ្លូវការចាប់ពីពេលនេះតទៅ ដើម្បីជាផលប្រយោជន៍សម្រាប់ប្រជាពលរដ្ឋទាំង២រស់នៅជិតខាងគ្នា និងគាំទ្របញ្ហាដីធ្លី ដែលរាជរដ្ឋាភិបាលកំពុងតែដំណើរការទៅយ៉ាងសកម្ម ក្នុងការផ្តល់កម្មសិទ្ធិដីធ្លីជូនប្រជាពលរដ្ឋឱ្យកាន់តែសុក្រឹត ៕
ចែករំលែកព័តមាននេះ