ជាប់ឆ្នោតជាប្រធានាធិបតីអេហ្ស៊ីបកាលពីខែមិថុនាជនអ៊ិស្លាមនិយមលោកម៉ូហាម៉េដម័រស៊ីអះអាងកាលពីថ្ងៃទី១២ សីហា ពីការក្តាប់អំណាចណែនក្នុងដៃដោយរុញសេនាប្រមុខហ៊ូសេនតាន់តាហ្វីអតីតរដ្ឋមន្ត្រីការពារប្រទេសទទួលបន្ទុកដឹកនាំប្រទេសរយៈពេលឆ្លងកាត់ក្រោយការដួលរលំរបស់លោកហូស្នីមូបារ៉ាក់ កាលពីខែកុម្ភៈ ឆ្នាំ២០១១ឱ្យចូលនិវត្តន៍ ។
ការប្រកាសកាលពីថ្ងៃទី១២ សីហាដែលទាក់ទងផងដែរដល់ការរុញឧត្តមសេនីយ៍សាមី អឺណា អាយុ៦៤ឆ្នាំជានាយសេនាធិការកងទ័ពឱ្យចូលនិវត្តន៍ពិតណាស់ញ៉ាំងឱ្យមានការភ្ញាក់ផ្អើលយ៉ាងខ្លាំងក្នុងប្រទេសអេហ្ស៊ីបព្រោះកងយោធានៅតែដើរតួនាទីគន្លឹះមួយក្នុងការគ្រប់គ្រងអំណាច ។ សេនាប្រមុខនិងឧត្តមសេនីយ៍ដែលរុញឱ្យចូលនិវត្តន៍ត្រូវតែងតាំងជាទីប្រឹក្សារបស់ប្រមុខរដ្ឋរួចវិធានការនេះត្រូវចូលជាធរមានភ្លាមៗ ។
ក្នុងសេចក្តីប្រកាសមួយអ្នកនាំពាក្យរបស់ប្រមុខរដ្ឋថ្លែងថា សេនាប្រមុខហ៊ូសេនតាន់តាហ្វី ត្រូវចូលនិវត្តន៍ចាប់ពីពេលនេះតទៅ ។ តំណែងលោកជារដ្ឋមន្ត្រីការពារប្រទេសនិងប្រធានក្រុមប្រឹក្សាយោធាជាន់ខ្ពស់ត្រូវជំនួសដោយឧត្តមសេនីយ៍អាប់ដែលឡាទីហ្វស៊ីស៊ី ។
ឧត្តមសេនីយ៍ស៊ីដគី សូហ៍ប៊ី ឡើងជំនួសឧត្តមសេនីយ៍សាមីអឺណា ជានាយសេនាធិការកងទ័ព ។ លោកជាមនុស្សដែលចាប់តាំងពីយូរមកហើយត្រូវគេចាត់ទុកថាស្និទ្ធអាមេរិកដែលផ្តល់ជំនួយច្រើនដល់កងទ័ពអេហ្ស៊ីប ។ប្រធានាធិបតីអេេហ្ស៊ីបនៅបានតែងតាំងចៅក្រមមួយរូបលោកម៉ាមូដ ម៉េកគី ជាអនុប្រធានាធិបតីនៃសាធារណរដ្ឋ ៕
ចែករំលែកព័តមាននេះ