ADផ្ទាំងផ្សព្វផ្សាយពាណិជ្ជកម្ម

លោកនាយឧត្តមសេនីយ៍ ជា តារា ជួបសំណេះសំណាលជាមួយយុវជនស្ម័គ្រចិត្តសម្តេចតេជោ

13 ឆ្នាំ មុន

១៣ ខែ សីហា ឆ្នាំ ២០១២ ម៉ោង ០៤:០០

ខេត្តឧត្តរមានជ័យ ៖ ឆ្លៀតក្នុងឱកាសដែលសភាពការណ៍ព្រំដែនតំបន់ប្រាសាទព្រះវិហារមានសភាពស្ងប់ស្ងាត់ល្អថ្ងៃទី១២ សីហា ២០១២ លោកនាយឧត្តមសេនីយ៍ ជា តារា អគ្គមេបញ្ជាការរង ប្រធានគណៈបញ្ជាការឯកភាពសមរភូមិមុខទិសយោធភូមិភាគទី៤ អមដំណើរដោយនាយទាហានជាន់ខ្ពស់នៃគណៈបញ្ជការសមរភូមិមុខ អាជ្ញាធរដែនដី បានអញ្ជើញជួបសំណេះសំណាលនាំយកអំណោយជាសម្ភារ ថវិកា គ្រឿងឧបភោគបរិភោគ ដល់យុវជនស្ម័គ្រចិត្តសម្តេចតេជោ ហ៊ុន សែន ក្រុមទី១២៤-១២៥-១២៦ ប្រចាំនៅស្រុកត្រពាំងប្រាសាទ និងក្រុមទី ១០៨-១០៩ ប្រចាំស្រុកអន្លង់វែង ខេត្តឧត្តរមានជ័យ ដែលកំពុងបំពេញភារកិច្ចវាស់វែងដីធ្លីជូនពលរដ្ឋតាមគោលនយោបាយចាស់ សកម្មភាពថ្មី ។

ថ្លែងក្នុងឱកាសនោះលោកនាយឧត្តមសេនីយ៍ ជា តារា បានមានប្រសាសន៍ផ្តាំផ្ញើការសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន និងលោកជំទាវកិត្តិព្រឹទ្ធបណ្ឌិត ដែលតែងតែយកចិត្តទុកដាក់ចំពោះក្រុមការងារយុវជនស្ម័គ្រចិត្តចុះវាស់វែងដីធ្លីជូនប្រជាពលរដ្ឋនាពេលនេះ ។ លោកនាយឧត្តមសេនីយ៍បានថ្លែងការកោតសរសើរចំពោះក្មួយៗដែលបានស្ម័គ្រចិត្តមកបំពេញការងារជាប្រវត្តិសាស្ត្រនៅទីនេះ ដែលមិនត្រឹមតែបានដោះស្រាយបញ្ហាទំនាស់ដីធ្លី ជួយសម្រួលផ្តល់ប័ណ្ណកម្មសិទ្ធិដីធ្លីជូនប្រជាពលរដ្ឋប៉ុណ្ណោះទេ តែក្មួយបាន និងកំពុងចូលរួមក្នុងការការពារជាតិតាមបន្ទាត់ព្រំដែន ការកសាងភូមិអភិវឌ្ឍន៍ថ្មីដែលនៅទីនេះមួយចំនួនធំជាគ្រួសារកងទ័ព ជួយដល់កងទ័ពសមរភូមិមុខកាន់តែមានលំនឹងក្នុងភារកិច្ចការពារព្រំដែន ហើយកិច្ចការនេះសម្តេចតេជោ និងលោកជំទាវកិត្តិព្រឹទ្ធបណ្ឌិតយកចិត្តទុកដាក់ជាទីបំផុត ។