ខេត្តស្ទឹងត្រែង ៖ ស្ត្រី២នាក់ត្រូវកងរាជអាវុធហត្ថខេត្តស្ទឹងត្រែងចាប់ខ្លួនជាមួយថ្នាំញៀនប្រភេទយ៉ាម៉ាទឹកកកចំនួន២ខាំ ចំណែកបុរសម្នាក់ទៀតរត់បាត់ចោលរថយន្តទំនើប ។ ការឡោមព័ទ្ធចាប់មុខសញ្ញាជួញដូរថ្នាំញៀននេះបង្កឱ្យមានការភ្ញាក់ផ្អើលយ៉ាងខ្លាំងចំកណ្តាលក្រុងស្ទឹងត្រែង កាលពីវេលាម៉ោង២និង៤០នាទីរសៀលថ្ងៃទី១៣ សីហា ។
តាមព័ត៌មានជំហានដំបូងពីកងរាជអាវុធហត្ថខេត្តថា នេះជាមុខសញ្ញាជួញដូរថ្នាំញៀនដែលមានការណាត់ជួបគ្នាដើម្បីប្រគល់ តែខណៈពេលដឹងមុខសញ្ញាប្រាកដហើយនោះ កងរាជអាវុធហត្ថបានរាយកម្លាំងស្ទាក់ចាប់រថយន្តស៊េរីទំនើបមួយគ្រឿងម៉ាកហាយប្រ៊ីដ ពណ៌ខ្មៅ ពាក់ស្លាកលេខបណ្តោះអាសន្នលេខ៣២៦៧ ។
បន្ទាប់ពីដឹងថា កងរាជអាវុធហត្ថស្ទាក់ចាប់ ម្ចាស់រថយន្តបានប្រឹងបើកគេចក៏ជ្រុលទៅបុករថយន្តរបស់កងរាជអាវុធហត្ថលាន់យ៉ាងខ្លាំង រួចម្ចាស់បានបើកទ្វាររថយន្តលោតផ្លោះរបងគេចខ្លួន តែទោះបីជាយ៉ាងណាក្តី កងរាជអាវុធហត្ថដែលបានពង្រាយកម្លាំងឡោមព័ទ្ធចាប់ដដែល ។ ប្រជាពលរដ្ឋដែលឃើញហេតុការណ៍បាននិយាយថា សកម្មភាពដេញតាមរថយន្តស៊េរីទំនើបនេះ មានសកម្មភាពដូចរឿងវីដេអូហុងកុង ទម្រាំតែស្ទាក់ចាប់បាន ។
ស្ត្រីជាប្រពន្ធរបស់មុខសញ្ញារត់គេចខ្លួនទុកចោលរថយន្តទាំងម៉ាស៊ីនកំពុងឆេះនោះបាននិយាយថា ថ្នាំញៀននេះខ្លួនបានយកមកពីប្រទេសឡាវនិងមានការដោះដូរទៅឱ្យស្ត្រីម្នាក់ជាម្ចាស់រោងសិប្បកម្មកែច្នៃគ្រឿងសង្ហារិម នៅភូមិថ្មី សង្កាត់ស្ទឹងត្រែង ។ ស្ត្រីរូបនេះ បាននិយាយនៅមុខព្រះរាជអាជ្ញានិងលោកមេបញ្ជាការកងរាជអាវុធហត្ថថា ថ្នាំញៀនដែលខ្លួនយកទៅដោះដូរនោះមានទម្ងន់២ខាំក្នុងតម្លៃ៨ពាន់ដុល្លារ ។
ប្រភពព័ត៌មានឱ្យដឹងទៀតថា មុខសញ្ញាដែលឃាត់ខ្លួនជាស្ត្រី២នាក់ ម្នាក់ឈ្មោះក្រង ពិសី ជាប្រពន្ធ ជនដែលរត់គេចខ្លួនឈ្មោះពៅ ជាទាហាន និងស្ត្រីជាអ្នកទទួលទិញម្នាក់ទៀត ឈ្មោះធឿន ជាម្ចាស់សិប្បកម្មកែច្នៃគ្រឿងសង្ហារិម ។ មុខសញ្ញាទាំង៣នាក់នោះមានលំនៅក្នុងភូមិថ្មី សង្កាត់ស្ទឹងត្រែង ក្រុងស្ទឹងត្រែង ៕
ចែករំលែកព័តមាននេះ