រាជធានីភ្នំពេញ ៖ នារីម្នាក់របួសបែកមុខមាត់ និងយុវជនម្នាក់ទៀតជាំភ្នែកខាងស្តាំ ខណៈពេលម៉ូតូពីរគ្រឿងបុកគ្នានៅចំណុចផ្លូវកែងកាលពីវេលាម៉ោង១០និង៣០នាទីយប់ថ្ងៃទី១២ សីហា តាមមហាវិថីព្រះនរោត្តមកែងមហាវិថីព្រះសីហនុ នៅមុខធនាគារឯកទេសវិនិយោគទី១ ក្នុងសង្កាត់ទន្លេបាសាក់ ខណ្ឌចំការមន ។
ប្រភពព័ត៌មានបានឱ្យដឹងថា ម៉ូតូស្មាស់រីវូ ពណ៌ខៀវលាយ.ស បើកដោយយុវជនម្នាក់ក្នុងសភាពស្រវឹងជោកតាមមហាវិថីព្រះនរោត្តម ពីត្បូងទៅជើង ។ ចំណែកម៉ូតូសង់ចិនសេ១១០ ពណ៌សំបកឪឡឹក បើកដោយនារីម្នាក់តាមមហាវិថីព្រះសីហនុ ពីលិចទៅកើត ខណៈមកដល់ចំណុចផ្លូវកែង ម៉ូតូសង់ចិនកំពុងបើកឆ្លងផ្លូវ ស្រាប់តែមានម៉ូតូស្មាស់រីវូបើកលឿនជ្រុលទៅបុកពេញទំហឹង បណ្តាលឱ្យនារីបើកម៉ូតូដួលបែកមុខមាត់ រីឯអ្នកបុកគេដួលជាំផ្នែកខាងស្តាំ ។
នារីអ្នកបើកម៉ូតូសង់ចិនមានឈ្មោះគី ណាំគា អាយុជាង២០ឆ្នាំ ស្នាក់នៅសង្កាត់ផ្សារកណ្តាល ខណ្ឌដូនពេញ ។ ចំណែកអ្នកបើកម៉ូតូស្មាស់រីវូមានឈ្មោះលឹម គឹមលាភ ភេទប្រុស អាយុ២១ឆ្នាំ ជាកម្មកររោងចក្រស្នាក់នៅក្រុងតាខ្មៅ ខេត្តកណ្តាល បានឱ្យដឹងថា រូបគេទើបនឹងចេញពីហូបការមិត្តភក្តិផឹកជ្រុលបន្តិច ទើបបាត់បង់ភាពម្ចាស់ការគ្រប់គ្រងខ្លួនឯង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ