ខេត្តបន្ទាយមានជ័យ ៖ កាំភ្លើងអាកាកាត់ស្វាយ១ដើម ត្រូវបានប្រជាពលរដ្ឋម្នាក់ ក្នុងចំណោម២០នាក់ ដែលទៅបង់ត្រីនៅក្នុងស្ទឹងប្រទះឃើញ ហើយរាយការណ៍មកសមត្ថកិច្ចនគរបាលប៉ុស្តិ៍រដ្ឋបាលស្លក្រាម និងបានយកទៅរក្សាទុកនៅអធិការដ្ឋាននគរបាលស្រុកស្វាយចេក ។ ការប្រទះឃើញកាំភ្លើងនេះ គឺកាលពីវេលាម៉ោង១២ថ្ងៃត្រង់ថ្ងៃទី១០ សីហា នៅក្នុងទឹកស្ទឹង ចំណុចវត្តចាស់ ក្នុងភូមិសាស្ត្រភូមិទ័ពសៀម ឃុំស្លក្រាម ស្រុកស្វាយចេក ។
លោកអនុសេនីយ៍ឯក ហ៊ិន សារុន អធិការរងនគរបាលស្រុកស្វាយចេក បានឱ្យដឹងថា បន្ទាប់ពីធ្វើការផ្សព្វផ្សាយពីគោលនយោបាយភូមិ-ឃុំមានសុវត្ថិភាពដល់សហគមន៍មក ប្រជាពលរដ្ឋមានការយល់ដឹងច្រើន ក្នុងការចូលរួមការពារសន្តិសុខសុវត្ថិភាពក្នុងមូលដ្ឋាន ។ ជាក់ស្តែងនៅវេលាម៉ោង១២ថ្ងៃត្រង់ថ្ងៃទី១០ សីហា មានប្រជាពលរដ្ឋឈ្មោះគុន កុន ភេទប្រុស អាយុ៤៧ឆ្នាំ រស់នៅក្នុងភូមិប្រីយ៍ ឃុំទ្រាស ស្រុកស្វាយចេក បានទៅបង់ត្រីនៅក្នុងស្ទឹង នៅចំណុចខាងលើ ហើយរាវប៉ះកាំភ្លើងអាកាមួយដើមកាត់ស្វាយ ក៏រាយការណ៍ឱ្យសមត្ថកិច្ចនគរបាលប៉ុស្តិ៍រដ្ឋបាល ។
លោកអធិការរងបានបន្តថា អាវុធនេះមានគុណភាព៥០%ត្រូវបានជនមិនស្គាល់មុខរុំនឹងការុងពណ៌ស រួចទម្លាក់ចូលក្នុងទឹកស្ទឹង ។ តាមការសន្និដ្ឋាន អាវុធនេះត្រូវគេយកមកទម្លាក់ចោលក្នុងទឹកស្ទឹងរយៈពេលប្រមាណ១០ថ្ងៃមកហើយ ៕
ចែករំលែកព័តមាននេះ