ខេត្តព្រះវិហារ ៖ រថយន្តកាមរីស៊េរី៩៥មួយគ្រឿង ដឹកឈើគ្រញូងលោតឆត្រក្រឡាប់បណ្តាលឱ្យឆេះហ្មត់មើលឃើញតែរងើកភ្លើង បង្កឱ្យមានការភ្ញាក់ផ្អើលកាលពីវេលាម៉ោងប្រហែល៥ទៀបភ្លឺ ថ្ងៃទី១៥ សីហា តាមដងផ្លូវជាតិលេខ៦២ ស្ថិតក្នុងឃុំយាង ស្រុកជាំក្សាន្ត ។
តាមការឱ្យដឹងពីមន្ត្រីអភិរក្សព្រៃឈើបរិស្ថានគូលែន ព្រហ្មទេពប្រចាំក្បែរកន្លែងកើតហេតុថា រថយន្តដែលឆេះនេះ គឺដឹកឈើគ្រញូងពេញរថយន្តលោតឆ័ត្រចេញពីជើងភ្នំដងរែកក្នុងស្រុកជាំក្សាន្ត លុះមកដល់ចំណុចកើតហេតុមិនដឹងជាយ៉ាងម៉េច ស្រាប់តែក្រឡាប់ឆេះតែម្តង។ មកដល់ពេលនេះគេនូវមិនទាន់ឃើញសមត្ថកិច្ចចុះទៅធ្វើកំណត់ហេតុនៅឡើយទេ ហើយតាមការបញ្ជាក់ឱ្យដឹងពីមន្ត្រីបរិស្ថានខាងលើថា នៅកន្លែងកើតហេតុក៏ពុំឃើញសពមនុស្សនៅក្នុងរថយន្តដែលឆេះនោះឡើយ ប្រហែលជាអ្នកបើករថយន្តបានលោតចេញផុតពីគ្រោះថ្នាក់រត់គេចខ្លួនបាត់ទៅ ។
សូមបញ្ជាក់ផងដែរថា កាលពីវេលាម៉ោងប្រហែល៩យប់ថ្ងៃទី១៤ សីហា មន្ត្រីរដ្ឋបាលព្រៃឈើសង្កាត់កន្ទួត សហការជាមួយយោធាកងពលធំអន្តរាគមន៍លេខ៣ បានធ្វើការឃាត់ចាប់រថយន្តកាមរី៩៥ ចំនួន២គ្រឿង ដឹកឈើគ្រញូងនៅចំណុចមុខទីបញ្ជាការកងពលធំអន្តរាគមន៍លេខ៣ លើដងផ្លូវជាតិលេខ៦២ នេះដែរ ហើយពេលនេះរថយន្តទាំង២គ្រឿង និងឈើគ្រញូងត្រូវបានយកទៅរក្សាទុកនៅក្នុងស្នាក់ការសង្កាត់ព្រៃឈើកន្ទួត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ