រាជធានីភ្នំពេញ ៖ កម្មវិធីប្រឡងជ្រើសរើសវគ្គពាក់កណ្តាលផ្តាច់ព្រ័ត្រក្នុងប្រទេសកម្ពុជា លើកទី៤សម្រាប់មហោស្រពវីដេអូ និងខ្សែភាពយន្តកុមារអន្តរជាតិអាសីុ នឹងប្រារព្ធធ្វើឡើងនៅថ្ងៃព្រហស្បតិ៍ ទី១៦ សីហា ឆ្នាំ២០១២ វេលាម៉ោង៩ព្រឹក ក្នុងសាលអង្គរគីហ្ស៊ុណានៃមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC)។
នេះបើតាមសេចក្តីប្រកាសរបស់ស្ថានទូតជប៉ុនប្រចាំនៅកម្ពុជា កាលពីថ្ងៃទី១៤ សីហា ។ កម្មវិធីប្រឡងជ្រើសរើសវគ្គពាក់កណ្តាលផ្តាច់់ព្រ័ត្រក្នុងប្រទេសកម្ពុជានេះ រៀបចំឡើងដោយស្ថានទូតជប៉ុនប្រចាំព្រះរាជាណាចក្រកម្ពុជា រួមសហការជាមួយក្រសួងអប់រំ យុវជន និងកីឡា និងមជ្ឈមណ្ឌលសហប្រតិបត្តិការកម្ពុជា-ជប៉ុន ក្នុងគោលបំណងបង្កើនការយល់ដឹងពីគ្នាទៅវិញទៅមក ក្នុងចំណោមសិស្សានុសិស្សនៃតំបន់អាស៊ី ។
ប្រធានបទនៃខ្សែវីដេអូ និងភាពយន្តនេះ មានចំណងជើងថា «អត្ថន័យនៃជីវិត»។ មានខ្សែភាពយន្តខ្លីៗរយៈពេល៣នាទីចំនួន៣៦រឿង ត្រូវបានចូលរួមប្រកួតប្រជែងដោយសិស្សានុសិស្សពីវិទ្យាល័យចំនួន៨នៅក្នុង និងជំុវិញរាជធានីភ្នំពេញ ដែលក្នុងនោះខ្សែភាពយន្តចំនួន១៦រឿងត្រូវបានជ្រើសរើសដើម្បីបង្ហាញជូននៅក្នុងកម្មវិធីប្រឡងជ្រើសរើសវគ្គដំបូងនៅក្នុងប្រទេសនៅថ្ងៃទី១៦ សីហា ។
សិស្សានុសិស្សវិទ្យាល័យចំនួន៩រូប ដែលបានទទួលជ័យលាភីពីក្រុមចំនួន៣ក្នុងកម្មវិធីប្រឡងជ្រើសរើសនេះ នឹងត្រូវបានអញ្ជើញទៅប្រទេសជប៉ុន ដោយរដ្ឋាភិបាលជប៉ុនក្នុងអំឡុងខែវិច្ឆិកា ដើម្បីចូលរួមនៅក្នុងកម្មវិធីប្រឡងជ្រើសរើសវគ្គផ្តាច់ព្រ័ត្រនៃមហោស្រពនោះ ដែលនឹងប្រារព្ធឡើងនៅក្នុងទីក្រុងមីណាមិអាវ៉ាជី ប្រទេសជប៉ុន នៅថ្ងៃទី២៤ វិច្ឆិកា ។
សិស្សានុសិស្សវិទ្យាល័យនៃប្រទេសឡាវ មីយ៉ាន់ម៉ា ថៃ វៀតណាម ចិន ចិនតៃវ៉ាន់ សាធារណរដ្ឋកូរ៉េ ម៉ាឡេស៊ី ម៉ុងហ្គោលី និងប្រទេសជប៉ុន ក៏ត្រូវបានអញ្ជើញចូលរួមនៅក្នុងមហោស្រពនេះផងដែរ ។ក្នុងកម្មវិធីប្រឡងវគ្គពាក់កណ្តាលផ្តាច់ព្រ័ត្រនៅរាជធានីភ្នំពេញនោះ ស្ថានទូតជប៉ុនប្រចាំនៅកម្ពុជា អំពាវនាវឱ្យអ្នកយកព័ត៌មានចូលរួមយកព័ត៌មានផ្សព្វផ្សាយផងដែរ ៕
ចែករំលែកព័តមាននេះ