ខេត្តស្វាយរៀង ៖ យ៉ាងហោចណាស់មានកម្មករកម្មការិនីរោងចក្រចំនួនជិត៦០នាក់ បានរងរបួសធ្ងន់និងស្រាលដោយសាររថយន្តក្រឡាប់ផ្ងារជើង ខណៈកំពុងជិះក្នុងរថយន្តបណ្តាលឱ្យសង្កត់លើគ្នារដូករណែលលើដងផ្លូវ ។ ឧប្បត្តិហេតុរថយន្តក្រឡាប់នេះបានកើតឡើងកាលពីថ្ងៃទី១៣ សីហា វេលាម៉ោង៦និង៣០នាទីព្រឹក នៅតាមកំណាត់ផ្លូវលំ ត្រង់ចំណុចចន្លោះភូមិដូនទយ និងភូមិត្រពាំងរុន ឃុំច្រេស ស្រុកចន្ទ្រា ។
បើតាមកម្មការិនីរងគ្រោះបានប្រាប់កោះសន្តិភាពថា មុនពេលកើតហេតុ ម្ចាស់រថយន្តឈ្មោះស្កុល ភេទប្រុស អាយុ៣០ឆ្នាំ នៅភូមិត្រពាំងរុន បើកបររថយន្តម៉ាកហ៊ីយ៉ានដាយ ចំណុះ១តោនកន្លះ ពណ៌ខៀវ ដឹកកម្មករ កម្មការិនីពីភូមិនានា មានភូមិធំ ឃុំត្នោត ស្រុកកំពង់រោទ៍ រួចមកដឹកកម្មការិនីនៅភូមិត្រពាំងរុន ភូមិតាអុង ភូមិឌៀកណ្តាល ឃុំច្រេស ស្រុកចន្ទ្រា ដើម្បីទៅធ្វើការនៅរោងចក្រក្រុងបាវិត ព្រោះជារថយន្តស៊ីឈ្នួលដឹករាល់ថ្ងៃជាធម្មតា ។ ពេលដឹកកម្មករមកដល់ចំណុចចន្លោះភូមិដូនទយ និងភូមិត្រពាំងរុន ក៏បានបើកវ៉ាគោយន្ត១គ្រឿង ដឹកគ្រែលក់ ដែលបើកពីត្បូងទៅជើងស្របទិសគ្នា ។ ពេលនោះវ៉ាមិនផុត ហើយផ្លូវលំតូចទៀត បណ្តាលឱ្យទើសគ្រែ ក៏ជាន់ហ្វ្រាំងឈប់ តែហ្វ្រាំងរថយន្តមិនស៊ី ក៏កាច់សោរថយន្ត ដើម្បីពន្លត់ម៉ាស៊ីន បណ្តាលឱ្យគាំងចង្កូតរថយន្ត ទើបក្រឡាប់
ចូលក្នុងស្រែផ្ងារជើងធ្វើឱ្យកម្មករកម្មការិនីដែលជិះក្នុងទ្រុងរថយន្តឈរច្រូងច្រាងធ្លាក់សង្កត់ និងជាន់លើគ្នាទម្រាំតែរើខ្លួនវារចេញបាន អ្នកនៅខាងក្រោមសន្លប់ជាបន្តបន្ទាប់ ។
នេះសំណាងល្អដោយសារទឹកក្នុងស្រែរាក់ បើសិនជាជ្រៅបន្តិចមិនដឹងថាស្លាប់ប៉ុន្មាននាក់ទេ ព្រោះពេលក្រឡាប់នោះដូចគ្របអ្នកជិះទាំងអស់ ទម្រាំលូនចេញតាមទ្វារទ្រុងខាងក្រោយ រួច ។ បន្ទាប់ពីកើតហេតុ អ្នកបើកបររថយន្តក៏បានរត់គេចខ្លួនបាត់ដែរ ។
ជនរងគ្រោះរបួសធ្ងន់៤០នាក់ និងស្រាលជិត២០នាក់ ក្នុងនោះសន្លប់នៅក្នុងរថយន្ត១៤នាក់ និងសន្លប់ជាបន្តបន្ទាប់ទៀតពេលអ្នកស្រុកជួយបី ជួយសែងយកទៅក្រោមផ្ទះ ទម្រាំរថយន្តសង្គ្រោះដឹកជញ្ជូនអស់មានសន្លប់១០នាក់ទៀត សរុប២៤នាក់ ។ ពេលនោះអ្នកខ្លះក៏មានក្រុមគ្រួសារដឹកតាមម៉ូតូ ខ្លះដែរ មកកាន់មន្ទីរពេទ្យបង្អែកស្រុកប្រតិបត្តិ ដែលកំពុងមមាញឹកទទួលពិនិត្យព្យាបាលប្រជាពលរដ្ឋរាប់រយនាក់ មានមនុស្សចាស់ក្មេង មានជំងឺគ្រុនក្តៅ មកពិនិត្យ និងសម្រាកព្យាបាលធ្វើឱ្យមានសភាពណែនតាន់តាប់ពេញក្នុងមន្ទីរពេទ្យ ៕
ចែករំលែកព័តមាននេះ