ខេត្តបន្ទាយមានជ័យ ៖ នៅសាលប្រជុំបញ្ជាការដ្ឋាននគរបាលវរសេនាតូច ការពារព្រំដែនគោកលេខ៩១១ ក្រុងប៉ោយប៉ែត កាលពីព្រឹកថ្ងៃទី១៣ សីហា ២០១២ មានរៀបចំកម្មវិធីទស្សនកិច្ចសិក្សាស្តីពីការអប់រំសុខភាពប្រយុទ្ធ នឹងជំងឺគ្រុនចាញ់ ក្នុងជួរកម្លាំងនគរបាលជាតិរយៈពេល២ថ្ងៃ គិតចាប់ពីថ្ងៃទី១៣-១៤ សីហា ២០១២ ។
ពិធីនេះរៀបចំដោយនាយកដ្ឋានសុខាភិបាល ក្រសួងមហាផ្ទៃ ឧបត្ថម្ភដោយមូលនិធិសកល។ ក្នុងកម្មវិធីទស្សនកិច្ចសិក្សានេះ មានខេត្តនានាដែលជាខេត្តប្រឈមនឹងជំងឺគ្រុនចាញ់ចំនួន១០នាក់ជាគ្រូបង្គោលមកចូលរួមគឺខេត្តបាត់ដំបង, ពោធិ៍សាត់, សៀមរាប, ឧត្តរមានជ័យ, កោះកុង, រតនគីរី, ស្ទឹងត្រែង, ក្រចេះ, ប៉ៃលិន, ព្រះវិហារ ។ ដោយឡែកខេត្តបន្ទាយមានជ័យ មានកម្លាំងនគរបាលជាគ្រូបង្គោលចូលរួមមកពីបណ្តាស្រុក-ក្រុងដែលប្រឈមនឹងជំងឺគ្រុនចាញ់ គឺស្រុកភ្នំស្រុក, ថ្មពួក, ម៉ាឡៃ, អូរជ្រៅ, ស្វាយចេក, ក្រុងប៉ោយប៉ែត និងវរសេនាតូចនគរបាលការពារព្រំដែនគោកទាំង៤ គឺ៩១១, ៨៩១, ៨០៧ និង៨១៥ សរុបរួមទាំងអស់មានចំនួន៤២នាក់ ។
លោកវរសេនីយ៍ត្រី ប្រាក់ សារ៉ាត់ មេបញ្ជាការរងនគរបាលការពារព្រំដែនគោកលេខ៩១១ បានធ្វើសេចក្តីរាយការណ៍សង្ខេបទាក់ទងទៅនឹងលក្ខណៈភូមិសាស្ត្រដែលអង្គភាពរបស់ខ្លួនទទួលខុសត្រូវតាមខ្សែបន្ទាត់ព្រំដែន ប្រវែង៤២.៥០០គីឡូម៉ែត្រ លើស្រុកចំនួន២និងក្រុង១ និងបានបញ្ជាក់ជូនអំពីកិច្ចសហប្រតិបត្តិការល្អរវាងអង្គភាពរបស់លោកជាមួយបណ្តាកម្លាំងដែលឈរនៅតាមខ្សែបន្ទាត់ព្រំដែនក្នុងកិច្ចការការពារបូរណភាពទឹកដី និងសន្តិសុខជូនប្រជាពលរដ្ឋដែលរស់នៅតាមខ្សែបន្ទាត់ព្រំដែន ព្រមទាំងបើកវេទិកាផ្សព្វផ្សាយអនុវត្តគោលនយោបាយភូមិ-ឃុំមានសុវត្ថិភាពដល់ប្រជាពលរដ្ឋរួចមក។
លោកស្រីវេជ្ជបណ្ឌិត សុខ សុចិត្រា មន្ត្រីតាមដាននិងវាយតម្លៃមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់បានលើកឡើងអំពីយុទ្ធសាស្រ្តរួមក្នុងការប្រយុទ្ធប្រឆាំងនឹងជំងឺគ្រុនចាញ់ ដោយបញ្ជាក់ថា ដើម្បីកុំឲ្យកើតមានជំងឺគ្រុនចាញ់គឺយើងត្រូវធ្វើការអប់រំប្រជាពលរដ្ឋឲ្យយល់ដឹងពីមូលហេតុដែលបង្កឲ្យមានជំងឺគ្រុនចាញ់តាមសេវាផ្សព្វផ្សាយអប់រំផ្សេងៗ ដូចជាការផ្សព្វផ្សាយតាមទូរទស្សន៍, វិទ្យុ, ព្រឹត្តិបត្រ, បិទរូបភាព ពិសេសទៀតនោះគឺត្រូវចែកមុងជ្រលក់ថ្នាំ, មុងអង្រឹងជ្រលក់ថ្នាំ និងឲ្យគាត់ចេះសំរាកក្នុងមុង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ