រាជធានីភ្នំពេញ ៖ ប្រជាពលរដ្ឋ សិល្បករ និងថ្នាក់ដឹកនាំសរុបប្រមាណជាង៥០០នាក់ បានចូលរួមក្នុងយុទ្ធនាការបរិស្ថានមួយដែលមានឈ្មោះថា រត់ផងរើសផង ដែលជាកម្មវិធីរត់ម៉ារ៉ាតុង ដើម្បីសម្អាតទីក្រុងនៅថ្ងៃទី១២ សីហា។ការរត់ម៉ារ៉ាតុងនេះ ចាប់ផ្តើមពីម៉ោង៦ដល់ម៉ោង១០និង៣០នាទីព្រឹក នៅភោជនីយដ្ឋានភូមិម្ហូបខ្មែរ ដែលស្ថិតនៅមុខសណ្ឋាគារណាហ្គាវើល ។ នេះជាកម្មវិធីរត់ម៉ារ៉ាតុងដំបូងគេតែមួយគត់នៅក្នុងប្រទេសកម្ពុជា ដែលអ្នកចូលរួមទាំងអស់មិនត្រឹមតែរត់ប៉ុណ្ណោះទេ តែត្រូវរើសសំរាមថែមទៀតផង ។
ដើម្បីបង្កើតបរិយាកាសរីករាយក្នុងកម្មវិធីនេះ អ្នកចូលរួមទាំងអស់ត្រូវបានបែងចែកជា៣ក្រុម ដើម្បីប្រកួតប្រជែងគ្នា ក្រុមណាមួយដែលរើសសំរាមបានច្រើនជាងគេគឺទទួលជ័យជម្នះដោយទទួលបានរង្វាន់ ។ក្រុមអ្នករត់ទាំងអស់ចាប់ផ្តើមនៅទីដៅតែមួយ គឺនៅភោជនីយដ្ឋានភូមិម្ហូបខ្មែរដែលស្ថិតនៅមុខសណ្ឋាគារណាហ្គាវើល ហើយទីផ្តាច់ព្រ័ត្រស្ថិតនៅវត្តភ្នំ ប៉ុន្តែពួកគេត្រូវរត់លើផ្លូវខុសគ្នា។ «រត់ផងរើសផង» ឬជាភាសាអង់គ្លេស«Run Marathon Picking the Rubbish» នេះគឺជាគម្រោងតូចមួយ ទី៣ របស់គម្រោងLet’s Do It ភ្នំពេញ២០១២»ដែលប្រតិបត្តិដោយសភាយុវពាណិជ្ជករនៃកម្ពុជា (JCI) ។
កញ្ញា ដែក ដារី ដែលជាលេខាធិការនៃ JCI បានមានប្រសាសន៍ថា គោលបំណងចម្បងនៃ កម្មវិធីនេះ គឺដើម្បីផ្តល់់ចំណេះដឹងអំពីផលប៉ះពាលនៃសំរាមដល់បរិស្ថានដល់ប្រជាពលរដ្ឋ និងដើម្បីលើកទឹកចិត្តឱ្យប្រជាពលរដ្ឋទាំងអស់ដែលរស់នៅក្នុងរាជធានីភ្នំពេញ មានទម្លាប់ល្អក្នុងការសម្អាតទីក្រុង និងលេងកីឡាដើម្បីសុខភាព ។ កញ្ញាបានបន្ថែមទៀតថា «យើងសង្ឃឹមថា គម្រោងនេះនឹងមានឥទ្ធិពលលើឥរិយាបថរើសសំរាមរបស់ប្រជាពលរដ្ឋទាំងអស់ ដូចនេះទីក្រុងរបស់យើងនឹងត្រូវបានសម្អាតដោយយើងទាំងអស់គ្នា»។ ដើម្បីចូលរួមក្នុងកម្មវិធីនេះ លោកអ្នកត្រូវចុះឈ្មោះនៅទំព័រហ្វេសប៊ុករបស់«Let’s Do It»ឬចុះឈ្មោះនៅកន្លែងរត់តែម្តង។
«រត់ផងរើសផង» គឺជាគម្រោងទី៣ ក្នុងចំណោមគម្រោងតូចៗទាំង៦របស់«Let’s Do It ភ្នំពេញឆ្នាំ២០១២» ដែលរួមមាន«យុទ្ធនាការបិតខិត្តប័ណ្ណ»«ជិះផងរើសផង(ជិះកង់រើសសំរាម)»«រត់ផងរើសផង»«រត់ម៉ារ៉ាតុងរើសសំរាម»«សិក្ខាសាលាអប់រំ»«វីដេអូអប់រំខ្លីៗ» និង«តារាមួយរយ» ។ ព្រឹត្តិការណ៍ធំ «Let’s Do It ភ្នំពេញឆ្នាំ២០១២» នឹងប្រារព្ធធ្វើនៅថ្ងៃទី២៦ សីហា ឆ្នាំ២០១២ នៅពហុកីឡដ្ឋានជាតិអូឡាំពិក ។ គេរំពឹងថា នឹងមានអ្នកស្ម័គ្រចិត្តប្រមាណ ១០.០០០នាក់ ចូលរួមសម្អាតទីក្រុង ហើយកម្មវិធីនេះទទួលបានការគាំទ្រយ៉ាងពេញទំហឹងពីរដ្ឋាភិបាលកម្ពុជា ។
កម្មវិធីនេះទទួលបានការឧបត្ថម្ភទាំងស្រុងពី Sabay, Smart Mobile, Cambodia Beverage Company, Ford, Mega Investment and Telecom Limited, Farlin,Shimano, VTRUST Property Co.; Ltd, Tous les Jours, Peace Book Center, Sovanna Shopping Center Ltd និង Advanced Glory Logistics (Cambodia) Co.; Ltd.
«Let’s Do It »បានប្រារព្ធធ្វើឡើងដំបូងបំផុតនៅក្នុងប្រទេសអេស្តូនីក្នុងឆ្នាំ២០០៨ ។ សព្វថ្ងៃនេះមានប្រទេសចំនួន៩១ ដែលបានចូលរួមជំរុញឱ្យសកម្មភាពនេះធ្វើឡើងនៅជុំវិញពិភពលោក ចាប់ពីខែឧសភា ដល់ខែកញ្ញា ។ ឆ្នាំ ២០១២នេះ គឺជាឆ្នាំដែលយើងរួមគ្នាសម្អាតពិភពលោក ៕
ចែករំលែកព័តមាននេះ