អតីតម្ចាស់ជើងឯកក្របខណ្ឌធំ Wimbledon នាង ប៉េត្រា គ្វីតូវ៉ាដណ្តើមបានពានជើងឯកវាយកូនបាល់ជាលើកដំបូងរបស់ខ្លួនក្នុងឆ្នាំ ២០១២ បន្ទាប់ពីឈ្នះក្នុងវគ្គផ្តាច់ព្រ័ត្រកម្មវិធី Rogers Cupកាលពីថ្ងៃទី១៤សីហា ។ ការប្រកួតនេះត្រូវបានរៀបចំធ្វើនៅពហុកីឡដ្ឋាន Uniprix Stadiumស្ថិតក្នុងក្រុងម៉ុងរ៉េអាល់ ខេត្តកេបិច ប្រទេសកាណាដា ។
គ្វីតូវ៉ាដណ្តើមបានពានជើងឯកបន្ទាប់ពីបានយកឈ្នះកីឡាការិនីចិនលីណាក្នុងលទ្ធផល៧-៥,២-៦និង៦-៣ដោយបានប្រើអស់ថិរវេលា ៦២នាទី ។ សម្រាប់កីឡាការិនីវ័យ២២ឆ្នាំរូបនេះ វាគឺជាពានលើកទី៨របស់នាងហើយនៅក្នុងអាជីព ។ ដោយឡែកនៅក្នុងឆ្នាំនេះ វាគ្រាន់តែជាលើកទី១ប៉ុណ្ណោះ ។ ឆ្នាំនេះ គ្វីតូវ៉ាបានចូលរួមការប្រកួត៤៥លើក ក្នុងនោះឈ្នះ៣៤និងចាញ់១១លើក។
ថ្លែងបន្ទាប់ពីបញ្ចប់ការប្រកួត នាងបានបញ្ជាក់ថា៖«នាងលីណាទទួលបានសឺវីសបានល្អណាស់ជាពិសេសក្នុងសិតទី២ ។ តែខ្ញុំដឹងថា ខ្ញុំនៅតែមានឱកាសឈ្នះ »។ សម្រាប់ការប្រកួតនៅអាមេរិកខាងជើងលើកនេះ នាងបានបញ្ជាក់ថា ខ្លួនបានជួបនឹងបញ្ហាសុខភាពខ្លះៗដែរ តែបានព្យាយាមជម្នះរាល់ការបារម្ភទាំងនោះ ។ នាងបានបន្តថា ៖«ប្រហែលជាម៉ុងរ៉េអាល់ជាកន្លែងល្អមួយសម្រាប់ខ្ញុំ »។
ឯនាងលីណាបានថ្លែងថា៖«ធម្មតាទេ កីឡាវាយកូនបាល់តែងតែដូច្នេះឯង ។ នាងគ្វីតូវ៉ាវាយកូនបាល់បានធ្ងន់និងចំៗគោលដៅ ហើយខ្ញុំត្រូវបង្ខំចិត្តធ្វើជាអ្នកការពារ ។ វាមិនដូចជាការប្រកួត២លើកចុងរបស់ខ្ញុំនោះទេ ។ លើកនេះ ខ្ញុំការពារច្រើនជាងការវាយលុកគឺ៧០ភាគរយ»។ សូមបញ្ជាក់ថា កម្មវិធីប្រកួតនេះមានទឹកប្រាក់រង្វាន់សរុប ២លាននិង ១៦៨ពាន់ ៤រយដុល្លារអាមេរិក ។ ដោយឡែក គ្វីតូវ៉ាដែលជាម្ចាស់ជើងឯក ទទួលបានទឹកប្រាក់ ៣៨៥ពាន់ដុល្លារខណៈនាងលីណាទទួលបាន ១៩៣ពាន់ដុល្លារ៕
ចែករំលែកព័តមាននេះ