ខេត្តស្ទឹងត្រែង ៖ បុរស២នាក់ត្រូវកម្លាំងកងរាជអាវុធហត្ថខេត្តស្ទឹងត្រែង ឃាត់ខ្លួន និងកសាងសំណុំរឿងបញ្ជូនទៅសាលាដំបូងខេត្ត បន្ទាប់ពីមានពាក្យបណ្តឹងថា បុរសទាំង២នាក់ខាងលើប្រើអំពើហិង្សាទៅលើជនរងគ្រោះ២ករណីផ្សេងពីគ្នា ។លោកវរសេនីយ៍ត្រី ភុយ ខ្វៃ អនុប្រធានមន្ទីរស្រាវជ្រាវ និងយុត្តិធម៌នៃកងរាជអាវុធហត្ថខេត្ត បានមានប្រសាសន៍ថា ជនទាំង២នាក់ខាងលើត្រូវបានឃាត់ខ្លួនយោងតាមពាក្យបណ្តឹងជនរងគ្រោះចោទប្រកាន់ថា បានប្រើអំពើហិង្សាដោយចេតនាដែលករណីទី១ បានកើតឡើងនៅវេលាម៉ោង៦ និង២៥នាទីព្រឹកថ្ងៃទី១០ សីហា ស្ថិតនៅផ្សារស្ទឹងត្រែង ភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ។
ជនសង្ស័យឈ្មោះហុង វ៉ាងអាន ភេទប្រុស អាយុ២២ឆ្នាំ ជនជាតិវៀតណាម មុខរបរលក់ត្រី រស់នៅភូមិព្រែក សង្កាត់ស្ទឹងត្រែង ក្រុងស្ទឹងត្រែង បានយកដែកបំពង់ទីបទៅវាយក្បាលជនរងគ្រោះឈ្មោះលឹម ចាន់ទ្រី ភេទស្រី អាយុ៤៧ឆ្នាំ ជនជាតិវៀតណាម មុខរបរលក់ត្រីដូចគ្នា រស់នៅភូមិលើ សង្កាត់ស្រះឫស្សី ក្រុងស្ទឹងត្រែង ដោយសារជនសង្ស័យខឹងរឿងដណ្តើមទិញត្រីយកមកលក់ ។
ចំណែកករណីទី២ បានកើតឡើងកាលពីវេលាម៉ោង៦ និង៤០ល្ងាចថ្ងៃទី១១ សីហា ឆ្នាំ២០១២ នៅភូមិអូរតាព្រៃ ភូមិក្រឡាពាស ឃុំព្រះរំកិល ស្រុកថាឡាបរិវ៉ាត់ ។ ជនសង្ស័យឈ្មោះអិុន ភុំ ភេទប្រុស អាយុ៣២ឆ្នាំ ជាកម្មករសំណង់ រស់នៅភូមិកើតហេតុខាងលើ បានយកដែកសរសៃទំហំ១២លី ប្រវែង១ម៉ែត្រវាយក្បាលជនរងគ្រោះឈ្មោះទិត្យ រស់ ភេទប្រុស អាយុ៥២ឆ្នាំ ជាមេការសំណង់ រស់នៅភូមិបាចុង សង្កាត់ព្រះបាទ ក្រុងស្ទឹងត្រែង ដោយសារខឹងជនរងគ្រោះមិនព្រមបើកប្រាក់ឈ្នួលពលកម្មឱ្យ ខណៈប្រពន្ធមានផ្ទៃពោះជិតឆ្លងទន្លេ។
លោកវរសេនីយ៍ត្រី ភុយ ខ្វៃ បានបញ្ជាក់ថា ជនសង្ស័យក្នុងករណីទី១ ត្រូវបានបញ្ជូនទៅសាលាដំបូងខេត្ត និងត្រូវឃុំខ្លួននៅក្នុងពន្ធនាគារបណ្តោះអាសន្ន ។ ចំណែកជនសង្ស័យក្នុងករណីទី២ កំពុងសាកសួរកសាងសំណុំរឿងតាមនីតិវិធី រួចនឹងបញ្ជូនទៅសាលាដំបូងខេត្តក្រោយបញ្ចប់ការស៊ើបអង្កេតបើមានស្ថានទម្ងន់ទោស។ ចំណែកជនរងគ្រោះក្នុងករណីប្រើអំពើហិង្សាទាំង២នាក់ខាងលើកំពុងសម្រាកព្យាបាលរបួសនៅមន្ទីរពេទ្យឯកជនរៀងខ្លួន ៕
ចែករំលែកព័តមាននេះ