រាជធានីភ្នំពេញ ៖ លោក កែប ជុតិមាអភិបាលរាជធានីភ្នំពេញ បានប្រគល់រថយន្តចំនួន១១គ្រឿង ក្នុងនោះ១០គ្រឿងជារថយន្តសម្រាប់នគរបាលចុះបម្រើការងារតាមមូលដ្ឋាន និងគោលដៅនានា និង ១គ្រឿងទៀតជារថយន្តសម្រាប់ដឹកអ្នកទោស ដល់នគរបាលរាជធានីភ្នំពេញសម្រាប់ការពង្រឹងសន្តិសុខ និងសណ្តាប់ធ្នាប់ក្នុងនយោបាយភូមិ-សង្កាត់មានសុវត្ថិភាពនៅរាជធានីភ្នំពេញឲ្យកាន់តែប្រសើរឡើង ។ ការប្រគល់រថយន្តនេះបានធ្វើឡើង នាព្រឹកថ្ងៃទី១៤សីហា នៅសាលារាជធានីភ្នំពេញ បន្ទាប់ពីកម្មវិធីបូកសរុបការងារអនុវត្តន៍គោលនយោបាយភូមិ-សង្កាត់មានសុវត្ថិភាពនៅរាជធានីភ្នំពេញក្នុងរយៈពេល៦ខែដើមឆ្នាំ២០១២រួចមក ។
គោលនយោបាយភូមិ-សង្កាត់មានសុវត្ថិភាពនេះ គឺជាការងារដ៏សំខាន់មួយរបស់សាលារាជធានីភ្នំពេញ ដែលជះឥទ្ធិពលជាវិជ្ជមានដល់សន្តិសុខសណ្តាប់ធ្នាប់សង្គមក្នុងរាជធានី រួមចំណែកកាត់បន្ថយការព្រួយបារម្ភរបស់ប្រជាពលរដ្ឋ និងបង្កភាពអនុគ្រោះដល់ការអភិវឌ្ឍរាជធានីភ្នំពេញ ។ លោកឧត្តមសេនីយ៍ត្រីទូច ណារ៉ុថ ស្នងការនគរបាលរាជធានីភ្នំពេញ បានបង្ហាញឲ្យឃើញពីសភាពការណ៍នៃការបង្ក្រាបបទល្មើសក្នុងឆមាសទី១ឆ្នាំ២០១២ ជារួមកើតមានឡើងចំនួន២៦១លើក បើប្រៀបធៀបទៅនឹងឆ្នាំ២០១១ក្នុងរយៈពេលដូចគ្នាគឺថយចុះ២៨លើក ។ ដោយឡែកបទល្មើសឧក្រិដ្ឋកើតឡើង៨៦លើក គឺកើនឡើង១៤លើកធៀបនឹងឆ្នាំកន្លងទៅ ។
ក្នុងចំណោមបទល្មើសខាងលើសមត្ថកិច្ចបង្រ្កាបបាន២០៩ករណី ឃាត់ខ្លូនជនសង្ស័យបាន៣៣៤នាក់ ។ កិច្ចប្រជុំក៏បានចាប់អារម្មណ៍ទៅលើជនសង្ស័យដែលមានដីកាចាប់ខ្លួនជាង៤.០០០នាក់នៅទូទាំងប្រទេស និងមុខសញ្ញាទើបចេញពីពន្ធនាគារ ការប៉ុនប៉ងសាកល្បងយករាជធានីភ្នំពេញធ្វើជាកន្លែងផលិតគ្រឿងញៀនដោយពួកឧក្រិដ្ឋជនធំៗត្រូវបានសមត្ថកិច្ចយើងបង្រ្កាបបានជាបន្តបន្ទាប់ ។ ទោះបីជាយ៉ាងណា សមត្ថកិច្ចយើងនៅមានចន្លោះប្រហោងដោយសារការមិនទាន់យល់ និងស្គាល់ឲ្យបានច្បាស់ពីវត្ថុធាតុដើមដែលយកមកផលិតគ្រឿងញៀននៅឡើយ។ លោកស្នងការ ក៏បានបង្ហាញពីរូបភាពអត្តសញ្ញាណប័ណ្ណគំរូថ្មីដែលក្រសួងមហាផ្ទៃប្រកាសឲ្យប្រើស្របតាមស្តង់ដាអន្តរជាតិហើយដែលមន្រ្តីជំនាញកំពុងផ្តល់ជូនប្រជាពលរដ្ឋតាមបណ្តាខណ្ឌនានាក្នុងរាជធានីភ្នំពេញ ជាការផ្តល់ដោយឥតគិតថ្លៃសម្រាប់អ្នកមានសញ្ជាតិខ្មែរ និងមានអាសយដ្ឋានអចិន្រៃ្តយ៍ ។
នៅក្នុងឱកាសនោះ លោកកែប ជុតិមា មានប្រសាសន៍ថា ក្នុងតួនាទីជាអាជ្ញាធរដែនដី ការធ្វើការងាររដ្ឋបាលជារឿងសំខាន់ណាស់ដូចជា ការពង្រឹងសន្តិសុខ សណ្តាប់ធា្នប់ ការទប់ស្កាត់បទល្មើសគ្រឿងញៀន ការពិនិត្យ និងចុះបញ្ជីឈ្មោះបោះឆ្នោតជាដើម ។ លោកកែប ជុតិមា បានញ្ជាក់ថា ល្មមដល់ពេលដែលត្រូវសុំគោលការណ៍ពីរាជរដ្ឋាភិបាលដើម្បីត្រួតពិនិត្យអ្នកស្នាក់នៅមិនស្របច្បាប់ក្នុងរាជធានីភ្នំពេញ ព្រោះអ្នកខ្លះមកស្នាក់នៅគ្មានលិខិតស្នាមអ្វីទាំងអស់ ហើយបើយើងធ្វេសប្រហែស យើងជាអ្នកទទួលទោស ។ លោកអភិបាលរាជធានីភ្នំពេញបន្ថែមថា សូមចាំថា ពូកអ្នកប្រឆាំង និងពួកអគតិនៅតែព្យាយាមរារាំងដំណើរការអភិវឌ្ឍន៍របស់រាជរដ្ឋាភិបាល ដូច្នេះយើងត្រូវរៀបចំផែនការឲ្យបានច្បាស់លាស់ក្នុងការការពារមូលដ្ឋាន និងរក្សាសន្តិសុខ សុវត្ថិភាពក្នុងទីក្រុងរបស់យើង ៕
ចែករំលែកព័តមាននេះ