រាជធានីភ្នំពេញ ៖ បុរសម្នាក់បានរងរបួសស្មាខាងឆ្វេងដោយសារគ្រាប់កាំភ្លើងមន្ត្រីយោធាម្នាក់បានបាញ់ផ្ចុចដីហើយខ្ទាតត្រូវបុរសរងគ្រោះ បណ្តាលឱ្យរងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ ។ អំពើបាញ់ប្រហារគ្នានេះផ្តើមចេញពីទំនាស់ពាក្យសម្តីរវាងបុរសរងគ្រោះ និងកូនប្រុសរបស់ខ្មាន់កាំភ្លើងនៅកន្លែងលេងបុកប៊ីយែរ ស្ថិតនៅក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោងជាង១២រំលងអធ្រាត្រឈានចូលថ្ងៃទី១៣ សីហា ២០១២។
បុរសរងគ្រោះឈ្មោះអាត់ សំ អាយុ៣៣ឆ្នាំ ជាកម្មកររោងចក្រកាត់ដេរមានទីលំនៅផ្ទះជួលជិតកន្លែងកើតហេតុ ។ ចំណែកមន្ត្រីយោធាដែលបង្កការផ្ទុះអាវុធនោះឈ្មោះមាស ពៅ អាយុ៤៥ឆ្នាំ ជាយោធានៃនាយកដ្ឋានបុគ្គលិកក្រសួងការពារជាតិ និងជាម្ចាស់តាបប៊ីយែរ ។ ក្រោយពេលកើតមានការផ្ទុះអាវុធកងរាជអាវុធហត្ថខណ្ឌមានជ័យ បានចុះទៅអន្តរាគមន៍ឃាត់ខ្លួនឈ្មោះមាស ពៅ នាំទៅកាន់ទីបញ្ជាការកងរាជអាវុធហត្ថទាំងយប់ ដើម្បីកសាងសំណុំរឿងបញ្ជូនទៅទីបញ្ជាការកងរាជអាវុធហត្ថរាជធានីភ្នំពេញ ចាត់ការតាមច្បាប់ ។
តាមប្រភពព័ត៌មានឱ្យដឹងថា មុនពេលមានស្នូរផ្ទុះអាវុធកើតឡើងកូនប្រុសរបស់ឈ្មោះមាស ពៅ ដែលជាម្ចាស់តាបប៊ីយែរបានលេងបុកប៊ីយែរជាមួយគ្នីគ្នាផ្សេងដោយមានឈ្មោះអាត់ សំ បានឈរមើលក្រុមអ្នកលេងបុកប៊ីយែរនៅក្នុងតាបប៊ីយែរ ។ ខណៈពេលនោះឈ្មោះអាត់ សំ បាននិយាយភ្នាល់គ្នាជាមួយកូនប្រុសឈ្មោះមាស ពៅ ថា បើឯងបុកប៊ីយែរមួយគ្រាប់នេះចូលអញដាក់២.០០០រៀល ឬដប់ស៊ីប្រាំ។ ពេលនោះឈ្មោះអាត់ សំ បានដកលុយពី ហោប៉ៅខោចំនួន២.០០០រៀល ដាក់លើតាបប៊ីយែរ ប៉ុន្តែក្រោយពេលដែលកូនប្រុសរបស់ឈ្មោះមាស ពៅ បុកប៊ីយែរអត់ចូលឈ្មោះអាត់ សំ បានតាមទារលុយពីកូនប្រុសរបស់ឈ្មោះមាស ពៅ ទើបបង្កឱ្យកើតមានទំនាស់ពាក្យសម្តីគ្នារហូតឈ្មោះមាស ពៅ ជាឪពុកឮកូនទាស់គ្នាក៏ចេញ មកសួរនាំហើយទាញកាំភ្លើងខ្លីម៉ាករ៉ូឡូបាញ់ផ្ចុចដីមួយគ្រាប់ បណ្តាលឱ្យខ្ទាតត្រូវឈ្មោះអាត់ សំ ចំស្មាបៀមគ្រាប់ត្រូវបានបញ្ជូនទៅសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ៕
ចែករំលែកព័តមាននេះ