រាជធានីភ្នំពេញ ៖ គណៈកម្មាធិការគណបក្សប្រជាជនកម្ពុជារាជធានីភ្នំពេញ បានធ្វើការផ្សព្វផ្សាយរបាយការណ៍បូកសរុបលទ្ធផលនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣ និងលើកទិសដៅឈានទៅបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ខាងមុខទៀត នៅទីស្នាក់ការគណបក្សប្រជាជនកម្ពុជារាជធានីភ្នំពេញកាលពីព្រឹកថ្ងៃទី១២ សីហាកន្លងមក ។
លោកកែប ជុតិមា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ បានលើកឡើងថា គណបក្សប្រជាជនកម្ពុជា បានទទួលលទ្ធផលយ៉ាងត្រចះត្រចង់ជាប្រវត្តិសាស្ត្រ ដែលសម្រាប់រាជធានីភ្នំពេញគឺទទួលបានអាសនៈជាចៅសង្កាត់ទាំង៩៦ ជាមន្ត្រីគណបក្សប្រជាជនកម្ពុជាទាំងអស់ រីឯចំនួនកៅអីបានកើនឡើង៦៥កៅអីថែមទៀត ។ លទ្ធផលខាងលើនេះបង្ហាញឱ្យឃើញយ៉ាងច្បាស់ ពីការគាំទ្ររបស់ប្រជាពលរដ្ឋមកលើគណបក្សប្រជាជនកម្ពុជា ធ្វើឱ្យមូលដ្ឋានបង្អែកដ៏ធំបានរបូតចេញពីដៃគណបក្សប្រឆាំងយ៉ាងឆ្ងាយ ។
ជាមួយគ្នានេះ សន្លឹកអាត់ខាងនយោបាយរបស់គណបក្សប្រឆាំងរឿងព្រំដែនកម្ពុជា-វៀតណាមក៏បានច្បាស់លាស់ ធ្វើឱ្យអ្នកចោទប្រកាន់មកលើរាជរដ្ឋាភិបាល ដែលចោទសម្តេចតេជោថាក្បត់ជាតិឬអាយ៉ងនោះបានបញ្ចប់ ក្រោយពីសម្តេចអគ្គមហាសេនាបតីតេជោហ៊ុន សែន បានបកស្រាយយ៉ាងពិស្តាររយៈពេលជាង៥ម៉ោងនៅវិមានរដ្ឋសភាកាលពីថ្ងៃទី៩ សីហា ស្តីពីការបោះបង្គោលព្រំដែនគោក និងព្រំដែនទឹករវាងកម្ពុជា-វៀតណាម ។
លោកកែប ជុតិមា បានបញ្ជាក់ថា លទ្ធផលនៃការបោះឆ្នោតឃុំ-សង្កាត់គឺយើងអាចស្ទង់បានពីកម្លាំងដ៏រឹងមាំរបស់គណបក្សប្រជាជនកម្ពុជា សម្រាប់ឈានទៅដណ្តើមជ័យជម្នះក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥នៅឆ្នាំ២០១៣ទៀត។ លោកកែប ជុតិមា បន្ថែមថា ប្រជាប្រិយភាពរបស់គណបក្សប្រជាជនកម្ពុជា គឺស្ថិតនៅលើអំពើល្អរបស់មន្ត្រីយើង។អស់លោក លោកស្រីពិតជាដឹងច្បាស់ថា ប្រជាពលរដ្ឋត្រូវការអ្វីនៅមូលដ្ឋាន ។ លោកក៏បានជំរុញឱ្យអាជ្ញាធរដែនដីណែនាំដល់ប្រជាពលរដ្ឋពីការពិនិត្យបញ្ជីឈ្មោះបោះឆ្នោត និងចុះឈ្មោះបោះឆ្នោតឱ្យបានគ្រប់ៗគ្នាសម្រាប់អ្នកគ្រប់អាយុ ពិសេសយុវជនរបស់យើង ៕
ចែករំលែកព័តមាននេះ