រាជធានីភ្នំពេញ ៖ ក្រសួងការងារនិងបណ្តុះបណ្តាលវិជ្ជាជីវៈ កាលពីព្រឹកថ្ងៃទី១៣ ខែសីហា ឆ្នាំ២០១២ បានរៀបចំបើកវគ្គបណ្តុះបណ្តាលមន្ត្រីមកពីអង្គភាពចំណុះឱ្យទីស្តីការក្រសួង និងមន្ទីររាជធានី-ខេត្តចំនួន៩៥នាក់ ដើម្បីបង្កើនសមត្ថភាពលើការងាររដ្ឋបាលហិរញ្ញវត្ថុនិងផែនការ ធ្វើយ៉ាងណាជំរុញទិសដៅក្នុងការពង្រឹងផ្នែកការងារឱ្យកាន់តែមានប្រសិទ្ធភាពថែមទៀត ។ វគ្គបណ្តុះបណ្តាលនេះប្រារព្ធធ្វើឡើងរយៈពេល៥ថ្ងៃ គិតចាប់ពីថ្ងៃទី១៣ ដល់ថ្ងៃ១៧ ខែសីហា ឆ្នាំ២០១២ នៅទីស្តីការក្រសួងការងារនិងបណ្តុះបណ្តាលវិជ្ជាជីវៈ ។
លោកហាច ហ៊ាន ប្រធាននាយកដ្ឋានរដ្ឋបាលនិងបុគ្គលិកបានបញ្ជាក់ថា ការរៀបចំវគ្គបណ្តុះបណ្តាលនេះឡើងគឺបន្ទាប់ពីមានសំណូមពរពីសិក្ខាកាមចូលរួមជាច្រើននាក់កាលពីឆ្នាំមុនដែលស្នើឱ្យមានការរៀបចំវគ្គបណ្តុះបណ្តាលសំដៅធ្វើយ៉ាងណាអភិវឌ្ឍន៍សមត្ថភាពមន្ត្រីនិងថ្នាក់ដឹកនាំតាមបណ្តាអង្គភាពចំណុះក្រសួង ។ វគ្គបណ្តុះបណ្តាលកាលពីឆ្នាំមុនទទួលបានជោគជ័យ ដោយសិក្ខាកាមបានយកចំណេះដឹងទាំងនេះទៅអភិវឌ្ឍន៍និងប្រើប្រាស់ក្នុងជីវភាពប្រចាំថ្ងៃរបស់ពួកគេបានជាប្រយោជន៍ដល់អង្គភាពនិងបុគ្គលខ្លួនផ្ទាល់ ។ លោកបញ្ជាក់ថា នេះគឺជាវគ្គបណ្តុះបណ្តាលលើកទីបួន(ឆ្នាំទី៤)ហើយដែលរៀបចំឡើងដោយក្រសួងការងារនិងបណ្តុះបណ្តាលលើវិជ្ជាជីវៈ និងប្រើប្រាស់ថវិការដ្ឋទាំងស្រុង ។ វគ្គបណ្តុះបណ្តាលលើកនេះមានសិក្ខាកាមសរុបចំនួន៩៥នាក់ ក្នុងនោះសិក្ខាកាមអញ្ជើញមកពីអង្គភាពចំណុះមន្ទីររាជធានីខេត្តចំនួន៥៤នាក់ និងអង្គភាពថ្នាក់កណ្តាលចំនួន៤១នាក់ ហើយបើគិតសរុបទាំងសិក្ខាកាមលើកនេះនិងឆ្នាំកន្លងមកក្រសួងបានបណ្តុះបណ្តាលមន្ត្រីសរុបចំនួន៤១៤នាក់ហើយ ។
លោកប្រធាននាយកដ្ឋានបានថ្លែងបញ្ជាក់បន្ថែមថា «នេះជាទស្សនវិស័យដ៏វែងឆ្ងាយរបស់ថ្នាក់ដឹកនាំដែលចង់ឱ្យមន្ត្រីពោរពេញទៅដោយសមត្ថភាពដើម្បីបំពេញការងារប្រកបទៅដោយប្រសិទ្ធភាព ។ សម្រាប់សិក្ខាកាមថ្ងៃនេះក៏ដូចជាបណ្តាឆ្នាំមុនៗដែរ គឺយើងនឹងមិនពិភាក្សាជាលក្ខណៈទ្រឹស្តីឡើយ ប៉ុន្តែយើងផ្តោតតែទៅលើការងារជាក់ស្តែង រៀនធ្វើដើម្បីយកចំណេះដឹងនេះទៅអនុវត្តនៅអង្គភាពវិញ»។
លោកហេង សួរ អគ្គនាយកនៃអគ្គនាយកដ្ឋានរដ្ឋបាលនិងហិរញ្ញវត្ថុនៃក្រសួងការងារនិងបណ្តុះបណ្តាលវិជ្ជាជីវៈបានឱ្យដឹងថា ការពង្រឹងសមត្ថភាពដល់មន្ត្រីបុគ្គលិកចំណុះឱ្យក្រសួងគឺសំខាន់ណាស់សម្រាប់ការក្លាយខ្លួនជាមន្ត្រីរាជការមួយដែលមានសមត្ថភាពក្នុងការអភិវឌ្ឍប្រទេស ។ ដូច្នេះមន្ត្រីទាំងអស់ត្រូវចូលរួមវគ្គបណ្តុះបណ្តាលដើម្បីកសាងសមត្ថភាពនិងអាចអភិវឌ្ឍន៍ជាមន្ត្រីដ៏ល្អមួយនៅថ្ងៃខាងមុខ ។ លោកបានផ្តាំផ្ញើឱ្យសិក្ខាកាមទាំងអស់ត្រូវចេះអភិវឌ្ឍន៍ខ្លួនឯង ដើម្បីធ្វើយ៉ាងណាឱ្យក្លាយជាអ្នកមានសមត្ថភាពនិងស្នាដៃ ៕
ចែករំលែកព័តមាននេះ