រាជធានីភ្នំពេញ ៖ នៅលើសង្វៀនស្ថានីយទូរទស្សន៍ប៉ុស្តិ៍លេខ៣ នាថ្ងៃសៅរ៍ទី១៨ សីហា ខាងមុខនេះ ព្រឹត្តិការណ៍ប្រកួតប្រដាល់ជាលក្ខណៈអន្តរជាតិដណ្តើមខ្សែក្រវាត់ MANSON’S WHISKY ទម្ងន់៦៧គីឡូក្រាមបានដំណើរការក្នុងជុំទី២ជាបន្តទៀតហើយ។
កាលពី២សប្តាហ៍មុនគេបានរកឃើញជើងខ្លាំង២រូបដែលពេលនេះកំពុងរង់ចាំអ្នកឈ្នះ២រូបទៀតដើម្បីឡើងមកប្រកួតនៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រជាបន្តទៀត គឺកីឡាករថៃ PHONG TONG Jetsada និងកីឡាករ ប្រេស៊ីល Adayton ។
ចំណែកឯការប្រកួតលើកនេះក៏ធ្វើដូចលើកមុនៗដែរ គឺកីឡាករទាំង៤រូបត្រូវធ្វើការចាប់គ្រាប់ប៉េងប៉ុងដើម្បីជ្រើសរើសគូប្រកួតភ្លាមៗតែម្តង ។ សម្រាប់កីឡាករដែលត្រូវឡើងសង្វៀនប្រកួតនៅសប្តាហ៍នេះខាងកម្ពុជាមានកីឡាករភេឌី ម៉ឺនសុភា មកពីក្លិបយុវជនអង្គរ និងកីឡាករពេជ្រ សីហា មកពីសមាគមកីឡាប្រដាល់ក្រសួងការពារជាតិ ។ រីឯកីឡាករបរទេសវិញ មានកីឡាករ SEMATA UMA មកពីប្រទេសអ៊ូហ្គង់ដា និងកីឡាករ SHHE JIANKAI មកពីប្រទេសម៉ាឡេស៊ី ។
លោកទី រ៉ាណាត អ្នករៀបចំកម្មវិធីប្រកួតប្រចាំស្ថានីយទូរទស្សន៍ប៉ុស្តិ៍លេខ៣ មិនហា៊នធ្វើការអះអាងថាយ៉ាងណានោះទេ ព្រោះកីឡាករទាំង៤រូបនេះមានចំណុចខ្លាំងរៀងខ្លួន ជាពិសេសកីឡាករបរទេសតែម្តង ព្រោះគេនៅចាំបានថា ការប្រកួតគ្នានៅជុំទី១ កាលពី២សប្តាហ៍មុនកីឡាករកម្ពុជា២រូបសុទ្ធតែត្រូវបានផ្តួលក្រោមកណ្តាប់ដៃកីឡាករបរទេសទាំងអស់ ។ ចំណែកឯការប្រកួតលើកនេះទៀតមិនដឹងថា កីឡាករកម្ពុជាទាំង២រូបនេះមានវាសនាល្អ ឬអាក្រក់នោះទេ គឺមានតែរង់ចាំអ៊ុតមើលលើការប្រកួតថ្ងៃនោះមកដល់សិនប៉ុណ្ណោះ ។
រីឯគូប្រកួតមិត្តភាពវិញ មានកីឡាករនន់ ជំនិត មកពីក្លិបស៊ីម៉ាក់ ជួបប្រកួតជាមួយកីឡាករនួន ភិរក្ស មកពីសមាគមកីឡាប្រដាល់ក្រសួងមហាផ្ទៃ ។ កីឡាករអ៊ុំ ចំរើន មកពីក្លិបតាឡីដំរីមានឫទ្ធិ ជួបប្រកួតជាមួយកីឡាករឱម សំរេច មកពីក្លិបកងទ័ពពិសេសឆត្រយោង៩១១ ។ កីឡាករសេង កំសត់ មកពីក្លិបខេមរិន្ទមានឫទ្ធិ ជួបប្រកួតជាមួយកីឡាករឈាន រស្មី មកពីក្លិបតេជៈខេត្តរតនគិរី៕
ចែករំលែកព័តមាននេះ