រាជធានីភ្នំពេញ ៖ កីឡាករអាំង សំអាត មកពីក្លិបតាព្រហ្មមានជ័យបង្ក្រាបគ្រឿងញៀនមានសំណាងរកបាន៣ពិន្ទុមុនគេក្នុងព្រឹត្តិការណ៍ប្រកួតវគ្គជម្រុះវិលជុំលើកទី១នៅក្នុងពូល B កម្មវិធីប្រកួតដណ្តើមខ្សែក្រវាត់ K-cement ទម្ងន់ ៥៤គីឡូក្រាម នៅលើសង្វៀនស្ថានីយទូរទស្សន៍CTN កាលពីថ្ងៃអាទិត្យទី១២ សីហា កន្លងមកនេះ បន្ទាប់ពីប្រកួតឈ្នះពិន្ទុកីឡាករពៅ ស៊ីយ៉េត មកពីក្លិបក្រុងប៉ោយប៉ែតខេត្តបន្ទាយមានជ័យ ។
នៅក្នុងទឹកទី១ ស៊ីយ៉េត ដែលមានប្រៀបខាងកម្ពស់ជាងសំអាតបន្តិចនោះគេមិនមានអារម្មណ៍ខ្វល់ខ្វាយច្រើនឡើយ គឺគេដើរចូលវាយសម្រុកទៅលើសំអាតទាំងកំរោលតែម្តង ខណៈដែលសំអាត ស្ថិតនៅក្នុងការរារែកក្នុងចិត្តនៅឡើយ។ ចូលដល់ទឹកទី២ សំអាតលែងបណ្តែតបណ្តោយឱ្យស៊ីយ៉េត ធ្វើអ្វីតាមតែចិត្តទៀតហើយដោយសារតែរូបគេចាញ់ប្រៀបខាងកម្ពស់នោះ គេត្រូវតែបង្ខំចិត្តចូលកៀកប្រើស្នៀតកណ្តាប់ដៃវាយតម្រង់មុខ និងពោះទឹកស៊ីយ៉េត ទើបមានសង្ឃឹមយកឈ្នះ ប៉ុន្តែត្រូវស៊ីយ៉េត ប្រើស្នៀតជង្គង់វាយសងវិញដោយសារមិនអាចប្រើស្នៀតជើងទាត់បាន ។
ចូលដល់ទឹកទី៣ និងទី៤ ឃើញថាស៊ីយ៉េត ស្ថិតនៅក្នុងស្ថានភាពមិនសូវល្អដូចមុនទៀតឡើយ ខណៈដែលសំអាតបានបញ្ចេញស្នៀតជង្គង់វាយប្រហារទៅលើពោះទឹករបស់ស៊ីយ៉េតគ្មានប្រណីសោះ ។ ជាពិសេសនៅក្នុងទឹកទី៤តែម្តង ស្នៀតជើងរបស់សំអាតបានទាត់ត្រូវដៃខាងឆ្វេងរបស់ស៊ីយ៉េតយ៉ាងពេញទំហឹងរហូតដល់ថ្នាក់ត្រូវអាជ្ញាកណ្តាលរាប់៨ម្តងទៀតផង ឯនៅទឹកទី៥ សំអាតនៅតែមានប្រៀបជាងស៊ីយ៉េតដដែល ។
ដោយឡែកសម្រាប់គូប្រកួតលក្ខណៈមិត្តភាពវិញ កីឡាករសាំង ស៊ីថា មកពីសមាគមកីឡាប្រដាល់ក្រសួងការពារជាតិ បានធ្វើឱ្យកីឡាករផាវ ភឿត មកពីក្លិបកងពលធំអន្តរាគមន៍លេខ៣ព្រះវិហារ ចាញ់ការប្រកួតដោយពិន្ទុ ទាំងមិនអស់ចិត្តឡើយ ។ ចំណែកសុខ ចិន្តា មកពីក្លិបឃ្លាំងមឿងកីឡាខេត្តពោធិ៍សាត់ ប្រកួតឈ្នះពិន្ទុ ធិន សុវណ្ណ មកពីក្លិបកងពលតូចលេខ៧០ ។
ស៊ីថា និងផាវ ភឿត សុទ្ធតែជាកំពូលអ្នកប្រដាល់ចាស់វស្សាដូចគ្នា ប៉ុន្តែល្បិចប្រយុទ្ធនៅលើសង្វៀនមិនដូចគ្នានោះទេ ។ ស៊ីថា បានព្យាយាមប្រើស្នៀតជើងទាត់ស្រាលៗទៅលើផាវ ភឿត នៅក្នុងទឹកទី១ ក្នុងគោលបំណងសាកល្បងកម្លាំងសិន ព្រោះអ្នកណាក៏បានដឹងដែរថា ផាវ ភឿត ពូកែខាងកម្លាំងជាងបច្ចេកទេស ។ ចូលដល់ទឹកទី២ ស៊ីថា នៅតែបន្តវាយក្នុងលក្ខណៈស្ទាបស្ទង់ដដែល ប៉ុន្តែផាវ ភឿត មិនចេះស្ទាបស្ទង់ឡើយគេបានវាយទាំងកំរោល ដោយប្រើស្នៀតកណ្តាប់ដៃ និងស្នៀតជើងធ្វើឱ្យស៊ីថា ដកថយអែបខ្សែរេញទាំងភ្នែកនៅកញ្ចឹងក ។
ទោះជាយ៉ាងណា ការចំណាយកម្លាំងយ៉ាងច្រើនរបស់ផាវ ភឿត ចាប់ពីទឹកទី២រហូតដល់ទឹកទី៤ គឺមិនសូវទទួលបានផលល្អឡើយ ព្រោះរាល់ពេលដើរចូលវាយទាំងកំរោលរបស់គេមិនខុសពីផ្ទាំងស៊ីបរបស់ស៊ីថាឡើយ ។ សុខ ចិន្តា និងធិន សុវណ្ណ ក៏សុទ្ធតែជាអ្នកប្រដាល់ជើងចាស់ដែលមានល្បិចប្រយុទ្ធនៅលើសង្វៀនក្រាស់ដូចគ្នា ប៉ុន្តែការមកប៉ះគ្នាលើកនេះ សុវណ្ណ ធ្វើមិនបានល្អចាប់តាំងពីទឹកទី២មកម៉្លេះ បើទោះជាសុខ ចិន្តា មិនមានឱកាសវាយផ្តួលសុវណ្ណឱ្យសន្លប់បានមែន តែយ៉ាងហោចណាស់ក៏គេអាចយកឈ្នះពិន្ទុបានដែរ ខណៈពេលទឹកទី៤ និងទឹក៥ សុវណ្ណចាញ់ប្រៀបចិន្តាដាច់តែម្តង ។
កីឡាករនូវ ស៊ីថា មកពីក្លិបរាជសីហ៍បង្ក្រាបគ្រឿងញៀនខេត្តរតនគិរី ប្រកួតឈ្នះកីឡាករឡុង ប៊ុនរ៉ាត់ មកពីក្លិបសាលវ័ន្តកីឡា ដោយពិន្ទុ និងកីឡាករជ័យ ប៊ុនសង់ មកពីក្លិបខេមរិន្ទមានឫទ្ធិ ប្រកួតឈ្នះកីឡាករកុសល វិសាល មកពីក្លិបសាលវ័ន្តកីឡា ដោយពិន្ទុ ៕
ចែករំលែកព័តមាននេះ