ខេត្តស្ទឹងត្រែង ៖ ព្រឹកថ្ងៃទី១៤ សីហា ២០១២ នៅព្រលានយន្តហោះខេត្ត បានធ្វើបទបង្ហាញ និងកម្ទេចគ្រាប់មិនទាន់ផ្ទុះដែលរុករកឃើញ ដោយកងកម្លាំងនៃមជ្ឈមណ្ឌលជាតិគ្រប់គ្រងរក្សាសន្តិភាពបោសសម្អាតមីន និងកាកសំណល់សម័យសង្រ្គាមការដ្ឋានសង្កាត់ស្រះឫស្សី ខេត្តស្ទឹងត្រែង បានជាង១.០០០គ្រាប់ និងបើកកម្មវិធីកម្ទេចចោលជាមួយកងកម្លាំងយោធភូមិភាគទី១ ដោយមានការចូលរួមពីលោកប្រាក់ សុខុន រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានអាជ្ញាធរមីនកម្ពុជា និងលោកម៉ៅ ធនិន អភិបាលរងខេត្ត។
កងកម្លាំងនៃមជ្ឈមណ្ឌលជាតិគ្រប់គ្រងសន្តិភាពបោសសម្អាតមីន និងកាកសំណល់ពីសម័យសង្គ្រាមបានថ្លែងថា ក្នុងកិច្ចប្រតិបត្តិការរាវរុករកគ្រាប់យុទ្ធភណ្ឌមិនទាន់ផ្ទុះដែលនៅសេសសល់ពីសម័យសង្គ្រាមនោះកងកម្លាំងរបស់យើងបានបើកប្រតិបត្តិការនៅខេត្តចំនួន៣រយៈពេល៦ខែក្នុងភូមិភាគឦសាន ក្នុងនោះមានខេត្តស្ទឹងត្រែង រតនគិរី និងខេត្តមណ្ឌលគិរី។ ក្រោយប្រតិបត្តិការរយៈពេល៦ខែកន្លងទៅកម្លាំងរបស់យើងបានរាវរកឃើញគ្រាប់មិនទាន់ផ្ទុះចំនួន៨ ប្រភេទចំនួន១.១៣១គ្រាប់ សុទ្ធសឹងជាគ្រាប់ងាយនឹងគ្រោះថ្នាក់បំផុតដែលបានសេសសល់តាំងពីសម័យសង្គ្រាមមកម៉្លេះ។
មន្ត្រីដដែលបន្តថា ការធ្វើបទបង្ហាញ និងកម្ទេចចោលនាព្រឹកនេះមានគ្រាប់ Blu42 100mm M79or40mm Mortar81mm Dk82 PG7 Hand Grenade F1 និង Small Armed 47 គ្រាប់ទាំងនេះសរុបមានចំនួន១.១៣១គ្រាប់។លោកម៉ៅ ធនិន បានមានប្រសាសន៍ថ្លែងអំណរគុណចំពោះអាជ្ញាធរកម្ពុជាដែលបានរៀបចំកម្លាំងក្នុងការបោសសម្អាតមីនក្នុងខេត្តស្ទឹងត្រែងទាំងមូលលែងមានគ្រាប់មីន និងមានសុវត្ថិភាពដល់ប្រជាពលរដ្ឋក្នុងខេត្តស្ទឹងត្រែង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ