ខេត្តស្ទឹងត្រែង ៖ កាលពីព្រឹកថ្ងៃទី១៤ សីហា នៅព្រលានយន្តហោះខេត្តមានរៀបចំពិធីធ្វើបទបង្ហាញ និងកម្ទេចគ្រាប់មិនទាន់ផ្ទុះប្រមាណជាងមួយពាន់គ្រាប់ដែលរុករកឃើញដោយកងកម្លាំងនៃមជ្ឈមណ្ឌលជាតិគ្រប់គ្រងរក្សាសន្តិភាពបោសសម្អាតមីន និងកាកសំណល់សម័យសង្គ្រាមនៅការដ្ឋានសង្កាត់ស្រះឫស្សី ដោយសហការជាមួយកងកម្លាំងយោធភូមិភាគទី១ ។ ពិធីធ្វើបទបង្ហាញ និងកម្ទេចគ្រាប់មិនទាន់ផ្ទុះនេះមានការចូលរួមពីលោក ប្រាក់ សុខុន រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានអាជ្ញាធរមីនកម្ពុជា និងលោក ម៉ៅ ធនិន អភិបាលរងខេត្ត ។
មន្ត្រីមជ្ឈមណ្ឌលជាតិគ្រប់គ្រងរក្សាសន្តិភាពបោសសម្អាតមីន និងកាកសំណល់ពីសម័យសង្គ្រាមបានថ្លែងថា ក្នុងកិច្ចប្រតិបត្តិការរុករកគ្រាប់យុទ្ធភណ្ឌមិនទាន់ផ្ទុះដែលនៅេសសសល់ពីសម័យសង្គ្រាមនោះ កងកម្លាំងរបស់យើងបានបើកប្រតិបត្តិការនៅខេត្តភូមិភាគឦសានចំនួន៣ក្នុងរយៈពេល៦ខែគឺខេត្តស្ទឹងត្រែង ខេត្តរតនគិរី និងខេត្តមណ្ឌលគិរី ។ ក្នុងរយៈពេលនេះកងកម្លាំងរបស់យើងបានរាវរកឃើញគ្រាប់មិនទាន់ផ្ទុះ៨ប្រភេទមានចំនួន១១៣១គ្រាប់ សុទ្ធសឹងជាគ្រាប់ដែលងាយបង្កគ្រោះថ្នាក់បំផុតនិងសេសសល់តាំងពីសម័យសង្គ្រាមក្នុងទសវត្សឆ្នាំ៧០។ចំពោះការធ្វើបទបង្ហាញនិងកម្ទេចចោលនាព្រឹកនេះមានគ្រាប់គ្រប់ប្រភេទចំនួន១១៣១គ្រាប់ ។
លោក ម៉ៅ ធនិន អភិបាលរងខេត្តបានថ្លែងអំណរគុណអាជ្ញាធរមីនកម្ពុជា ដែលបានរៀបចំកម្លាំងបោសសម្អាតមីនក្នុងខេត្តស្ទឹងត្រែងទាំងមូលជាការរួមចំណែកជួយស្រោចស្រង់ឱ្យផ្ទៃដីនៃខេត្តស្ទឹងត្រែងមានសុវត្ថិភាពដល់ប្រជាពលរដ្ឋ ។ លោក ប្រាក់ សុខុុន បានថ្លែងថា លោកមានការត្រេកអរដែលកងកម្លាំងរបស់លោកមានការសាមគ្គីគ្នាក្នុងការបោសសម្អាតមីននិងគ្រាប់មិនទាន់ផ្ទុះដើម្បីរំដោះផ្ទៃដីជូនប្រជាពលរដ្ឋបានធ្វើកសិកម្ម និងជួយកាត់បន្ថយអត្រាគ្រោះថ្នាក់ដោយសារគ្រាប់មិនទាន់ផ្ទុះនិងគ្រាប់មីន ព្រមទាំងជួយកាត់បន្ថយភាពក្រីក្ររបស់ប្រជាពលរដ្ឋក្នុងខេត្តស្ទឹងត្រែងក៏ដូចជាខេត្តដទៃទៀត ។
ទន្ទឹមនឹងនេះ លោកបានក្រើនរំលឹកដល់ប្រជាពលរដ្ឋក្នុងខេត្តស្ទឹងត្រែងឱ្យយល់ពីគោលការណ៍របស់រដ្ឋាភិបាលក្នុងការចាត់តាំងឱ្យក្រុមនិស្សិតស្ម័គ្រចិត្តចុះវាស់ដីជូនប្រជាពលរដ្ឋផងដែរ ៕
ចែករំលែកព័តមាននេះ