រាជធានីភ្នំពេញ ៖ បុរសម្នាក់ត្រូវបានគេប្រទះឃើញរងរបួសបែកមុខបែកក្បាល និងរលាត់ដៃជើងយ៉ាងធ្ងន់ធ្ងរដេកដួលនៅក្នុងថ្លុកឈាមដោយគ្មានប្រភពណាមួយអះអាងថា មកពីមូលហេតុអ្វីនោះឡើយ ប៉ុន្តែគេមានការសង្ស័យថា ជាឧប្បត្តិហេតុគ្រោះថ្នាក់ចរាចរណ៍ត្រូវរថយន្តកៀរ ឬអាចជិះម៉ូតូដួលដោយខ្លួនឯង។
បុរសរូបនេះត្រូវបានគេប្រទះឃើញ កាលពីវេលាម៉ោង៤ទៀបភ្លឺថ្ងៃទី១៣ សីហា នៅលើកំណាត់ផ្លូវជាតិលេខ៤ត្រង់ចំណុចភូមិអូរដឹម សង្កាត់ចោមចៅ ខណ្ឌពោធិ៍សែនជ័យ ។ បុរសរងគ្រោះមិនត្រូវបានគេស្គាល់អត្តសញ្ញាណទេមាន អាយុប្រហែលជាង៣០ឆ្នាំ ពាក់អាវដៃវែងឆ្នូតពណ៌ឈាមជ្រូកលាយសស្លៀកខោខូវប៊យជើងខ្លី ខ្សែក្រវាត់ប៉ូលិស ពណ៌ខ្មៅ ក្រៅពីនេះមិនមានអ្វីដើម្បីសម្គាល់នោះឡើយ ហើយរងរបួសបែកមុខបែកក្បាល និងរលាត់ដៃជើងយ៉ាងធ្ងន់ធ្ងរបំផុត ។
តាមប្រភពព័ត៌មានបានឱ្យដឹងថា នៅវេលាម៉ោង៤ទៀបភ្លឺប្រជាពលរដ្ឋដែលធ្វើដំណើរឆ្លងកាត់ទៅមកតាមផ្លូវជាតិលេខ៤នោះ បានប្រទះឃើញបុរសរងគ្រោះខាងលើដេកដួលសន្លប់បាត់ស្មារតីដោយមានម៉ូតូមួយគ្រឿងនៅក្បែរខ្លួនទៀតផង ។ ពេលនោះគេមិនហ៊ានឈប់មើលនោះទេ ព្រោះខ្លាចជាល្បិចកលរបស់ជនខិលខូចធ្វើពុតជាដេកដួលដើម្បីធ្វើសកម្មភាពប្លន់ លុះដល់វេលាព្រឹកឡើងបុរសនោះនៅតែសន្លប់នៅទីនោះមិនដឹងខ្លួនដដែល ឯម៉ូតូបាត់មិនឃើញទៀតទើបមានការភ្ញាក់ផ្អើលឆោឡោតែម្តង ហើយគេសង្ស័យថា ម៉ូតូរបស់បុរសរងគ្រោះត្រូវជនខិលខូចឆ្លៀតឱកាសលួចយកទៅបាត់ ។
សមត្ថកិច្ចបានឱ្យដឹងថា ជនរងគ្រោះរូបនោះរងរបួសធ្ងន់ធ្ងរណាស់ដែលមិនដឹងថា ត្រូវរថយន្តកៀរបណ្តាលឱ្យដួលបោកក្បាល ឬក៏ស្រវឹងស្រាជិះម៉ូតូដួលដោយខ្លួនឯង ឬបណ្តាលមកពីមូលហេតុអ្វីនោះទេ ។ ម្យ៉ាងទៀតនៅនឹងខ្លួនបុរសនោះមិនមានលិខិតស្នាមអ្វីសម្គាល់ឡើយ ។ ក្រោយពេលកើតហេតុជនរងគ្រោះត្រូវបានបញ្ជូនទៅកាន់មន្ទីរពេទ្យព្រះកុសុមៈដើម្បីសង្គ្រោះបន្ទាន់ ឯសមត្ថកិច្ចកំពុងស្រាវជ្រាវរកក្រុមគ្រួសារ ៕
ចែករំលែកព័តមាននេះ