ខេត្តប៉ៃលិន ៖ បុរសចំណាស់ម្នាក់ឈ្មោះម៉ៅ សៅ អាយុ៥៤ឆ្នាំ រស់នៅភូមិតាង៉ែន សង្កាត់ប៉ៃលិន ក្រុងប៉ៃលិន ត្រូវចរន្តអគ្គិសនីឆក់ស្លាប់ភ្លាមៗនៅក្នុងស្រះទឹកក្រោយផ្ទះចម្ងាយប្រហែល២០០ម៉ែត្រ ខណៈដែលបុរសរូបនេះតចរន្តអគ្គិសនីចេញពីផ្ទះខ្លួនដើម្បីភ្ជាប់ទៅនឹងម៉ូទ័រនៅមាត់ស្រះ ពេលតំណខ្សែភ្លើងត្រូវទឹកសើមក៏ឆ្លងចរន្តបណ្តាលឱ្យឆក់ស្លាប់តែម្តង ដែល ហេតុការណ៍នេះបានកើតឡើងនៅវេលាម៉ោង៨និងនាទី១០ព្រឹកថ្ងៃទី១៤ សីហា ។
ប្រភពព័ត៌មានឱ្យដឹងថា នៅមុនពេលកើតហេតុគេឃើញបុរសចំណាស់រូបនេះបានដោតឌុយចូលព្រីភ្លើងនៅក្រោមផ្ទះ បន្ទាប់មកគាត់បានដើរទៅក្រោយផ្ទះ ដើម្បីដោតឌុយតភ្ជាប់កន្ទុយខ្សែភ្លើងទៅនឹងម៉ូទ័រនៅក្បែរមាត់ស្រះ ចម្ងាយប្រហែល២០០ម៉ែត្រពីផ្ទះរបស់គាត់ ។ ពេលកំពុងតែកាន់កន្ទុយខ្សែភ្លើងទៅដោតចូលរន្ធម៉ូទ័រស្រាប់តែតំណខ្សែភ្លើងត្រូវទឹកសើមក៏ឆ្លងចរន្តបណ្តាលឱ្យឆក់គាត់ដួលចូលក្នុងទឹកស្រះស្លាប់តែម្តង ដោយគ្មាននរណាម្នាក់ដឹងនោះទេ លុះប្រពន្ធចាំបាត់ៗប្រហែល២ម៉ោងក៏ដើរទៅរកមើលឃើញម៉ូទ័រកំពុងវិលបូមទឹកហូរចោលពេញវាល ចំណែកប្តីរបស់គាត់ឃើញស្លាប់អណ្តែតក្នុងទឹកស្រះទៅហើយ ។
បុរសរងគ្រោះដែលតភ្លើងនេះគឺដើម្បីដាក់ម៉ូទ័របូមទឹកពីក្នុងស្រះស្រោចដំណាំ និងត្រៀមលាងទ្រុងជ្រូករបស់គាត់ដូចសព្វដង ។
តាមសម្តីស្ត្រីឈ្មោះសួន ភឿន អាយុ៥៧ឆ្នាំ ជាប្រពន្ធបាននិយាយរៀបរាប់ទាំងអួលអាក់ប្រាប់កោះសន្តិភាពឱ្យដឹងថា ជារៀងរាល់ថ្ងៃប្តីរបស់គាត់តែងតែតភ្លើងដាក់ម៉ូទ័រមួយគ្រឿងនៅក្បែរមាត់ស្រះក្រោយផ្ទះដើម្បីបូមទឹកបាញ់ស្រោចដំណាំ និងបាញ់លាងទ្រុងជ្រូកមិនដែលឃើញមានបញ្ហាឆក់ ឬឆ្លងចរន្តភ្លើងអ្វីឡើយ ។
ស្រាប់តែនៅព្រឹកថ្ងៃកើតហេតុវេលាម៉ោង៨និង១០នាទីព្រឹក ប្តីគាត់បានចេញទៅធ្វើការងារខាងលើដូចសព្វដង ខណៈរូបគាត់រង់ចាំមើលផ្លូវប្តីត្រឡប់មកហូបបាយនៅផ្ទះវិញអស់រយៈពេល២ម៉ោងមិនឃើញក៏ដើរទៅហៅប្តី ដោយស្មានថាប្តីគាត់អង្គុយលម្ហែកាយពេលស្រោចដំណាំនិងលាងទ្រុងជ្រូករួច ។ ប៉ុន្តែការប៉ាន់ស្មាននេះគឺខុសស្រឡះ ខណៈពេលគាត់ទៅដល់មាត់ស្រះ ស្រាប់តែឃើញសពប្តីអណ្តែតក្នុងទឹកស្រះបាត់ទៅហើយ ទើបរត់មកដកឌុយព្រីភ្លើងនៅឯផ្ទះវិញ រួចហៅបងប្អូនកូនចៅឱ្យទៅលើកសពប្តីដាក់លើគោកយកទឹកមកលាងជម្រះរួចរៀបចំធ្វើបុណ្យទៅតាមប្រពៃណី ៕
ចែករំលែកព័តមាននេះ