រាជធានីភ្នំពេញ ៖ រយៈពេលមួយសប្តាហ៍ប៉ុណ្ណោះ ក្នុងខែសីហានេះ ការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញបានបង្ក្រាបការជួញដូរគ្រឿងញៀនឆ្លងប្រទេសចំនួន៣ករណីជាបន្តបន្ទាប់ និងឃាត់ខ្លួនជនសង្ស័យជាស្ត្រីថៃចំនួន៤នាក់ ព្រមទាំងដកហូតបានគ្រឿងញៀនប្រភេទមេតំហ្វេតាមីន និងម្សៅកូកាអីុនសរុបជាង២០គីឡូក្រាម ដែលពួកគេបម្រុងនាំចេញទៅប្រទេសថៃ ។
កងសន្តិសុខប្រចាំការនៅអាកាសយានដ្ឋានអន្តរជាតិភ្នំពេញបាននិយាយថា នៅល្ងាចថ្ងៃទី១៣ សីហា វេលាម៉ោង៥និង២២នាទី សមត្ថកិច្ចគយប្រចាំការនៅចំណុចច្រកអ្នកដំណើរមកដល់ក្នុងអាកាសយានដ្ឋានអន្តរជាតិភ្នំពេញបានឃាត់ខ្លួនស្ត្រីឈ្មោះ RODSIRI RUNG TIWA អាយុ២៤ឆ្នាំ ជនជាតិថៃ កាន់លិខិតឆ្លងដែន B៦៦៧៧១៦ ធ្វើដំណើរតាមជើងយន្តហោះលេខ MI៦០៨ សិង្ហបុរី-ភ្នំពេញ ។ ក្រោយពីការឆែកឆេរក្នុងវ៉ាលីសរកឃើញម្សៅកូកាអីុនចំនួន១០ដុំ ស្មើនឹងទម្ងន់១២គ.ក្រ៩០២ក្រាម ។
ដោយឡែកនៅថ្ងៃបន្ទាប់វេលាម៉ោង៨និង៤០នាទីព្រឹក គយប្រចាំនៅចំណុចច្រកអ្នកដំណើរមកដល់ក៏បានបង្ក្រាបគ្រឿងញៀនប្រភេទមេតំហ្វេតាមីនចំនួន៣ដុំ ស្មើនឹងទម្ងន់៤.៧៤៧ក្រាម និងឃាត់ខ្លួនស្ត្រីជនជាតិថៃម្នាក់ឈ្មោះ PIW JANSOD UTSANEE អាយុ២០ឆ្នាំ កាន់លិខិតឆ្លងដែនលេខ C៩០៩៩៣៥ ធ្វើដំណើរតាមជើងយន្តហោះ MI៦២២ សិង្ហបុរី-ភ្នំពេញ ។
កាលពីថ្ងៃទី៧ សីហា កន្លងមកនេះដែរ ការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញបានឃាត់ខ្លួនស្ត្រីជនជាតិថៃ២នាក់ បន្ទាប់ពីឆែកឆេររកឃើញម្សៅកូកាអីុន៦ដុំ ស្មើនឹងទម្ងន់៣.៦០៦,៦ក្រាម ដែលលាក់ទុកក្នុងវ៉ាលីស ហើយពួកគេបានធ្វើដំណើរតាមជើងយន្តហោះលេខ MI៦០៨ សិង្ហបុរី-ភ្នំពេញ ។
បច្ចុប្បន្នស្ត្រីថៃទាំង២នាក់ ម្នាក់ឈ្មោះ PHUMDEE VARANGKANA អាយុ២៩ឆ្នាំ និងម្នាក់ទៀតឈ្មោះ TANGBOON KET KARN អាយុ២៩ឆ្នាំ ត្រូវបានតុលាការរាជធានីភ្នំពេញបានចេញដីកាបង្គាប់ឱ្យនគរបាលឃុំខ្លួនបណ្តោះអាសន្ននៅពន្ធនាគារព្រៃសរង់ចាំសវនាការកាត់ទោស ។
គួរកត់សម្គាល់ថា គ្រាន់តែរយៈពេលមួយសប្តាហ៍ ក្នុងខែសីហា ឆ្នាំ២០១២ ប៉ុណ្ណោះ ឧក្រិដ្ឋកម្មជួញដូរគ្រឿងញៀនឆ្លងប្រទេសបានធ្វើការឆ្លងកាត់តាមអាកាសយានដ្ឋានអន្តរជាតិភ្នំពេញជាបន្តបន្ទាប់ចំនួន៣ករណី ក្នុងនោះដកហូតគ្រឿងញៀនប្រភេទមេតំហ្វេតាមីនចំនួន៤,៧៤៧គីឡូក្រាម និងម្សៅកូកាអីុនចំនួន១៦,៥០៨គីឡូក្រាម ឃាត់ខ្លួនជនសង្ស័យជាជនជាតិថៃបាន៤នាក់ សរុបគ្រឿងញៀនជាង២០គីឡូក្រាមត្រូវបានបង្ក្រាប ។ ក៏ប៉ុន្តែរាល់ការប៉ុនប៉ងជួញដូរគ្រឿងញៀននេះមិនអាចឆ្លងផុតពីកណ្តាប់ដៃសមត្ថកិច្ចគយនៃការិយាល័យគយ និងរដ្ឋាករអាកាសយានដ្ឋានអន្តរជាតិភ្នំពេញបានឡើយ ៕
ចែករំលែកព័តមាននេះ