ណូវ៉ាក់ យ៉ូកូវិចរក្សាបាននូវពានជើងឯកកម្មវិធី Rogers Cupរបស់ខ្លួនសម្រាប់ឆ្នាំ២០១២បន្តទៅទៀតក្រោយពីបានយកឈ្នះកីឡាករបារាំង Richard Gasquetក្នុងវគ្គផ្តាច់ព្រ័ត្រកាលពីថ្ងៃចន្ទទី១៣សីហាកន្លងមកនេះ ។ ការប្រកួតនេះត្រូវបានធ្វើនៅទីក្រុងតូរ៉ុនតូ ប្រទេសកាណាដា ។
យ៉ូកូវិចបានបំបាក់ Gasquetក្នុងលទ្ធផល២សិតទល់នឹងសូន្យ ៦-៣និង៦-២ការពារបានពានជើងឯករបស់ខ្លួនដែលបានយកឈ្នះកាលពីឆ្នាំ ២០១១ ។ សម្រាប់រូបគេ នេះគឺជាពាន ATP World Tour Mastersលើកទី១២ហើយៗពាននេះក៏ជាផ្នែកមួយនៃការលើកទឹកចិត្តដ៏សំខាន់ផងដែរក្នុងការចូលរួមក្របខណ្ឌធំចុងក្រោយប្រចាំរដូវកាល US Openដែលនឹងរៀបចំធ្វើនៅសហរដ្ឋអាមេរិកនាចុងខែសីហានេះ ។
កីឡាករលំដាប់ទី២ពិភពលោករូបនេះបានថ្លែងថា ៖«នេះជាកម្មវិធីប្រកួតធំមួយដែលខ្ញុំបានចូលរួម ។ ខ្ញុំសប្បាយចិត្តដែលដណ្តើមពានជើងឯកជាថ្មី ។ បន្ទាប់ពីទទួលបរាជ័យយ៉ាងជូរចត់ក្នុងព្រឹត្តិការណ៍អូឡាំពិកក្រុងឡុងឆ្នាំ ២០១២រួចមក ខ្ញុំខ្លួនឯងផ្ទាល់មិនសង្ឃឹមថាអាចយកឈ្នះជើងឯកនៅទីនេះទេ ។ តែយ៉ាងណា ដណ្តើមបានពាននេះពិតជាពិបាក ។ ខ្ញុំបានព្យាយាមយ៉ាងខ្លាំងក្នុងពេលប្រកួត។ ដូច្នេះ ខ្ញុំហ៊ាននិយាយបានថា ការប្រកួតរបស់ខ្ញុំបានល្អខ្លាំងនៅលើកនេះ »។
កាលពីឆ្នាំ ២០០៧ យ៉ូកូវិចក៏ធ្លាប់បានយកឈ្នះពាននេះម្តងរួចមកហើយដែរ ។ ដូច្នេះគេគឺជាជនទី៣ហើយបន្ទាប់ពី Ivan Lendlនិង Andre Agassiដែលបានឈ្នះពាននេះចំនួន៣លើក ។
កីឡាករវ័យ២៥ឆ្នាំរូបនេះបានបន្តថា ៖«ពិតណាស់ ខ្ញុំមិនមែនជាអ្នកដែលពូកែខ្លាំងលើការវាយសឺវីសនោះទេ ប៉ុន្តែជាធម្មតា ខ្ញុំតែងផ្តោតទៅលើការវាយជាលើកទី២បន្ទាប់ពីវាយសឺវីសរួច។ ខ្ញុំកំពុងតែព្យាយាមធ្វើឱ្យបានល្អលើការវាយសឺវីសទី១និងទី២ »។
ដោយឡែក សម្រាប់កីឡាករបារាំង Gasquetវិញ នេះគឺជាលើកទី៧ហើយដែលរូបគេបានបរាជ័យនៅក្នុងការជួបគ្នាសរុប៨លើកជាមួយយ៉ូកូវិច ។ គេបានថ្លែងថា ៖«នៅពេលលទ្ធផល ៤-៣ ការលេងរបស់ខ្ញុំចេះតែអន់ទៅៗ ហើយវាជាបច្ច័យនាំ ឱ្យមានការផ្លាស់ប្តូរ ។ ដរាបណា អ្នកប៉ះជាមួយកីឡាករយ៉ូកូវិច គឺពិតជាពិបាក ហើយអ្នកក៏មិនអាចធ្វើឱ្យការលេងរបស់ខ្លួនឯងបានល្អឥតខ្ចោះនោះដែរ» ៕
ចែករំលែកព័តមាននេះ