រាជធានីភ្នំពេញ៖ បុរសម្នាក់បានរងរបួសស្មាខាងឆ្វេងដោយគ្រាប់កាំភ្លើងមន្ត្រីយោធាម្នាក់ ដែលបាញ់ផ្ញុចដីហើយគ្រាប់កាំភ្លើងប្លាតត្រូវ ។ ការផ្ទុះអាវុធនេះផ្តើមចេញពីទំនាស់ពាក្យសម្តីគ្នារវាងបុរសរងគ្រោះ និងកូនប្រុសរបស់ខ្មាន់កាំភ្លើងនៅកន្លែងលេងបុកប៊ីយ៉ាស្ថិតក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង១២អធ្រាត្រថ្ងៃទី១៣ សីហា ហើយក្រោយពេលកើតហេតុ បុរសរងគ្រោះត្រូវបានបញ្ជូនទៅសង្គ្រោះនៅមន្ទីរពេទ្យ ។
បុរសដែលរងរបួសឈ្មោះ អាត់ សំ អាយុ៣៣ឆ្នាំ ជាកម្មកររោងចក្រកាត់ដេរ ស្នាក់នៅផ្ទះជួលជិតកន្លែងកើតហេតុ ចំណែកឯមន្ត្រីយោធាដែលបង្កការផ្ទុះអាវុធនេះឈ្មោះ មាស ពៅ អាយុ៤៥ឆ្នាំ ជាម្ចាស់តុបុកប៊ីយ៉ា ។ ក្រោយពេលមានការផ្ទុះអាវុធ សមត្ថកិច្ចកងរាជអាវុធខណ្ឌមានជ័យបានចុះអន្តរាគមន៍ឃាត់ខ្លួនឈ្មោះ មាស ពៅ នាំមកកាន់បញ្ជាការដ្ឋានកងរាជអាវុធហត្ថខណ្ឌទាំងយប់ លុះព្រឹកឡើងថ្ងៃទី១៤ សីហា ក៏បានកសាងសំណុំរឿងបញ្ជូនទៅបញ្ជាការដ្ឋានកងរាជអាវុធហត្ថរាជធានីដើម្បីចាត់ការតាមផ្លូវច្បាប់ ។
តាមប្រភពព័ត៌មានទាក់ទងនឹងហេតុការណ៍នេះបានឱ្យដឹងថា មុនពេលមានស្នូរផ្ទុះអាវុធកើតឡើង កូនប្រុសរបស់ឈ្មោះ មាស ពៅ ដែលជាម្ចាស់តុប៊ីយ៉ាបានលេងបុកប៊ីយ៉ាជាមួយគ្នីគ្នាផ្សេងទៀត ហើយឈ្មោះ អាត់ សំ បានឈរមើលគេលេង និងបាននិយាយភ្នាល់គ្នាជាមួយកូនប្រុសរបស់ឈ្មោះ មាស ពៅ ថាបើបុកមួយគ្រាប់នេះចូលខ្លួនដាក់ពីរពាន់រៀល ឬដប់ស៊ីប្រាំ ។ ពេលនោះឈ្មោះ អាត់ សំ បានដកលុយពីហោប៉ៅខោចំនួនពីរពាន់រៀលដាក់លើតុប៊ីយ៉ាជាសញ្ញាថាខ្លួនបានភ្នាល់ដាក់លុយពិតប្រាកដមែន បន្ទាប់មកដោយសារកូនប្រុសរបស់ឈ្មោះ មាស ពៅ បុកអត់ចូលរន្ធ ឈ្មោះ អាត់ សំ ក៏បានទារលុយពីកូនប្រុសរបស់ឈ្មោះ មាស ពៅ ។
ប្រភពព័ត៌មានឱ្យដឹងទៀតថា ផ្តើមចេញពីបញ្ហានេះក៏កើតមានទំនាស់ពាក្យសម្តីគ្នា ឯឈ្មោះ មាស ពៅ ជាឪពុកឮកូនទាស់គ្នាក៏ចេញមកសួរនាំហើយទាស់ពាក្យសម្តីគ្នារហូតឈ្មោះ មាស ពៅ ទាញកាំភ្លើងខ្លីម៉ាករូឡូ បាញ់ផ្ញុចដីមួយគ្រាប់គំរាមឈ្មោះ អាត់ សំ ។ ការបាញ់នេះបណ្តាលឱ្យគ្រាប់កាំភ្លើងប្លាតទៅចំស្មាឈ្មោះ អាត់ សំ បៀមគ្រាប់ហើយត្រូវបានបញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត ៕
ចែករំលែកព័តមាននេះ