រាជធានីភ្នំពេញ ៖ ថ្លែងទៅកាន់តំណាងយុវជនគណបក្សប្រជាជនកម្ពុជាជាច្រើននាក់មកពីភូមិ-សង្កាត់ទាំង៦របស់ខណ្ឌសែនសុខ កាលពីរសៀលម៉ោង៣ថ្ងៃទី១២ សីហា ២០១២ អភិបាលខណ្ឌសែនសុខ បានជំរុញឲ្យយុវជនដែលជាសមាជិករបស់គណបក្សប្រជាជនត្រូវចេះពាំនាំសមិទ្ធផលជាច្រើនដែលកសាង និងអភិវឌ្ឍន៍របស់ប្រមុខរាជរដ្ឋាភិបាលដែលដឹកនាំដោយសម្តេចអគ្គមហាសេនាបតីតេជោហ៊ុន សែន ប្រាប់ទៅមហាជនប្រជាពលរដ្ឋជាពិសេសក្នុងស្រទាប់យុវជន។ នេះជាប្រសាសន៍របស់លោកលី សាវេត អភិបាលខណ្ឌសែនសុខ ក្នុងពិធីជួបសំណេះសំណាលជាំមួយតំណាងយុវជននៅស្នាក់ការគណបក្សប្រជាជនសង្កាត់ឃ្មួញ ខណ្ឌសែនសុខ។
លោកលី សាវេត បានមានប្រសាសន៍បន្តថា យុវជនត្រូវមានសុខភាពល្អនិងចំនេះដឹងខ្ពង់ខ្ពស់ ហើយត្រូវជួយផ្សព្វផ្សាយអំពីការអភិវឌ្ឍរបស់សាលារាជធានីភ្នំពេញ ក៏ដូចជាសាលាសង្កាត់ និងសាលាខណ្ឌ ដូចជាផ្លូវថ្នល់ប្រព័ន្ធលូ និងការអភិវឌ្ឍផ្សេងៗសម្រាប់បម្រើជាសាធារណៈទៅប្រជាជន ក៏ដូចជាយុវជនផង។
លោកជា ខេមា អភិបានរងខណ្ឌសែនសុខ តំណាងឲ្យយុវជនគណបក្សប្រជាជនក្នុងខណ្ឌសែនសុខ ក៏បានមានប្រសាសន៍ផងដែរថា កន្លងមកយុវជនគណបក្សប្រជាជនកម្ពុជា ខណ្ឌសែនសុខ បានចូលរួមយុទ្ធនាការបោះឆ្នោតឃុំ-សង្កាត់អាណត្តិទី៣ និងបានចូលរួមបំផុសប្រជាពលរដ្ឋនៅក្នុងភូមិសង្កាត់ឲ្យទៅពិនិត្យឈ្មោះបោះឆ្នោត និងចុះឈ្មោះបោះឆ្នោតផងដែរ៕
ចែករំលែកព័តមាននេះ