រាជធានីភ្នំពេញ ៖ សមាជិកគណៈកម្មាធិការនាយក និងក្រុមប្រឹក្សាជាតិរបស់គណបក្សនរោត្តម រណប្ញទ្ធិ សរុបចំនួន៥៣រូប កាលពីថ្ងៃទី១២ សីហា ឆ្នាំ២០១២ បានសម្រេចជ្រើសរើសលោកសៅ រ៉ានី ជាប្រធានស្តីទីគណបក្សនិងលោកផែង ហេង ជាអគ្គលេខាធិការថ្មី ។ ការសម្រេចនេះបានធ្វើឡើងក្នុងកិច្ចប្រជុំបិទទ្វារមួយនៅទីស្នាក់ការកណ្តាលគណបក្សនរោត្តម រណប្ញទ្ធិ ស្ថិតក្នុងខណ្ឌទួលគោក ។
លោកសៅ រ៉ានី បានថ្លែងថា បន្ទាប់ពីកិច្ចប្រជុំតំណាងទាំង២៤ខេត្ត-ក្រុង ជាសមាជិកគណៈកម្មាធិការនាយក និងក្រុមប្រឹក្សាជាតិនៃគណបក្សនរោត្តម រណប្ញទ្ធិ បានជ្រើសរើសរូបលោកជាប្រធានស្តីទីគណបក្ស និងលោកផែង ហេង ជាអគ្គលេខាធិការគណបក្ស ។ កិច្ចប្រជុំនេះក៏បានលើកឡើងពីការរួបរួមរវាងគណបក្សនរោត្តម រណប្ញទ្ធិ និងគណបក្សហ៊្វុនស៊ិនប៉ិចដែរ ហើយលោកបានជម្រាបជូនដល់ថ្នាក់ដឹកនាំគណបក្សពីការងារបង្រួបបង្រួមនេះ ដោយគោរពតាមអ្វីដែលសម្តេចក្រុមព្រះ និងលោកញឹក ប៊ុនឆៃ បានចុះកិច្ចព្រមព្រៀងកាលពីថ្ងៃទី២៤ ខែឧសភា ឆ្នាំ២០១២កន្លងមក ។
លោកសៅ រ៉ានី បានថ្លែងទៀតថា ការលាឈប់របស់សម្តេចក្រុមព្រះជាសញ្ញាមួយល្អសម្រាប់ការរួបរួមរវាងគណបក្សរាជានិយមទាំង២ តាមពិតខ្ញុំទេដែលជាអ្នកចង់ឱ្យមានការរួបរួមគ្នានេះ ។ ពេលនេះសម្តេចក្រុមព្រះបានភ្ញាក់រលឹក ពីព្រោះព្រះអង្គបានលាឈប់ជាហេតុតែមួយគត់ដែលលោកងាយស្រួលក្នុងការបង្រួបបង្រួមគ្នានេះ ។
លោកសៅ រ៉ានី បញ្ជាក់ថា គណបក្សនរោត្តម រណប្ញទ្ធិ នឹងរៀបចំសមាជមួយនៅថ្ងៃទី២៤ សីហា ខាងមុខ ដើម្បីប្តូរឈ្មោះគណបក្សនរោត្តម រណប្ញទ្ធិ ទៅជាគណបក្សជាតិនិយម ក្នុងការចូលរួមជាមួយគណបក្សហ៊្វុនស៊ិនប៉ិច ។ ឯមន្ត្រីគណបក្សហ៊្វុនស៊ិនប៉ិចបានថ្លែងថា គណបក្សនេះក៏នឹងគ្រោងរៀបចំសមាជថ្នាក់ជាតិកែប្រែលក្ខន្តិកៈខ្លះមុនពេលទទួលមន្ត្រីគណបក្សនរោត្តម រណប្ញទ្ធិ ហើយសមាជនឹងគ្រោងធ្វើនៅថ្ងៃទី២៥ សីហា ឆ្នាំ២០១២ នៅស្នាក់ការកណ្តាលគណបក្សហ៊្វុនស៊ិនប៉ិច ។
លោកសៅ រ៉ានី បានថ្លែងថា សម្តេចក្រុមព្រះបានទាត់បាល់«អកហ្សឺ» ហើយការសុំលាឈប់នេះ គឺបន្ទាប់ពីទ្រង់មិនមានប្រជាប្រិយភាព ។ ជីវិតនយោបាយរបស់លោកនឹងត្រូវស្លាប់ក្នុងឆ្នាំ២០១៣ បើសិនជាលោកមិនដឹកនាំគណបក្សនរោត្តម រណប្ញទ្ធិ ចូលជាមួយហ៊្វុនស៊ិនប៉ិចទេ ។
លោកសៅ រ៉ានី បានអះអាងថា ដោយសារតែការលាឈប់របស់សម្តេចក្រុមព្រះ លោកឈឹម សៀកឡេង និងលោកប៉ែន សង្ហា គណបក្សរបស់លោកក៏បានបើកកិច្ចប្រជុំបន្ទាន់មួយរបស់ថ្នាក់ដឹកនាំសំខាន់ៗមកពី២៤ខេត្ត-ក្រុងទូ ទាំងប្រទេស ក្នុងគោលបំណងបញ្ជាក់ពីការលាឈប់ និងការធ្វើសមាជតែម្តង ។ លោកសៅ រ៉ានី បញ្ជាក់ថា លោកគ្រោងនឹងដកពាក្យបណ្តឹងពីសាលាដំបូងរាជធានីភ្នំពេញដែលលោកបានដាក់ប្តឹងលោក នរ៉ាណាប្ញទ្ធិ អាន្ទនដាយ៉ាត និងលោកប៉ែន សង្ហា ប៉ុន្តែលោកមិនដែលបានដាក់ពាក្យប្តឹងសម្តេចក្រុមព្រះទេ ៕
ចែករំលែកព័តមាននេះ