ខេត្តកំពង់ឆ្នាំង ៖ ស្រុកកំពង់លែង គឺជាស្រុកមួយក្នុងចំណោមស្រុកចំនួន២ ក្នុងខេត្តកំពង់ឆ្នាំង ដែលមានផ្លូវគមនាគមន៍មកកាន់ទីរួមខេត្តពឹងអាស្រ័យដោយផ្លូវទឹក (កាណូតដ) ក្នុងនោះសម្រាប់ស្រុកកំពង់លែងត្រូវឆ្លងកាត់ទទឹងទន្លេ២ទៅ៣ដែលគេឱ្យឈ្មោះថា ដទទឹង ។ បើទោះបីស្រុកមួយនេះមានផ្លូវគមនាគមន៍ដោយផ្លូវទឹកក៏ពិតមែន ក៏ប៉ុន្តក៏សម្បូរទៅដោយទំនិញ ភោគផលដំណាំរបស់ប្រជាកសិករដែលធ្វើបានដូចជា ស្រូវ ពោត សណ្តែក ល្ពៅ ត្រឡាច ម្ទេស និងបន្លែបង្ការផ្សេងៗជាច្រើនទៀត ។ ក្រៅពីនោះសត្វ គោ ក្របី ជ្រូក ក៏ត្រូវបានលក់ដូរ និងដឹកឆ្លងកាត់តាមរយៈកាណូតដនេះដែរ ។
ប៉ុន្តែអ្វីដែលជាកាសោកស្តាយនោះ គឺម្ចាស់អាជីវកម្មកាណូតដ នៅតែបំពានលើសៀវភៅបន្ទុកដោយយកតម្លៃលើសធ្វើបាបប្រជាពលរដ្ឋដែលជិះកាណូតឆ្លងកាត់ និងយកលើសមុខទំនិញជាដើម ។ ក្រៅពីការយកលើសសៀវភៅបន្ទុក ម្ចាស់កាន់កាប់អាជីវកម្មដទទឹង ក៏នៅធ្វើបាបដល់ទីវត្តអារាមខ្លះ ដែលមានលទ្ធភាពទិញដែក ស៊ីម៉ង់ត៍ និងមានកាណូតរបស់វត្តដឹកដោយខ្លួនឯង ក៏ត្រូវម្ចាស់អាជីវកម្មបង្ខំឱ្យចូលមកបង់លុយលើតម្លៃសម្ភារដែលដឹកដោយខ្លួនឯងនេះដែរ ។ ក្រៅពីការយកលើសសៀវភៅបន្ទុករបស់ក្រសួងសេដ្ឋកិច្ច និងហិញ្ញវត្ថុ ម្ចាស់អាជីវកម្មដទទឹងក៏មិនបានគោរពទៅតាមសៀវភៅបន្ទុកនេះដែរ ដូចជាការកំណត់ឱ្យមានពោងសុវត្ថិភាពនៅតាមកាណូតនីមួយៗដើម្បីធានាបាននូវសុវត្ថិភាពជូនអ្នកធ្វើដំណើរឆ្លងកាត់ ប៉ុន្តែគឺគ្មានតែម្តង ហើយប្រសិនបើមានបញ្ហាសោកនាដកម្ម នឹងពិតជាកើតមានយ៉ាងខ្លោចផ្សាជាក់ជាពុំខាន ហើយតើខាងណាជាអ្នកទទួលខុសត្រូវគឺពិតជាសាមីមន្ទីរដែលជាភ្នែកច្រមុះរបស់ក្រសួង និងរាជរដ្ឋាភិបាលហើយ ។
នេះគឺគ្រាន់តែជ្រុងមួយដែលបានលើកឡើងឱ្យសាធារណជន ពិសេសថ្នាក់ដឹកនាំ និងសាមីមន្ទីរគ្រប់គ្រងលើអាជីវកម្មដទទឹងតែប៉ុណ្ណោះ ព្រោះថារដូវវស្សាទឹកទន្លេកំពុងឡើងជាបណ្តើរៗ ហើយកាណូតដនៅតែមិនគោរពតាមសៀវភៅបន្ទុកទៀត ។ លើសពីនេះនៅតែផ្ទុកយ៉ាងពេញៗហៀរស្ទើរអ្នកដំណើររកកន្លែងអង្គុយគ្មានដូចមានរូបថតដែលភ្ជាប់មកជាមួយនេះស្រាប់ ។
ទោះបីយ៉ាងណាក៏ដោយចុះ ថ្ងៃអវសាននៃអាជីវកម្មដទទឹង នឹងជិតផុតរលត់ទៅហើយ ក្រោមគោលនយោបាយរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ នោះគឺការតភ្ជាប់ផ្លូវគមនាគមន៍ផ្លូវគោកពីខេត្តកំពង់ឆ្នាំងទៅខេត្ត កំពង់ធំ ដែលនឹងជិតដំណើរការហើយដោយការកសាងស្ពានជាប្រវត្តិសាស្ត្រយ៉ាងវែងមួយដែលមានចម្ងាយជាង៣,៥គីឡូម៉ែត្រតភ្ជាប់ពីទីរួមខេត្តកំពង់ឆ្នាំងទៅស្រុកកំពង់លែងក្នុងពេលដ៏ខ្លីខាងមុខនេះ។
ដល់ពេលនោះ ជីវភាពអ្នកស្រុកកំពង់លែងពិតជានឹងបានធូរធារមួយកម្រិត ព្រោះមិនពិបាកក្នុងការចំណាយប្រាក់បង់ថ្លៃកាណូតដទៅមករាល់ថ្ងៃ ដូចជាមន្រ្តីរាជការ សិស្ស ការដឹកជញ្ជូនទំនិញ និងការដឹកជញ្ជូនភោគផលដំណាំជាដើម ។ មិនត្រឹមតែប៉ុណ្ណោះស្រុកកំពង់លែងនឹងមានវិសាលភាពលើអាជីវកម្មបានមកពីវិស័យទេសចរណ៍ថែមទៀតជាពុំខាន ។ប្រជាពលរដ្ឋនៅស្រុកកំពង់លែង មានសេចក្តីរីករាយក្រៃលែងនៅពេលបានឮថា ស្រុកកំពង់លែងដែលធ្លាប់មានការលំបាកក្នុងការធ្វើដំណើរឆ្លងកាត់មកកាន់ទីប្រជុំជន នឹងមានស្ពានឆ្លងកាត់ដ៏វែងក្នុងពេលខាងមុខនេះ ។ ពួកគាត់និយាយថា ប្រវត្តិសាស្រ្តក្នុងស្រុកនេះនឹងកែប្រែជាពុំខាន ។
លោកមាន់ អ៊ានលី អភិបាលស្រុកកំពង់លែងថ្លែងថា ស្រុករបស់លោកមានចំនួន៩ឃុំ និងភូមិចំនួន៤៤ មានប្រជាពលរដ្ឋរស់នៅចំនួន១០.៦៣៤គ្រួសារ ស្មើនឹងជាង៥ម៉ឺននាក់ ។ ប្រជាពលរដ្ឋរស់ពឹងអាស្រ័យដោយការធ្វើស្រែ ចម្ការ ដាំដំណាំរួមផ្សំ ចិញ្ចឹមសត្វ និងនេសាទ ៕
ចែករំលែកព័តមាននេះ