រាជធានីភ្នំពេញ ៖ បងប្អូនបង្កើតប្រុសស្រី២នាក់ កាលពីថ្ងៃទី១៣ សីហា បានត្រូវសមត្ថកិច្ចនគរបាលនាយកដ្ឋានសន្តិសុខផ្ទៃក្នុងឃាត់ខ្លួនរួចបញ្ជូនទៅកាន់សាលាដំបូងរាជធានីភ្នំពេញនៅថ្ងៃទី១៤ សីហា ដោយជាប់ពាក់ព័ន្ធនឹងការពោលពាក្យគំរាមបោកគ្រាប់បែកនៅរដ្ឋសភា និងសាលារាជធានីភ្នំពេញតាមទូរស័ព្ទ ។ ជនទាំង២នាក់នេះគឺឈ្មោះឃ្លី វណ្ណា ភេតស្រី អាយុ២៦ឆ្នាំ និងប្អូនប្រុសឈ្មោះឃ្លី ប្រាក់ អាយុ២៤ឆ្នាំ ពួកគេទាំង២នាក់មានទីលំនៅក្នុងភូមិអម្ពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ។
ជុំវិញករណីចោទប្រកាន់នេះត្រូវបានឱ្យដឹងថា កាលពីថ្ងៃទី១២ សីហា កន្លងទៅ មានជនមិនស្គាល់ឈ្មោះម្នាក់បានទូរស័ព្ទទៅ កាន់ការិយាល័យធ្វើការរបស់នាយករដ្ឋបាលសាលារាជធានីភ្នំពេញ ដោយអះអាងថាខ្លួនជាបក្សពួករបស់ក្រុមចាប់ជំរិតទារប្រាក់កូនលោកសូរ ផន អនុរដ្ឋលេខាធិការក្រសួងមហាផ្ទៃ ។ បន្ទាប់ពីទូរស័ព្ទទៅកាន់នាយករដ្ឋបាលសាលារាជធានីភ្នំពេញ និងរៀបរាប់អំពីសមាសភាពក្រុមរបស់ខ្លួនហើយ ក៏ពោលពាក្យគំរាមទៀតថា គេក៏មានបំណងបោកគ្រាប់បែកនៅវិមានរដ្ឋសភា និងនៅសាលារាជធានីភ្នំពេញដែរ ។
ដោយមានការនិយាយគំរាមតាមទូរស័ព្ទយ៉ាងដូច្នេះ នាយករដ្ឋបាលសាលារាជធានីភ្នំពេញ ក៏រាយការណ៍ទៅនាយកដ្ឋានសន្តិសុខផ្ទៃក្នុងដើម្បីស្រាវជ្រាវរកចាប់ខ្លួនជនសង្ស័យនោះ។ នៅថ្ងៃទី១៣ សីហា នាយកដ្ឋានសន្តិសុខផ្ទៃក្នុងក្រសួងមហាផ្ទៃ បន្ទាប់ពីការស៊ើបអង្កេតស្រាវជ្រាវក៏បានឃាត់ខ្លួនជនសង្ស័យ២នាក់បងប្អូនដែលជាអ្នកគំរាមនាយករដ្ឋបាលសាលារាជធានីភ្នំពេញ ។ ក្រោយពីឃាត់ខ្លួន ជនទាំង២នាក់បងប្អូននេះត្រូវបានបញ្ជូនទៅកាន់សាលាដំបូងដើម្បីឱ្យតំណាងអយ្យការសាកសួរតាមផ្លូវច្បាប់ ។
នៅដំណាក់កាល លោកព្រះរាជអាជ្ញារងសាកសួរ ជនទាំង២នាក់ឆ្លើយទៅមុខទៅក្រោយហាក់ដូចជាមនុស្សមានសតិមិនប្រក្រតី ដូចជាឈ្មោះឃ្លី ប្រាក់ ឆ្លើយថា គេគ្មានគំនិតណាមួយយកគ្រាប់បែកទៅបោកនៅវិមានរដ្ឋសភាទេ ម៉្យាងវិញទៀតទាំង២នាក់បងប្អូនស្ទើរតែមិនស្គាល់អ្វីហៅថាគ្រាប់បែកនោះផង ។ចំណែកលេខទូរស័ព្ទដែលគេហៅចូលមិនបានដឹងថា ជាលេខរបស់អ្នកណាទេ តែជាលេខមើលតាមទូរទស្សន៍ ឃើញលេខទូរស័ព្ទជាប់នៅក្នុងនោះ ទើបគេចុចទូរស័ព្ទលេងទៅ ។ ផ្អែកតាមចម្លើយនៅសាលាដំបូង រួមទាំងអាកប្បកិរិយារបស់ពួកគេទាំង២នាក់ គឺទំនងដូចជាមនុស្សមានសតិមិនប្រក្រតី ដែលតំណាងអយ្យការស្ថិតក្នុងការពិចារណា ហើយរហូតមកដល់ល្ងាចថ្ងៃទី១៤ សីហា នៅមិនទាន់ចោទប្រកាន់ ឬសម្រេចយ៉ាងណានៅឡើយទេ ៕
ចែករំលែកព័តមាននេះ