រាជធានីភ្នំពេញ ៖ កីឡាករជើងខ្លាំងផ្នែកប៉េតង់ លោកអ៊ុក ជីមី បានបាត់បង់ឱកាសចេញទៅប្រកួតនៅក្រៅស្រុកទាំងស្រុងមកទល់ពេលនេះ មិនត្រឹមតែប៉ុណ្ណោះ ការដែលលោកធ្លាប់ជាប់ជម្រើសជាតិជាជើងខ្លាំងក្នុងស្រុកម្នាក់ក៏ត្រូវរបូតទៅដែរ ។ មូលហេតុដែលខាងសហព័ន្ធបញ្ចប់ការបញ្ជូនលោកឱ្យចេញទៅប្រកួតនៅក្រៅប្រទេសដូចមុន គឺដោយសារតែលោកជួបគ្រោះថ្នាក់បណ្តាលឱ្យខូចភ្នែកខាងស្តាំ ហើយមិនមានប្រាក់២ពាន់ដុល្លារសម្រាប់ដោះដូរកែវភ្នែកសិប្បនិម្មិត ។
បើទោះជាធ្លាក់ខ្លួនពិការភ្នែកម្ខាង ប៉ុន្តែកីឡាករជើងខ្លាំងផ្នែកប៉េតង់រូបនេះ នៅតែរក្សាកេរ្តិ៍ឈ្មោះក្នុងតំណែងជាកីឡាករជម្រើសជាតិនាពេលចុងក្រោយសម្រាប់អ្នកនិយមតាមដាន ។ ទោះជាយ៉ាងណា ក្នុងរយៈពេលជាងមួយឆ្នាំចុងក្រោយនេះ លោកអស់មានឱកាសចេញទៅប្រកួតនៅក្រៅស្រុកដូចមុនទៀតទេ បន្ទាប់ពីលោកធ្លាក់ខ្លួនពិការភ្នែកម្ខាង ផ្ទុយពីលក្ខន្តិកៈដែលកំណត់ជាអន្តរជាតិ ។ លោកអ៊ុក ជីមី បញ្ជាក់ថា ក្នុងអំឡុងឆ្នាំ២០១២ នេះ លោកនៅតែចង់មានឈ្មោះជាកីឡាករប៉េតង់ជម្រើសជាតិដដែល ប៉ុន្តែពេលនេះអត់មានទាំងអស់ ទាំងការប្រកួតនៅក្រៅស្រុក និងនៅក្នុងស្រុក ពោលគឺតាំងពីធ្លាក់ខ្លួនពិការមក អាជីពកីឡារបស់លោកស្ងាត់ឈឹងតែម្តង ។
លោកឮថា ខាងសហព័ន្ធលែងត្រូវការទៀតហើយ ក្រោយពេលលោកអស់លទ្ធភាពព្យាបាលភ្នែក ហើយបណ្តោយឱ្យភ្នែកខាងស្តាំពិការមើលលែងឃើញបែបនេះ ។លោកអ៊ុក ជីមី បាននិយាយដោយអារម្មណ៍សោកស្តាយថា លោកទើបតែបាត់ឱកាសចេញទៅប្រកួតនៅក្រៅប្រទេសក្នុងរយៈពេលជាងមួយឆ្នាំចុងក្រោយនេះប៉ុណ្ណោះ ទោះបីខាងសហព័ន្ធព្យាយាមអន្តរាគមន៍ឱ្យលោកចេញទៅប្រកួតលើឆាកអន្តរជាតិដូចមុនៗក្តី ប៉ុន្តែត្រូវបានគណៈកម្មការនៅក្រៅប្រទេសទាត់ចោល ។ ម្យ៉ាងទៀតស្របពេលដែលកីឡាជនពិការនៅមិនទាន់មានផ្នែកប៉េតង់នេះផង ទើបមិនអាចឱ្យលោកចេញទៅប្រកួតនៅក្រៅប្រទេសបានដូចមុន ។ លោកសោកស្តាយយ៉ាងខ្លាំងដែលជួបនឹងហេតុការណ៍ក្រុមក្មេងស្ទាវដេញវាយគ្នានៅមាត់ច្រកចូលផ្ទះរបស់លោកកាលពីជាងមួយឆ្នាំមុន ហើយពេលលោកជិះម៉ូតូកាត់ចំហេតុការណ៍នោះ ក៏ត្រូវពួកនេះគប់ចំភ្នែកខាងស្តាំរហូតធ្វើឱ្យលោកពិការមិនអាចមើលឃើញរហូតសព្វថ្ងៃ ។
លោកបានទទួលការជួយសង្គ្រោះពីខាងសហព័ន្ធផ្នែកប៉េតង់ និងពីសប្បុរសជនមួយចំនួនដែរ ប៉ុន្តែមកពីទំហំនៃការព្យាបាលកាន់តែរីកធំទៅៗទើបមិនអាចឱ្យលោកបន្តការព្យាបាលឱ្យភ្នែកនេះមើលឃើញដូចដើមវិញបាន ។ ទីបំផុត ដោយលោកអត់មានប្រាក់២ពាន់ដុល្លារដើម្បីដោះដូរកែវភ្នែកសិប្បនិម្មិតផង ទើបលោកនៅតែពិការ ហើយបាត់បង់ឱកាសចេញប្រកួតទាំងនៅក្រៅស្រុក និងក្នុងស្រុករហូតមកទល់ពេលនេះ ។
លោកអ៊ុក ជីមី អះអាងថា សមត្ថភាពផ្នែកកីឡាប៉េតង់លោកស្ទើរតែអាចថាត្រង់ជាងមុនផង ចាប់តាំងពីលោកធ្លាក់ខ្លួនពិការភ្នែកម្ខាងមក។ ទោះជាយ៉ាងណាក៏ដោយ លោកនៅតែមិនអាចរំលេចសំណាង ដើម្បីចេញប្រកួតនៅក្រៅស្រុកដូចមុនទៀតឡើយ ក្នុងពេលកម្ពុជាមិនទាន់មានលទ្ធភាពបង្កើតក្រុមជម្រើសជាតិជនពិការខាងផ្នែកកីឡាប៉េតង់ ដែលជាជំនាញរបស់លោកនោះ ។ យោងតាមការបញ្ជាក់ពីខាងសហព័ន្ធ លោកអ៊ុក ជីមី អាចមានឱកាសចេញទៅក្រៅស្រុកដូចដើម បើលោកមានលទ្ធភាពដោះដូរកែវភ្នែក ឬប្តូរអាជីពពីជម្រើសជាតិផ្នែកកីឡាប៉េតង់ទៅជាជម្រើសជាតិផ្នែកបាល់ទះ ឬកីឡាប្រភេទផ្សេងទៀតសម្រាប់ជនពិការដែលវិញ្ញាសានោះមានការប្រកួតជាអន្តរជាតិ ។
ជាមួយនឹងការយល់ឃើញនេះ កីឡាករអ៊ុក ជីមី វ័យ២៥ឆ្នាំ អះអាងថា នៅមិនទាន់ចង់ប្តូរប្រភេទកីឡានៅឡើយទេ ដោយសារតែលោកថ្នឹកនឹងជំនាញផ្នែកប៉េតង់ជាក្រុម៣ទល់៣នាក់ ច្រើនឆ្នាំមកហើយ ។ ស្របពេលដែលលោកក៏ធ្លាប់ល្បីឈ្មោះជាកីឡាករជម្រើសជាតិផ្នែកប៉េតង់ ដោយមិនមានការប្រែប្រួលទឹកដៃផងនោះ ទើបលោកមិនទាន់គិតរឿងស្វះស្វែងចូលប្រកួតក្នុងនាមជាជនពិការ ដើម្បីទទួលឱកាសចេញទៅក្រៅស្រុកនៅឡើយ ។ លោកអះអាងថា បើកុំតែជួបរឿងអកុសលមួយនេះ ប្រហែលលោកនឹងក្លាយជាបេក្ខជនតែម្នាក់គត់ ដែលមានមុខនៅគ្រប់គម្រោងចាកចេញទៅក្រៅស្រុកដូចគ្រាមុនៗ បន្ទាប់ពីលោកធ្លាប់ទទួលមេដាយប្រាក់ក្នុងកីឡាស៊ីហ្គេមនៅប្រទេសថៃនាឆ្នាំ២០០៧ និងមេដាយសំរឹទ្ធិស៊ីហ្គេមនៅវៀតណាមក្នុងឆ្នាំ២០០៩ រួចមក ។
លោកអ៊ុក ជីមី និយាយថា ការបាត់បង់ឱកាសចេញទៅប្រកួតក្រៅស្រុក កំពុងធ្វើឱ្យលោកអស់ឆន្ទៈប្រឡូកក្នុងអាជីពកីឡា ប៉ុន្តែបើឱ្យលោកលាឈប់តែម្តង គឺមិនអាចឡើយ ដោយសារតែលោកស្រឡាញ់ជំនាញនេះ និងម្យា៉ងចង់ពុះពារបន្តអាជីពជាគ្រូបង្វឹកលើជំនាញនេះជួយដល់កូនខ្មែរជំនាន់ក្រោយៗដែរ ៕
ចែករំលែកព័តមាននេះ