រាជធានីភ្នំពេញ ៖ បុគ្គលិកហាង២នៅជិតគ្នាឈ្លោះប្រកែកគ្នាវាយទាត់ធាក់បែកបាក់របស់របររាយប៉ាយពេញក្នុងហាង និងម៉ូតូសង់កូរ៉េពណ៌ក្រហមមួយគ្រឿងនៅក្នុងហាងចេលីម៉ាត លក់បាយ កាហ្វេ និងគ្រឿងក្លែមគ្រប់មុខ ដែលមានទីតាំងនៅតាមកំណាត់ផ្លូវជាតិលេខ២ ក្រុមទី៣៣ ភូមិទួលរកា សង្កាត់ចាក់អង្រែក្រោម ខណ្ឌមានជ័យ កាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១៣ សីហា ។
បើតាមសម្តីម្ចាស់ហាងចេលីម៉ាត ឈ្មោះហ៊ីង ចាន់ថាណា ភេទស្រី អាយុ៣៣ឆ្នាំ ឱ្យដឹងថា កាលពីថ្ងៃទី៨ សីហា កន្លងទៅ នៅហាងរបស់គាត់មានបុគ្គលិក២នាក់ប្តីប្រពន្ធ ប្តី មានឈ្មោះម៉ៅ សុគា អាយុ២៧ឆ្នាំ និងប្រពន្ធឈ្មោះតេង ស្រីនឿន អាយុ២៧ឆ្នាំ ស្នាក់នៅភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ បានឈ្លោះប្រកែកគ្នានៅក្នុងហាងរបស់គាត់ហើយគោះទ្វារស្រែកជេរគ្នាផ្អើលទាំងយប់ ។
ប្រភពដដែលបន្តទៀតថា ចាប់ពីថ្ងៃនោះមកគាត់ក៏បានហៅពីរនាក់ប្តីប្រពន្ធនេះមកបើកប្រាក់ខែឱ្យ ហើយបានបញ្ឈប់ពីការងារទាំងពីរនាក់ប្តីប្រពន្ធ ។ បន្ទាប់មកបុរសជាប្តីបានមកសុំធ្វើការវិញ ចំណែកស្ត្រីជាប្រពន្ធបានទៅធ្វើការនៅហាងផាឡេសបាសាក់ នៅជិតកន្លែងស្នាក់នៅ។ លុះយប់ឡើងស្ត្រីជាប្រពន្ធបានមកអុកឡុកបុគ្គលិកនៅក្នុងហាងអូដាលីន ដែលមានចម្ងាយពីហាងចេលីម៉ាតប្រមាណ៣០ម៉ែត្រ ២-៣យប់មកហើយ ។
ដោយឡែកបុរសជាប្តីឈ្មោះម៉ៅ សុគា បានឱ្យដឹងថា នៅយប់កើតហេតុពេលដែលរូបគេឈរនៅខាងមុខហាង ស្រាប់តែមានបុគ្គលិកហាងអូដាលីន បានជិះម៉ូតូមកដល់យកដុំថ្មគប់ទៅលើរូបគេ តែសំណាងល្អគេបានរត់គេចចូលទៅក្នុងហាងទាន់មិនមានរងរបួសទេ ខណៈនោះរូបគេបានជេរទៅក្រុមបង្កនោះវិញ។ បន្ទាប់មកស្រាប់តែជនដៃដល់ខាងក្រុមហាងបង្កនាំគ្នាយកថូដាក់ស្រាទៅបោកនៅជិតហាងរបស់គាត់បង្កទៅជាជម្លោះកាន់តែធំតែម្តង។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ