រាជធានីភ្នំពេញ ៖ យុវជនខ្មែរអ៊ិស្លាម ម្នាក់បានយកប្រាក់ដុល្លារក្លែងក្លាយក្រដាស១០០ដុល្លារចំនួន៤សន្លឹក ទៅផឹកស៊ីច្រៀងលេងកម្សាន្តនៅខារ៉ាអូខេឌីយ៉ាម៉ង់ ស្ថិតនៅផ្លូវភ្លោះសង្កាត់ជ្រោយចង្វា ខណ្ឌឫស្សីកែវ ហើយក៏ត្រូវគេដឹងនៅពេលដូរសន្លឹកទី២ និងត្រូវបានចាប់ឃាត់ខ្លួនកាលពីវេលាម៉ោង២រំលងអធ្រាត្រឈានចូលថ្ងៃទី១៣ សីហា ។ ជនដែលចាយប្រាក់ក្លែងកា្លយនេះឈ្មោះហ្វា គ្រីយ៉ា អាយុ២៤ឆ្នាំ មានទីលំនៅភូមិថ្នល់កែង ឃុំសេដា ស្រុកតំបែរ ខេត្តកំពង់ចាម ។ នៅពេលចាប់ខ្លួនសមត្ថកិច្ចដកហូតបានប្រាក់ដុល្លារក្លែងក្លាយប្រភេទក្រដាស១០០ចំនួន៤សន្លឹក ។
តាមមន្ត្រីប៉ូលិសឱ្យដឹងថា នៅវេលាម៉ោងប្រមាណ១០យប់ថ្ងៃទី១២ សីហា ជននេះបានចូលទៅផឹកស៊ីនិងច្រៀងលេងនៅខារ៉ាអូខេឌីយ៉ាម៉ង់ ស្ថិតនៅផ្លូវភ្លោះសង្កាត់ជ្រោយចង្វា ។ នៅពេលឈប់ច្រៀងគិតប្រាក់អស់៤០ដុល្លារក៏ឱ្យគេ១០០ដុល្លារហើយគេអាប់មកវិញ៦០ដុល្លារ ។ លុះក្រោយមកក៏បានឱ្យប្រាក់១០០ដុល្លារទៀតដូរដើម្បីឱ្យលុយធីបស្ត្រីខារ៉ាអូខេ ហើយដោយមានការសង្ស័យអ្នកគិតលុយត្រួតពិនិត្យក៏ដឹងថាក្លែងក្លាយហើយពិនិត្យមើលក្រដាស១០០ដុល្លារដែលឱ្យលើកមុនក៏សុទ្ធតែក្លែងក្លាយទើបប្តឹងប៉ូលិសប៉ុស្តិ៍ឱ្យឃាត់ខ្លួន។ បន្ទាប់មកនៅពេលត្រួតពិនិត្យរកឃើញប្រាក់ក្លែងក្លាយប្រភេទក្រដាស១០០ដុល្លារចំនួន៤សន្លឹកក៏ចាប់បញ្ជួនទៅកាន់អធិការដ្ឋានខណ្ឌឫស្សីកែវដើម្បីសាកសួរ ។
នៅចំពោះមុខសមត្ថកិច្ច យុវជននេះឆ្លើយថា ប្រាក់នោះខ្លួនពុំបានដឹងថា ជាប្រាក់ក្លែងក្លាយទេ គឺគេឱ្យថ្លៃលក់ម៉ូតូហើយធ្វើដំណើរមកស៊ីចាយនៅភ្នំពេញស្រាប់តែគេថាក្លែងក្លាយ។ កាលពីថ្ងៃទី១០ សីហា ឆ្នាំ២០១២ ឪពុកបានឱ្យយកម៉ូតូម៉ាកឌ្រីមសេ១២៥ ស៊េរី២០០៦មួយគ្រឿងទៅលក់នៅស្រុកមេមត់ បានតម្លៃ៩០០ដុល្លារហើយគេកក់ចំនួន៥០០ដុល្លារយកទៅឱ្យឪពុក ។ លុះនៅថ្ងៃទី១១ ខែសីហា ខ្លួនធ្វើដំណើរមកភ្នំពេញដេកនៅផ្ទះសំណាក់វិមានសួគ៌ ហើយនៅវេលាម៉ោង៥និង៣០នាទីល្ងាចក៏បានទាក់ទងឱ្យគេយកប្រាក់មកឱ្យនៅស្ពានព្រែកតាមាក់ ចំនួន៤០០ដុល្លារទៀត ។ នៅពេលបានប្រាក់ហើយក៏បានទៅច្រៀងនៅហាងខារ៉ាអូខេឌីយ៉ាម៉ង់ដោយយកប្រាក់នោះទៅចាយ ស្រាប់គេថាក្លែងក្លាយនិងត្រូវចាប់ខ្លួនតែម្តង ៕
ចែករំលែកព័តមាននេះ