ខេត្តស្វាយរៀង ៖ កាលពីថ្ងៃទី១៤ សីហា វេលាម៉ោង១០ព្រឹក លោកវ៉ាន់ ប៊ុនធឿន តំណាងកោះសន្តិភាពបាននាំអំណោយសប្បុរសជនមួយឈុតទៀតទៅប្រគល់ឱ្យក្មេងស្រីកំព្រា៤នាក់បងប្អូននៅភូមិបាវិតកណ្តាល សង្កាត់បាវិត ក្រុងបាវិត ដែលឪពុកម្តាយស្លាប់ចោលអស់ មករស់នៅជាមួយម្តាយឪពុកធំជីដូនមួយ ហើយចង់រកម្តាយឪពុកធម៌ចិញ្ចឹម ដើម្បីបានចូលរៀនសូត្រនឹងគេ ។
ក្មេងស្រីកំព្រាទាំង៤នាក់បងប្អូននោះ ១-ឈ្មោះជា ថារី អាយុ១០ឆ្នាំ រៀនថ្នាក់ទី៣ ២-ឈ្មោះជា រតនា អាយុ៨ឆ្នាំ រៀនថ្នាក់ទី១ ៣-ឈ្មោះជា រតនៈ អាយុ៧ឆ្នាំ រៀនថ្នាក់ទី១ និង៤-ឈ្មោះជា ទ្រី អាយុ៥ឆ្នាំ មិនទាន់ចូលរៀនទេ ។ ពួកគេមានឪពុកឈ្មោះសុខ តាយ អាយុ៥៤ឆ្នាំ ស្លាប់នៅខែកុម្ភៈ ឆ្នាំ២០១២ ម្តាយឈ្មោះ ញូង សុខជា អាយុ៣២ឆ្នាំ ស្លាប់នៅថ្ងៃទី១៥ មេសា ឆ្នាំ២០១២ វេលាម៉ោង៦ល្ងាច ដោយសាររំលូតកូន ។ បច្ចុប្បន្នក្មេងស្រីទាំង៤នាក់ បានមករស់នៅជាមួយឪពុកធំជីដូនមួយឈ្មោះឆេង សាត អាយុ៤៥ឆ្នាំ និងម្តាយធំជីដូនមួយឈ្មោះតាំង ឡង អាយុ៤៤ឆ្នាំ នៅភូមិបាវិតកណ្តាល សង្កាត់បាវិត ។ កុមារីទាំង៤នាក់មានចិត្តត្រេកអរយ៉ាងខ្លាំង ពេលទទួលបានការអាណិតអាសូរពីសប្បុរសជនដែលជួយឧបត្ថម្ភប្រាក់ជាបន្តបន្ទាប់ ។ ពួកគេបានឱ្យម្តាយធំទិញសម្លៀកបំពាក់ និងសម្ភារសិក្សាសម្រាប់ត្រៀមចូលរៀននៅសាលាបឋមសិក្សាក្រុងបាវិត ។ កុមារីទាំង៤នាក់បងប្អូនបានលើកដៃសំពះសម្តែងការដឹងគុណក្នុងពេលដែលឪពុកម្តាយធំពួកគេបានជូនពរដល់សប្បុរសជនទាំងអស់ឱ្យជួបតែពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
ប្រាក់អំណោយតាមរយៈកោះសន្តិភាព ដែលយកទៅប្រគល់ជូននេះ គឺបានទទួលពី ១-លោកលី គឹមសី និងលោកស្រី ១០ម៉ឺនរៀល ២-កុមារីលី គឹមទូ ៥១.៥០០រៀល ៣-កុមារីលី សុជាតិតា ២ម៉ឺនរៀល ៤-កុមារីពុទ្ធិនី ៥០ដុល្លារ ៥-លោកតែ សុខឡុង និងភរិយា ព្រមទាំងបុត្រ២០ម៉ឺនរៀល និង៦-លោកគាក សុរិយា ៤ម៉ឺនរៀល ។ ជាមួយនេះកោះសន្តិភាពសង្ឃឹមថា អង្គការនានានឹងជួយឧបត្ថម្ភផ្នែកមនុស្សធម៌ដល់កុមារីទាំង៤នាក់ ដែលស្រេកឃ្លានការរៀនសូត្រនេះមិនខានឡើយ ៕
ចែករំលែកព័តមាននេះ