រាជធានីភ្នំពេញ ៖ នៅអំឡុងចុងខែសីហា ខាងមុខនេះ សហព័ន្ធកីឡាការ៉ាតេដូកម្ពុជានឹងបើកការប្រកួតការ៉ាតេដូធំមួយក្នុងលក្ខណៈមិត្តភាពជាមួយនឹងក្រុមមកពីប្រទេសជប៉ុន ។ នេះបើយោងតាមការបញ្ជាក់ពីមន្ត្រីកំពូលប្រចាំក្នុងសហព័ន្ធកីឡាការ៉ាតេដូកម្ពុជា កាលពីល្ងាចថ្ងៃទី១១ សីហា ក្នុងជំនួបតាមទូរស័ព្ទជាមួយនឹងភ្នាក់ងារសារព័ត៌មានកោះសន្តិភាព ។
លោកឡាច ច័ន្ទសុវណ្ណ ប្រធានសហព័ន្ធខេមរៈសហព័ន្ធការ៉ាតេដូប្រចាំនៅកម្ពុជា បានអះអាងឱ្យដឹងពាក់ព័ន្ធនឹងគម្រោងប្រកួតកម្រិតទ្វេភាគីនេះថា នៅថ្ងៃទី២៣ សីហា ខាងមុខ តំណាងសហព័ន្ធកីឡាការ៉ាតេដូរបស់ជប៉ុននឹងដឹកនាំកីឡាករ កីឡាការិនីការ៉ាតេដូរបស់ខ្លួនមកធ្វើការប្រកួតក្នុងលក្ខណៈមិត្តភាពធំមួយជាមួយនឹងកីឡាករកម្ពុជា ។ គម្រោងប្រកួតដែលជប៉ុនបានខកខានយ៉ាងហោចជិត១០ឆ្នាំនៅកម្ពុជានេះ នឹងរៀបចំឡើងនៅបរិវេណសាលដំបូលទូក ឬក្នុងបរិវេណទីលានបាល់ទះស្តាតអូឡាំពិកក្រោមការចូលរួមពីថ្នាក់ដឹកនាំសហព័ន្ធកីឡាគ្រប់ផ្នែកទាំងអស់នៅទូទាំងកម្ពុជា ។
លោកឡាច ច័ន្ទសុវណ្ណ បានបញ្ជាក់ថា «យើងបានទទួលរួចហើយសម្រាប់លិខិតសុំប្រកួតជាមួយកីឡាករ កីឡាការិនី ផ្នែកការ៉ាតេដូរបស់កម្ពុជា នាចុងខែសីហា នេះ ហើយភាគីខាងកម្ពុជាក៏ទើបនឹងបានបញ្ជូនលិខិតឆ្លើយតបថា សុខចិត្តរៀបចំការប្រកួតមួយនេះហើយនៅថ្ងៃទី២៣ សីហាហ្នឹង ទៅកាន់ភាគីជប៉ុនវិញដែរ» ។ លោកមិនទាន់ដឹងថា ភាគីជប៉ុននឹងបញ្ជូនកីឡាករមកប្រកួតចំនួនប៉ុន្មានរូបនៅឡើយទេ ប៉ុន្តែយោងតាមបទពិសោធន៍ដែលប្រទេសនេះធ្លាប់បញ្ជូនកីឡាករមកប្រកួតជាលក្ខណៈមិត្តភាពជាមួយកម្ពុជាលើកមុនៗគឺមិនតិចជាង៣០រូបឡើយ ។
ទោះជាយ៉ាងណា លោកបានត្រៀមកីឡាករ កីឡាការិនី ប្រមាណតែ១០រូបប៉ុណ្ណោះ ដើម្បីឱ្យចេញប្រកួតក្នុងគម្រោងស្វាគមន៍ដល់វត្តមានរបស់កីឡាករការ៉ាតេដូមកពីជប៉ុននេះ ។ ចំពោះគម្រោងបញ្ចេញចំនួនកីឡាករតិចតួចក្នុងកាលៈទេសៈដែលកម្ពុជាត្រូវគេដឹងថា មានកីឡាករឆ្នើមៗផ្នែកការ៉ាតេដូយ៉ាងហោចជាង៣០រូបនាពេលនេះ គឺមិនមែនដោយសារមូលហេតុចង់បិទកីឡាករខ្មែរមិនឱ្យចេញមុខនោះទេ ប៉ុន្តែគឺវាជាការការពារមុខមាត់ដល់កម្ពុជានៅក្រោយការប្រកួតបែបមិត្តភាពថ្នាក់អន្តរជាតិនោះច្រើនជាង។
លោកឡាច ច័ន្ទសុវណ្ណ បញ្ជាក់ថា «បើគ្រាន់តែចង់ល្បងសមត្ថភាព ទោះភាគីជប៉ុនបញ្ជូនកីឡាករមក៣០-៤០រូប ក៏សហព័ន្ធខ្ញុំមិនខ្វះកីឡាករឱ្យប្រកួតជាមួយដែរ ប៉ុន្តែខ្ញុំមិនអាចធ្វើអីុចឹងបានទេ ព្រោះខ្ញុំគិតថា ជប៉ុនគេមិនចេះតែបញ្ជូនអ្នកមិនចេះមកនោះទេ ដូច្នេះហើយទើបខ្ញុំត្រៀមបម្រុងតែកីឡាករ១០រូបដែលខ្ញុំជឿជាក់ថា មានសង្ឃឹមឈ្នះជប៉ុនភាគច្រើនឱ្យចូលប្រកួត ហើយខ្ញុំបានផ្ញើលិខិតទៅភាគីជប៉ុនរួចហើយថា ការដឹកនាំកីឡាករមកប៉ុន្មាននាក់ គឺអត់សំខាន់ទេ ប៉ុន្តែសម្រាប់កម្ពុជាគឺផ្តល់សិទ្ធិឱ្យប្រកួតតែជាមួយកីឡាករ១០រូបប៉ុណ្ណោះ» ។ លោកមានជំនឿថា ការប្រកួតទ្វេភាគីដែលគ្រោងធ្វើឡើងនៅថ្ងៃទី២៣ សីហា នៅបរិវេណស្តាតអូឡាំពិកនោះ កម្ពុជាមានសង្ឃឹមទទួលបានជោគជ័យច្រើនជាងកីឡាករជប៉ុនដូចការប្រកួតមិត្តភាពដណ្តើមពានលើកចុងក្រោយដែលបានធ្វើឡើងនៅខេត្តសៀមរាប ។
គួរបញ្ជាក់ថា សហព័ន្ធការ៉ាតេដូជប៉ុនបានដឹកនាំកីឡាករមកប្រកួតជាមួយកម្ពុជាចំនួន៣លើករួួចមកហើយ ដោយការប្រកួតលើកទី១បានធ្វើឡើងក្នុងឆ្នាំ២០០០ នៅទីលានការ៉ាតេដូខាងក្រោយមន្ទីរពេទ្យលោកសង្ឃ លើកទី២ក្នុងឆ្នាំ២០០១ នៅស្តាតអូឡាំពិក និងលើកទី៣ គឺជាការប្រកួតដណ្តើមពានរង្វាន់សម្តេចតេជោ ហ៊ុន សែន បែបទ្វេភាគីតែម្តង នៅលើទឹកដីខេត្តសៀមរាប ។ លោកឡាច ច័ន្ទសុវណ្ណ អះអាងថា ការបញ្ជូនកីឡាករ កីឡាការិនី របស់ជប៉ុនលើកនេះនៅមិនទាន់ដឹងថា មានសមត្ថភាពខ្ពស់បែបណានោះទេ ។ ប៉ុន្តែលោកនៅតែមានជំនឿថា កម្លាំងដែលកម្ពុជាបានត្រៀមទុកនោះ គឺជាធនធានមួយដែលលោកអាចជឿទុកចិត្តបាន បើទោះជាកីឡាករ កីឡាការិនីការ៉ាតេដូ របស់កម្ពុជាទាំងនេះមិនមានការហ្វឹកហ្វឺនបន្ថែមក្នុងបែបផែនពិសេសនៅក្រៅប្រទេស នៅអំឡុងការប្រកួតមិត្តភាពមិនទាន់ចាប់ផ្តើមនេះក៏ដោយ ។
ប្រធានសហព័ន្ធរូបនេះថ្លែងថា «សម្រាប់ធនធានកីឡាករខ្ញុំអត់បារម្ភទេ ព្រោះយើងក៏ទើបតែជ្រើសរើសបានជើងឯកកាលពីចុងខែកក្កដាមុននេះដែរ ប៉ុន្តែអ្វីដែលខ្ញុំមិនសប្បាយចិត្ត គឺគម្រោងប្រកួតនេះមានភាពតក់ក្រហល់ពេកដែលអាចធ្វើឱ្យខ្ញុំស្មុគស្មាញរឿងរៀបចំវេទិកាជ្រើសរើសគណៈកម្មការ និងការបញ្ជូនព័ត៌មានឱ្យគ្រប់ក្លិបការ៉ាតេដូនៅទូទាំងកម្ពុជាបានមកចូលរួមមើលការប្រកួត។ លោកឡាច ច័ន្ទសុវណ្ណ បញ្ជាក់ថា ទោះនោះជាការប្រកួតបែបមិត្តភាព ប៉ុន្តែកម្ពុជាមិនអាចរៀបចំការប្រកួតមួយនេះក្នុងរូបភាពខ្វះមុខខ្វះក្រោយកើតទេ អីុចឹងហើយទើបកាន់តែខ្វែងដៃខ្វែងជើងដើម្បីឱ្យការប្រកួតមិត្តភាពដ៏ធំមួយនេះមិនធ្វើឱ្យកម្ពុជាបាក់មុខ និងក៏ដូចជាបង្ហាញពីភាពរីកចម្រើននៃវិស័យការា៉តេដូនៅកម្ពុជា ៕
ចែករំលែកព័តមាននេះ