ខេត្តប៉ៃលិន ៖ នៅទីបញ្ជាការតំបន់ប្រតិបត្តិការសឹករងខេត្ត ព្រឹកថ្ងៃទី១៤ សីហា ២០១២ មានបើកវគ្គហ្វឹកហ្វឺនដល់នាយទាហាន នាយទាហានរង ពលទាហានចំនួន៦៩នាក់ក្រោមអធិបតីភាព លោកអីុ ឈាន ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអភិបាលខេត្ត ព្រមទាំងមានការចូលរួមពីមន្ត្រីរាជការជុំវិញខេត្តផងដែរ ។
លោកព្រហ្ម ប៉ាត់ មេបញ្ជាការតំបន់ប្រតិបត្តិការសឹករងខេត្ត បានមានប្រសាសន៍ថា វគ្គហ្វឹកហ្វឺននេះអនុវត្តឡើងតាមផែនការរបស់ថ្នាក់លើស្តីពីការពង្រឹងកងកម្លាំងប្រដាប់អាវុធ ដើម្បីត្រៀមប្រយុទ្ធជាស្រេច និងអនុវត្តគោលដៅជាយុទ្ធសាស្ត្រយកប្រៀបខ្លាំង និងប្រៀបឈ្នះសម្រាប់ប្រជាជាតិកម្ពុជាទាំងមូល ។ លោកបន្តទៀតថា នៅទីបញ្ជាការតំបន់ប្រតិបត្តិការសឹករងខេត្តបានសាងសង់អគារមួយខ្នងសម្រាប់ធ្វើសាលប្រជុំ តែពេលនេះត្រូបានប្តូរមកជាអគារទីបញ្ជាការវិញ ដោយអគារនេះទំហំ៨គុណ៣២ម៉ែត្រ លទ្ធផលសម្រេចបានទើបតែ៥០% ប៉ុណ្ណោះ ដែលបច្ចុប្បន្ននេះកងឯកភាពពុំមានលទ្ធភាពដំណើរការសាងសង់បន្តទៀតបាននោះទេ ។
លោកមេបញ្ជាការក៏បានសំណូមពរដល់លោកអភិបាលខេត្ត សូមជួយជ្រោមជ្រែង និងបំផុសស្មារតីសប្បុរសជននានាទូទាំងខេត្ត ទោះជាសម្ភារ ឬជាថវិកាក្តី មេត្តាបន្តជួយសាងសង់អគារទីបញ្ជាការនេះឱ្យបានចប់សព្វគ្រប់នៅចុងឆ្នាំនេះជាស្ថាពរផង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ