រាជធានីភ្នំពេញ ៖ កម្មករ កម្មការិនីរោងចក្រស្បែកជើងយីហោដ្យាយអិនខេមបូឌាស៊ូ ជាង៤រយនាក់បានប្រមូលផ្តុំគ្នាធ្វើការតវ៉ា និងសម្តែងការជ្រួលច្របល់ បន្ទាប់ពីដឹងថា ថៅកែរត់ចោលដោយមិនបានទូទាត់ប្រាក់បំណាច់ឆ្នាំ និងប្រាក់ផ្សេងៗទៀតឱ្យពួកគេហើយពួកគេបានអះអាងថា ថៅកែរូបនោះចាញ់ល្បែងអស់លុយពីខ្លួនរលីង ព្រមទាំងជំពាក់បំណុលគេច្រើនថែមទៀតផង ទើបវេចបង្វិចលួចរត់ចោលកម្មករបែបនេះ ។
ការជ្រួលច្របល់នោះបានកើតឡើងកាលពីព្រឹកថ្ងៃទី១៤ សីហា ២០១២ ដែលរោងចក្រខាងលើនោះមានទីតាំងស្ថិតនៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ។ ក្រុមកម្មករបានឱ្យដឹងថា ថៅកែរោងចក្រស្បែកជើងខាងលើនោះឈ្មោះជាង ជាលី អាយុជាង៥០ឆ្នាំ ជាជនជាតិចិនបានរត់ចោលពួកគេរយៈពេល៣ថ្ងៃកន្លងមក ហើយដោយអះអាងថា រោងចក្រនេះក្ស័យធន់ ប៉ុន្តែពួកគេបានដឹងថា រោងចក្រនេះមិនមែនក្ស័យធន់ដូចការអះអាងនោះទេ គឺដោយសារតែថៅកែញៀននឹងល្បែងយ៉ាងងប់ងុលបំផុត រហូតជំពាក់បំណុលគេវ័ណ្ឌ.កទៀតផង ។ ដោយមានបញ្ហាបែបនេះ ហើយទើបបានជាថៅកែរោងចក្រនោះមិនហ៊ាននៅស្រុកខ្មែរបន្តទៀត ព្រោះគ្មានលុយសងគេរួចក៏វេចបង្វិចរត់ចោលកម្មករដោយស្ងាត់ៗមិនឱ្យពួកគេដឹងនោះឡើយ ។ ទោះបីបែបណាកន្លងមកថៅកែរូបនេះបានបើកប្រាក់ឈ្នួលឱ្យពួកគេរួចហើយ ប៉ុន្តែនៅសល់ប្រាក់អតីតភាពការងារ ប្រាក់សម្រាប់ការសា្នាក់នៅ និងប្រាក់ទ្រទ្រង់សុខភាពជាដើមដែលម្នាក់ៗត្រូវទទួលបានរាប់រយដុល្លារទៀតមិនត្រូវបានថៅកែទូទាត់ឱ្យនោះឡើយ ទើបធ្វើឱ្យពួកគេកើតមានការជ្រួលច្របល់បែបនេះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ