កីឡាករជំនាញខាងជិះឡើងភ្នំនិងសាកល្បងពេលវេលារបស់អេស្ប៉ាញ Luis Leon Sanchez បានសម្តែងនូវក្តីរីករាយជាខ្លាំងបន្ទាប់ពីរូបគេបានយកឈ្នះជើងឯកប្រណាំងកង់រយៈពេលមួយថ្ងៃ San Sebastianជាលើកទី២កាលពីថ្ងៃអង្គារទី១៤ខែសីហាកន្លងមកនេះ។ ការប្រណាំងត្រូវបានបញ្ចប់នៅទីក្រុងSan Sebastianប្រទេសអេស្ប៉ាញ ។
Sanchezដែលជាអ្នកជិះកង់ឱ្យក្រុមRabobank Cycling Teamបានយកឈ្នះការប្រណាំងដែលមានចម្ងាយផ្លូវ២៣៤គីឡូម៉ែត្រជុំវិញទីក្រុងSan Sebastian។ គេបានឆ្លងកាត់គំនូសខ្សែព្រ័ត្រក្នុងថិរវេលា៥ម៉ោង៥៥នាទីនិង៣៤វិនាទីយកឈ្នះកីឡាករអូស្ត្រាលី Simon Gerransជិះឱ្យក្រុម Orica GreenEdge Cycling Team និងបានយកឈ្នះកីឡាករបែលហ្ស៊ិក Gianni Meersmanជិះឱ្យក្រុម Lotto Belisol Teamដែលទាំង២នាក់បានប្រើថិរវេលាច្រើនជាង៧វិនាទីដូចគ្នា។
ថ្លែងបន្ទាប់ពីទទួលបានជ័យជម្នះSanchezបានបញ្ជាក់ថា៖«ខ្ញុំចេះតែធាក់កង់ទៅមុខ ខណៈដែលកំពុងនាំមុខដាច់តែឯង។ សម្រាប់ខ្ញុំ នេះជាជ័យជម្នះដ៏ធំធេងបំផុត។ ការដណ្តើមបានជ័យជម្នះកម្មវិធីនេះជាលើកទី២គឺពិតជាអស្ចារ្យខ្លាំងណាស់។ តែយ៉ាងណាខ្ញុំពិតជាសំណាងដែលបានគេចផុតពីការដួល »។ Sanchezបានបំបែកខ្លួនពីហ្វូងកីឡាករទាំងឡាយនិងចាប់ផ្តើមសម្រុកទៅមុខក្នុងខណៈដែលការប្រណាំងនៅសល់ចម្ងាយផ្លូវប្រហែលជា ១០គីឡូម៉ែត្រ។
ម្ចាស់ជើងឯកកម្មវិធីកាលពីឆ្នាំ២០១០រូបនេះបានជិះកង់ឆ្លងកាត់គំនូសព្រ័ត្រតែម្នាក់ឯង។ បន្ទាប់មកទើបមានកីឡាករ៤-៥រូបមកដល់បន្តបន្ទាប់គ្នា។ ក្រៅពីឈ្នះជើងឯកកម្មវិធីនេះ Sanchezក៏នៅធ្លាប់បានឈ្នះ៤ដំណាក់ក្នុងក្របខណ្ឌ Tour de France ៤ដំណាក់នៅ Paris-Niceនិង Tour Down Underផងដែរ ៕
ចែករំលែកព័តមាននេះ