រាជធានីភ្នំពេញ ៖ យុវជន២នាក់កាលពីវេលាម៉ោង៩និង១០នាទីព្រឹកថ្ងៃទី១៣ សីហា ២០១២បានត្រូវសមត្ថកិច្ចនគរបាលសង្កាត់បឹងព្រលឹត សហការជាមួយប៉ូលិសជំនាញព្រហ្មទណ្ឌខណ្ឌ៧មករា ឃាត់ខ្លួន ខណៈពួកគេធ្វើសកម្មភាពឆក់ខ្សែ.កពីភ្ញៀវទៅរកទិញសំបុត្ររថយន្ត។ ហេតុការណ៍នេះបានកើតឡើងនៅចំណុចចំណតរថយន្តក្រុមហ៊ុនកាពីតូល នៅតាមបណ្តោយផ្លូវលេខ១៨២ សង្កាត់បឹងព្រលឹត ខណ្ឌ៧មករា បន្ទាប់ពីឆក់ខ្សែ.កបានហើយទៅបុកម៉ូតូអ្នកដំណើរដួល ។
ជនសង្ស័យម្នាក់ឈ្មោះឡេង សុង អាយុ៣០ឆ្នាំ ស្នាក់នៅផ្ទះជួលសង្កាត់ស្ទឹងមានជ័យ និងម្នាក់ទៀតឈ្មោះជឿន វ៉ាន់ថា អាយុ២១ឆ្នាំ ស្នាក់នៅជាមួយគ្នា ។ រីឯជនរងគ្រោះក្នុងអំពើឆក់នោះមានឈ្មោះសុខ វណ្ណដា ភេទស្រី អាយុ២៥ឆ្នាំ ជាអ្នកលក់ដូរស្នាក់នៅផ្ទះលេខ៦៦DEo ផ្លូវលេខ២០០ សង្កាត់បឹងរាំង ខណ្ឌដូនពេញ ។ ការឃាត់ខ្លួនជនសង្ស័យ២នាក់ខាងលើនេះ សមត្ថកិច្ចបានឱ្យដឹងថា នៅវេលាម៉ោងប្រមាណជាង៩ព្រឹកនារីរងគ្រោះបានជិះម៉ូតូពីផ្ទះក្នុងគោលបំណងទៅទិញសំបុត្ររថយន្តកាពីតូលទៅក្រុងព្រះសីហនុ ។ លុះជិះមកដល់ចំណតខាងត្បូងផ្សារអូរឫស្សី ហើយបងស្រីជនរងគ្រោះបានចុះពីលើម៉ូតូ ដើម្បីរកទិញសំបុត្ររថយន្ត ពេលនោះស្រាប់តែមានជនល្មើស២នាក់ជិះម៉ូតូម៉ាកស្តេប ពណ៌ខ្មៅ ទៅឆក់ខ្សែ.កនាងតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ