ប្រជាជនហ្វ៊ីលីពីននាថ្ងៃទី១៣សីហាប្រឈមមុខនឹងភ្លៀងធ្លាក់ខ្លាំងថ្មីៗទៀតដោយសារព្យុះមួយទៀតដែលនឹងបោកបក់មកដល់នាពេលយប់ក្រោយក្រុងម៉ានីលរងការលិចលង់ធ្ងន់ធ្ងរបំផុតកាលពីសប្តាហ៍មុនដែលប៉ះពាល់ដល់មនុស្សជិត៣,៥លាននាក់ ។
ទីភ្នាក់ងារឧតុនិយមហ្វ៊ីលីពីនវាយតម្លៃថា វិសម្ពាធត្រូពីកាល់មួយត្រូវបានពិនិត្យឃើញនាព្រឹកថ្ងៃទី១៣សីហា នៅចម្ងាយ៦០០គ.ម ពីឆ្នេរសមុទ្រខាងកើតក្នុងមហាសមុទ្រប៉ាស៊ីហ្វិកដែលនឹងត្រូវគ្របដណ្តប់លើប្រទេសហ្វ៊ីលីពីន ។
វិសម្ពាធនោះអាចញ៉ាំងឱ្យមានភ្លៀងធ្លាក់ខ្លាំងធ្វើឱ្យធ្ងន់ធ្ងរថែមទៀតក្រោយទឹកជំនន់លិចក្រុងម៉ានីល៨០% បណ្តាលឱ្យមនុស្ស៩២នាក់ស្លាប់ ពិសេសដោយលង់ទឹកមក ។យោងតាមក្រុមប្រឹក្សាជាតិកាត់បន្ថយនិងគ្រប់គ្រងគ្រោះមហន្តរាយធម្មជាតិថា មនុស្ស៣,៤លាននាក់រងការប៉ះពាល់ដោយទឹកជំនន់ ។ មនុស្សជិតកន្លះលាននាក់ដែលបាត់បង់គេហដ្ឋានរស់នៅក្នុងមជ្ឈមណ្ឌលសង្គ្រោះនានាតាមសាលារៀន និងព្រះវិហារ ។ ទឹកបានស្រកចុះយ៉ាងឆាប់ពីកណ្តាលក្រុងម៉ានីល ក៏ប៉ុន្តែទឹកនៅតែលិចបន្តមិនទាន់ស្រកនាជាយក្រុង ។
ប្រមុខផ្នែកសន្តិសុខស៊ីវិលលោកបេនីតូរ៉ាម៉ូស និយាយថា ប្រជាជនជនបទត្រូវទឹកព័ទ្ធជាប់នៅដាច់ពីគេ ហើយរងការខ្វះស្បៀងនិងទឹកស្អាត ដែលងាយបង្កឱ្យមានជំងឺឆ្លងនានា ។ គឺប្រជាជនទាំងនោះដែលយើងមានការបារម្ភខ្លាំងបំផុត ។ ព្យុះមួយទៀតមកដល់ខណៈយើងនៅពុំទាន់រើខ្លួនរួចផងពីព្យុះមុននេះ ។ ក្នុង១ឆ្នាំៗនារដូវភ្លៀងមានព្យុះប្រមាណជា២០បោកបក់លើហ្វ៊ីលីពីន ។ កាលពីឆ្នាំ២០០៩ ព្យុះឈ្មោះកេតសាណា ធ្វើឱ្យក្រុងម៉ានីលត្រូវទឹកលិចមួយផ្នែកធំហើយបណ្តាលឱ្យមនុស្សស្លាប់៤៦៤នាក់៕
ចែករំលែកព័តមាននេះ