ខេត្តកណ្តាល៖ រោងចក្រចំហុយថ្នាំជក់ដែលមានទីតាំងនៅភូមិតាខ្មៅ សង្កាត់តាខ្មៅ ក្រុងតាខ្មៅ បច្ចុប្បន្នកំពុងដំណើរការសង្វាក់ផលិតកម្មរបស់ខ្លួនយ៉ាងសកម្ម តែបញ្ហាដែលកំពុងកើតឡើងនោះគឺធ្វើឱ្យមានផលប៉ះពាល់យ៉ាងខ្លាំងដល់ផ្លូវដង្ហើមរបស់ប្រជា ពលរដ្ឋរស់នៅក្បែរខាង នេះបើតាមការអះអាងរបស់ប្រជាពលរដ្ឋ ។
ប្រជាពលរដ្ឋដែលរងផលប៉ះពាល់ដោយក្លិនថ្នាំជក់និយាយថា រោងចក្រចំហុយថ្នាំជក់ខាងលើនេះបានដំណើរការផលិតកម្មរបស់ខ្លួនជាយូរឆ្នាំមកហើយ និងមានក្លិនថ្នាំជក់ភាយចេញមកក្រៅធ្វើឱ្យពួកគាត់រស់នៅក្បែរនោះជួបផលប៉ះពាល់ខាងផ្លូវដង្ហើមយ៉ាងធ្ងន់ធ្ងរ ។ ដោយសារតែផលប៉ះពាល់កាន់តែខ្លាំងឡើង ពួកគាត់ដែលរស់នៅក្បែររោងចក្រនោះមានជាង៦០គ្រួសារ ក្នុងភូមិតា ខ្មៅ និងភូមិព្រែកសំរោង សង្កាត់តាខ្មៅ បាននាំគ្នាផ្តិតមេដៃធ្វើពាក្យបណ្តឹងដាក់ជូនអាជ្ញាធរសង្កាត់ និងក្រុង ឱ្យជួយរកដំណោះស្រាយសុំឱ្យដោះដូរទីតាំងរោងចក្រចំហុយថ្នាំជក់ចេញពីកន្លែងចាស់នេះ បើខាងក្រុមហ៊ុនមិនអាចទប់ស្កាត់កុំឱ្យមានផលប៉ះពាល់មកលើផ្លូវដង្ហើមរបស់ប្រជាពលរដ្ឋបានទេនោះ។
ប្រជាពលរដ្ឋបានបន្តទៀតថា សព្វថ្ងៃនេះពួកគាត់នៅក្បែររោងចក្រចំហុយថ្នាំជក់នេះ ពិបាករស់នៅខ្លាំងណាស់ ដោយសារតែក្លិនថ្នាំជក់ជះចេញមកខាងក្រៅឆួលពិបាកដកដង្ហើម ធ្វើឱ្យប៉ះពាល់យ៉ាងខ្លាំងដល់ផ្លូវដង្ហើម និងសុខភាពរស់នៅប្រចាំថ្ងៃ រួមទាំងអ្នកធ្វើដំណើរតាមផ្លូវឆ្លងកាត់ពីមុខនិងពីក្រោយរោងចក្រផង ។ ក្រោយពីពួកគាត់ជាង៦០នាក់តំណាងឱ្យជាង៦០គ្រួសារផ្តិតមេដៃធ្វើពាក្យបណ្តឹងដាក់ចូល អាជ្ញាធរសង្កាត់រួចមក ថ្មីៗកន្លងមកនេះអាជ្ញាធរបានហៅខាងតំណាងរោងចក្រចំហុយថ្នាំជក់មកជួបជាមួយប្រជាពលរដ្ឋធ្វើការដោះស្រាយគ្នា ដោយមានអាជ្ញាធរសង្កាត់ជាអ្នកធ្វើការសម្របសម្រួល ។ ការដោះស្រាយគ្នានេះ គឺខាងក្រុមហ៊ុនបានសន្យាថា នឹងធ្វើការកែតម្រូវបន្ថែមលើឧបករណ៍មួយចំនួនទៀតដើម្បីទប់ស្កាត់កុំឱ្យមានក្លិនជះចេញមកខាងក្រៅ ។
លោកតុប សំអាត ប្រធានការិយាល័យឧស្សាហកម្មរ៉ែ និងថាមពលក្រុងតាខ្មៅ បានប្រាប់អ្នកសារព័ត៌មានតាមទូរស័ព្ទកាលពីព្រឹកថ្ងៃទី១៣ សីហាថា ពាក្យបណ្តឹងរបស់ប្រជាពលរដ្ឋដែលរងផលប៉ះពាល់ដោយសារក្លិនថ្នាំជក់ភាយចេញពីរោងចក្រចំហុយថ្នាំជក់ នៅសង្កាត់តាខ្មៅ ខាងអាជ្ញាធរសង្កាត់បានធ្វើរបាយការណ៍ផ្ញើជូនមកសាលាក្រុងតាខ្មៅ ហើយខាងការិយាល័យជំនាញលោកបានទទួលហើយ ។លោកនឹងផ្ញើពាក្យបណ្តឹងនេះទៅមន្ទីរឧស្សាហកម្មរ៉ែនិងថាមពលខេត្តនៅពេលដ៏ខ្លីខាងមុខ ដើម្បីរួមគ្នាចុះសិក្សាពិនិត្យមើលពីផលប៉ះពាល់របស់រោងចក្រចំហុយថ្នាំជក់នេះ ៕
ចែករំលែកព័តមាននេះ