រាជធានីភ្នំពេញ ៖ ទីបំផុតទៅ លោក សៅ រ៉ានី អគ្គលេខាធិការគណបក្សនរោត្តម រណប្ញទិ្ធ ត្រូវបានជ្រើសតំាងជាប្រធានស្តីទីគណបក្សនរោត្តម រណប្ញទិ្ធ ។ ការជ្រើសតំាងនេះបានធ្វើឡើងនៅក្នុងកិច្ចប្រជុំដោយបិទទ្វារកាលពីវេលាម៉ោង៩ព្រឹក ថ្ងៃទី១៣ សីហា ២០១២នេះ នៅទីស្នាក់ការគណបក្សនរោត្តម រណប្ញទិ្ធ ស្ថិតក្នុងខណ្ឌទួលគោក រាជធានីភ្នំពេញ ដោយមានការចូលរួមពីគណៈកម្មការនាយក និង សមាជិកក្រុមប្រឹក្សាជាតិគណបក្សនរោត្តម រណប្ញទ្ធិចំនួន៥៨រូប ។
គួរបញ្ជាក់ថា ការជ្រើសតំាងលោកសៅ រ៉ានី ជាប្រធានស្តីទីគណបក្សនរោត្តម រណប្ញទ្ធិ នាពេលនេះបានធ្វើឡើងបន្ទាប់ពីសម្តេចក្រុមព្រះពីប្រទេសបារំាងបានប្រកាសឈប់ធ្វើនយោបាយកាលពីថ្ងៃទី១០សីហា និងក្រោយមកមួថ្ងៃពោលគឺ លោកឈឹម សៀកឡេង ដែលជាប្រធានស្តីទីគណបក្សនរោត្តម រណប្ញទ្ធិក៏បានប្រកាសឈប់ធ្វើនយោបាយនោះផងដែរ ។
ដោយឡែកនៅរសៀលថ្ងៃទី១៣ សីហា នេះ តាមគម្រោងលោកសៅ រ៉ានី ដែលត្រូវបានគណៈកម្មការនាយក និងសមាជិក ក្រុមប្រឹក្សាជាតិគំាទ្រជាឯកច្ឆន្ធជ្រើសតំាងជាប្រធានស្តីទីគណបក្សនរោត្តម រណប្ញទិ្ធនាពេលនេះ នឹងទៅដកពាក្យបណ្តឹងប្រឆាំងនឹងសម្តេចក្រុមព្រះវិញ ដែលកាយវិការនេះបានបង្ហាញថា ជម្លោះផ្ទៃក្នុងរបស់គណបក្សនរោត្តម រណប្ញទិ្ធ នឹងត្រូវបិទបញ្ចប់នៅថ្ងៃចន្ទនេះ ។
បើតាមអ្នកឆ្លើយឆ្លងព័ត៌មានកោះសន្តិភាពដែលកំពុងមានវត្តមាននៅទីស្នាក់ការគណបក្សនរោត្តមរណប្ញទិ្ធ នោះ បានបញ្ជាក់ឲ្យដឹងដែរថា នៅថ្ងៃទី២៤ សីហា ២០១២ ខាងមុខនេះ គណបក្សនរោត្តម រណប្ញទិ្ធ នឹងបើកធ្វើសមាជមួយដើម្បីផ្លាស់ប្តូរឈ្មោះគណបក្សនរោត្តមរណប្ញទិ្ធ ទៅជាឈ្មោះគណបក្សជាតិនិយមវិញ ៕
ចែករំលែកព័តមាននេះ