រាជធានីភ្នំពេញ ៖ ប្រជាពលរដ្ឋប្រមាណជិត១០០នាក់បាននាំគ្នាមកប៉ុស្តិ៍ទួលសង្កែទាំងយប់ ដោយនាំគ្នាផ្តិតមេដៃសំណូមពរឱ្យសមត្ថកិច្ចបញ្ជូនជនសង្ស័យជាមុខសញ្ញាចោរគាស់ផ្ទះម្នាក់ទៅតុលាការកាត់ទោសដាក់ពន្ធនាគារ បន្ទាប់ពីពួកគេចាប់ខ្លួនបានហើយវាយដំដោយកំហឹងរហូតទ្រមខ្លួនពេលចេញធ្វើសម្មភាព ព្រមទាំងយកកូនកាំបិតដេញចាក់គេឯងទៀត ។
ហេតុការណ៍នេះបានធ្វើឱ្យមានការភ្ញាក់ផ្អើលកាលពីវេលាម៉ោង៩យប់ថ្ងៃទី១០ សីហា នៅក្នុងភូមិផ្សារតូច សង្កាត់ទួលសង្កែ ខណ្ឌប្ញស្សីកែវ ។ ជនសង្ស័យដែលត្រូវចាប់ខ្លួនឈ្មោះអាង ប៊ុនធឿន ហៅវែង ភេទប្រុស អាយុ២៩ឆ្នាំ ស្នាក់នៅផ្ទះជួលក្នុងសង្កាត់ស្ទឹងមានជ័យ ខណ្ឌមានជ័យ ។ ជននេះត្រូវបានប្រជាពលរដ្ឋនិយាយថា គឺជាមុខសញ្ញាគាស់ផ្ទះយ៉ាងសកម្មនៅក្នុងភូមិផ្សារតូច សង្កាត់ទួលសង្កែ តាំងពីជននេះស្នាក់នៅក្នុងភូមិផ្សារតូចម៉្លេះ ដែលពេលគាស់ផ្ទះហើយតែងតែរត់គេចរួចរហូត ព្រមទាំងធ្លាប់គេដេញបាញ់ទៀតផង ។
តាមប្រជាពលរដ្ឋឱ្យដឹងថា កាលវេលាម៉ោង៩យប់ថ្ងៃទី១០ សីហា នោះ ជនឈ្មោះអាង ប៊ុនធឿន ហៅវែង ដែលជាមុខសញ្ញាចាស់រួមនឹងបក្សពួកម្នាក់ឈ្មោះ បូរ៉ា បានចេញធ្វើសម្មភាពគាស់ផ្ទះប្រជាពលរដ្ឋនៅតាមផ្លូវលេខ៤៥ ក្រុមទី៧ ភូមិផ្សារតូច សង្កាត់ទួលសង្កែ ខណ្ឌប្ញស្សីកែវ ។ ខណៈនោះប្រជាពលរដ្ឋម្នាក់ឈ្មោះភេម ភារិទ្ធ ភេទប្រុស អាយុ៣៥ឆ្នាំ ដែលធ្លាប់ស្គាល់ជននេះបានសួរថាទៅណា? ឯជននេះឆ្លើយថាទៅរៀន ។ ដោយឮដូចនេះឈ្មោះភេម ភារិទ្ធ តបវិញថា ទៅរៀនអីពេលយប់ ស្រាប់តែជននេះទាញកូនកាំបិតដេញចាក់តែម្តង តែទោះជាយ៉ាងណាពុំបណ្តាលឱ្យរងរបួសឡើយ ។
តាមព័ត៌មានឱ្យដឹងទៀតថា នៅយប់នោះមានការភ្ញាក់ផ្អើលយ៉ាងខ្លាំង ហើយប្រជាពលរដ្ឋដែលធ្លាប់ស្គាល់និងរងគ្រោះដោយចោរគាស់ផ្ទះ ក៏នាំគ្នាចាប់ឈ្មោះអាង ប៊ុនធឿន ហៅវែង នេះ ហើយដោយសារកំហឹង ក៏វាយម្នាក់មួយដៃមួយជើងរហូតទ្រមខ្លួន រួចនាំមកប្រគល់ឱ្យប៉ូលិសប៉ុស្តិ៍ទួលសង្កែ រួមជាមួយសម្ភារសម្រាប់គាស់ផ្ទះមួយកាបូប ដើម្បីបញ្ជូនទៅកាន់តុលាការតាមច្បាប់ ។ ដោយសារតែពុំទាន់បានធ្វើសកម្មភាពប៉ូលិសពុំហ៊ានទទួល ធ្វើឱ្យប្រជាពលរដ្ឋមានប្រតិកម្ម ហើយនាំគ្នាមកកាន់ស្នាក់ការប៉ុស្តិ៍ ។
នៅយប់នោះ ប្រជាពលរដ្ឋប្រមាណជិត១០០នាក់បានមកជួបជុំគ្នានៅមុខប៉ុស្តិ៍ និងនាំគ្នាផ្តិតមេដៃសំណូមពរដល់សមត្ថកិច្ច ដើម្បីបញ្ជូនជននេះទៅកាន់សាលាដំបូងរាជធានីភ្នំពេញចាត់ការតាមផ្លូវច្បាប់ ដែលមានស្នាមមេដៃចំនួន៥៥នាក់ ។
បន្ទាប់ពីប្រជាពលរដ្ឋផ្តិតមេដៃ សមត្ថកិច្ចបាននាំខ្លួនជននេះទៅកាន់អធិការដ្ឋានខណ្ឌប្ញស្សីកែវ ដើម្បីបញ្ជូនទៅតុលាការ ។ ទោះបីជាយ៉ាងណា គេពុំដឹងថាជននេះត្រូវជាប់ពន្ធនាគារឬក៏យ៉ាងណានោះទេ ៕
ចែករំលែកព័តមាននេះ