យោងតាមប្រភពព័ត៌មានពីគេហទំព័របរទេសចេញផ្សាយកាលពីថ្ងៃចន្ទទី១៣ សីហា ឆ្នាំ២០១២បានឱ្យដឹងថា ក្រុមតារាចម្រៀងដ៏មានប្រជាប្រិយភាពបំផុតរបស់អង់គ្លេស Spice Girls បានបង្ហាញវត្តមានចូលរួមប្រគំតន្ត្រីបិទការប្រកួតអូឡាំពិករដូវក្តៅក្រុងឡុងឆ្នាំ២០១២ កាលពីរាត្រីថ្ងៃអាទិត្យទី១២ សីហា កន្លងមកនេះ ។
ក្រុម Spice Girls បាននាំយកបទចម្រៀង២បទនៅក្នុងអាល់ប៊ុមរបស់ពួកគេដែលជាបទពេញនិយមកាលពីចុងឆ្នាំ១៩៩០ មុនពេលដាក់ឈ្មោះក្រុម Spice Girls និងឆ្នាំ ២០០០ ។ បទចច្រៀង២បទដែលក្រុម Spice Girls លើកយកមកច្រៀងជូនទស្សនិកជននៅក្នុងពហុកីឡដ្ឋានអូឡាំពិក គឺបទ Wannabe និងបទ Spice Up Your Life ។ អ្វីដែលគួរឱ្យកត់សម្គាល់នោះ តារាចម្រៀង៥ដួងរបស់ក្រុម Spice Girls បានជិះលើរថយន្តម្នាក់មួយគ្រឿងៗ បើកជុំវិញពហុកីឡដ្ឋាន ហើយបានសម្តែងនៅលើរថយន្តនោះតែម្តង ដែលបានញ៉ាំងបរិយាកាសឱ្យកក្រើកពហុកីឡដ្ឋានក្រោមក្រសែភ្នែកទស្សនិកជនរាប់ម៉ឺននាក់ ។
គួររំលឹកដែរថា ក្រុមតារាចម្រៀងអង់គ្លេស Spice Girls ត្រូវបានបង្កើតឡើងជាផ្លូវការតាំងពីឆ្នាំ១៩៩៤ មកម៉្លេះ ។ ក្រុមនេះមានសមាជិក៥នាក់ក្នុងនោះមាននាង Victoria Beckham នាង Melanie Brown, នាង Emma Bunton, នាង Chisholon និង នាង Halliwell ។
ចែករំលែកព័តមាននេះ