ខេត្តកំពង់ឆ្នាំង ៖ ទឹកប្រាក់ចំនួន១០មឺុនរៀលជាអំណោយដ៏ថ្លៃថ្លា របស់លោក ម៉ី ប៊ុនជ្រុយ សប្បុរសជននៅខេត្តពោធិ៍សាត់ ជួយដល់កុមារី អាយុ២ឆ្នាំ ដែលរងគ្រោះដោយសាររលាកទឹកក្តៅកំពុងពុះចាក់ស្រោចពីលើ កាលពីថ្ងៃទី២៥ កក្កដា នៅលំនៅឋានរបស់នាង ស្ថិត ក្នុងភូមិត្រពាំងម្លូ ឃុំក្រាំងស្គា ស្រុកទឹកផុស ត្រូវបានភ្នាក់ងារកោះសន្តិភាពនាំយកទៅប្រគល់ជូនដល់ជីដូនរបស់កុមារីឈ្មោះអ៊ឹម ធារ៉ា អាយុ២ឆ្នាំនោះរួចហើយ កាលពីព្រឹកថ្ងៃទី១០ សីហា នៅក្នុងប៉ុស្តិ៍រដ្ឋបាលសង្កាត់ប្អេរ ក្រុងកំពង់ឆ្នាំង ដោយជីដូនកុមារីរូបនេះគាត់មកទទួលដោយផ្ទាល់ ដោយសារលំនៅឋានគាត់នៅឆ្ងាយ ។
ស្ត្រីឈ្មោះ ស ចិន អាយុ៤២ឆ្នាំ ដែលត្រូវជាជីដូនកុមារីរូបនេះនិយាយថា ពេលនេះចៅស្រីគាត់កំពុងសម្រាកព្យាបាលបន្តនៅមន្ទីរពេទ្យគន្ធបុប្ផា ឯរាជធានីភ្នំពេញនៅឡើយ ។ ចៅស្រីគាត់បានធូរស្រាលខ្លះហើយ ប៉ុន្តែគ្រូពេទ្យមិនទាន់អនុញ្ញាតឱ្យត្រឡប់មកផ្ទះវិញនៅឡើយ ទេ ។ គាត់បានលើកដៃសំពះថ្លែងអំណរគុណយ៉ាងជ្រាលជ្រៅដល់សប្បុរសជនដែលបានជួយឧបត្ថម្ភដល់ក្រុមគ្រួសារគាត់ដែលកំពុងជួបការលំបាកនេះ និងសូមបួងសួងដល់វត្ថុស័ក្តិសិទ្ធិក្នុងលោក សូមជួយបីបាច់ថែរក្សាសប្បុរជន និងក្រុមគ្រួសារឱ្យជួបតែពុទ្ធពរទាំង៤ប្រការគឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕
ចែករំលែកព័តមាននេះ